Read Lashi COUNG" NGHEI 94 Bible Online

COUNG" NGHEI 94 - Lashi bible

COUNG" NGHEI 94

¹ASEING we" nang gi dam kaid nyid da" Mangsoo nghoid da. Re" da" nheigloem: nge" lung khyoo: ri toin" shed we'.

²Nang gi byu nyid moo: nyid bang: ri tarha" dang: phyed su: nghoid. Too re nghoid boin: lho: phau: khuang nyid bang: ri yo" yu eung: ziyo' dakhyoo" ti" dam kaid byid: re.

³Akhyeung" da" byu yigi kha: yo, ju" sho' gau yi nyid goo" wa la". ASEING we" khanham ju" sho' nyid nyid goo" wa lha".

⁴Yooboo shoid gei tab, yen" mo, gi khayo, ju" sho phau: khuang wigi yo" nghoid boin: nyid boem wa lha".

⁵ASEING we" Nyangnu" gi re" da" byu yiri mhoin' pyam, nyid lho: nang seung: ci: bye: da" byumyu" yiri nyangnu" gi doin: zeig zo: nyid boem ago".

⁶Nyangnu" gi cougmoo" myhi' yi yo' coug" zoo: nu" yiri said pyam nyid boem ziyo' Nyangnu" mungdain: moo: bo nyid da- tungbau byu yiri we' said pyam nyid boem ago".

⁷Nyangnu" tid zigi ASEING gi ngoonu" ri amyang- Israela da" Mangsoo gi ngoonu" ri ayu" nyid" ga: tid nyid ago".

⁸Nga" da" byumyu" yi we"- nanu" gi khasu" wim wigi phajhi" abo boem ziyo' akoo" adoug: bui" nau nyid go" lha".

⁹Mangsoo gi ngoonu" da" nukhyab' ri phain" so: too" byid: bye:- nyang: ashoug" gyoo: loo: nyid wa la". Nyang: gi myojid" ri phain" so: too' byid: bye:- nyang: gi ayo" myang wa ein: go" la".

¹⁰Nyang: gi byumyu" yiri jhau" byid: nyid. Nyang: gi nyangnu" ri we' dam akaid wa ein: go" la". Nyang: gi byu xangsu: dangain" da" jhau" byid: sara: nghoid- nyang: gi phajhi" aboo su: nghoid lha".

¹¹ASEING gi nyangnu" ce: noem myid nyid ziri se' nyid nyang: gi nyangnu" da" myid soin: khyoo: gi cigyeing" we' anghoid ziri se' nyid.

¹²ASEING we" nang khyoo" shed ziyo' nang jhau" byid: tarha" khyoo: moo cang loo" su: gi khayhi' ngilho' nyid la.

¹³ASEING gi nya: byumyu" yiri she: pyam, too" wa zi anghoid- nyang: seung: ci: da" byumyu" yiri du" pyam, too" wa zi anghoid.

¹⁵Tarha" yung moo deingmain" da" khyoo: ri doem myang lo wigi deingmain" da" byu yi dangain" we' hau: khyoo: ri bo thoug pang" wa zi nghoid nyid.

¹⁶Akhyeung" bang: ri tu: lhoin" lo" da" uri kha: yug gi nga" thang: dab, yu" la". Akhyeing" da" moo" zei: mo, ri thougtheung lo" uri kha: yug gi nga" thang: dab, yu" la".

¹⁷ASEING ngoo ri apang" thoug nghoid rigi jham" dung" khe" da" mungdain: khyoo: myab, myab, ngoo yhe: loo" wa zi nghoid.

¹⁸Ngoo gi jhoid leung lo" nyid bye:- ein: ngoo tid nyid bye:. Nghoid loug we' ASEING we" nang gi re" da" athang agoin jhed khyeing: kang: khyeing: yo' ngoo ri she: yu nyid bye:.

¹⁹Ngoo gi myid myoo: ung: loug zi thoung" shoug" nyid da" uri nang gi ngoo ri: nheug teung ung: teing byid: ziyo' gau yi ngei pyoo: nhang: nyid da:.

²⁰Atarha" da" moo" ri zei: lho: akyang" byo, da" tarha" agyi yiri nang gi avhoo: angei nghoid da:.

²¹Nyangnu" gi byu yiri akhyeing" ashoeb khyo" soin' lho: ce" yooboo adab, bang: ri shid: wa dam byid: nyid ago".

²²Nghoid loug we' ASEING gi nga" da" yoem yu jang: nghoid wigi nga" Mangsoo gi ngoo ri goem loem byid: nyid.

²³Nyang: gi nyangnu" ri tarha" aci: da" moo" zoo" yoomo dam byid: wa ziyo' nyangnu" da" yooboo joem yoomo nyangnu" ri lhu: phyo' pyam, byid: wa zi nghoid. Ngoonu" da" ASEING Mangsoo gi nyangnu" ri lhu: phyo' lhu: jhoem" pyam wam bye: o".