Read Lashi COUNG" NGHEI 95 Bible Online

COUNG" NGHEI 95 - Lashi bible

COUNG" NGHEI 95

¹Ri" ge'- Mangsoo ri nyhangnu" coung" nghei nyid boem shang. Nyhang" ri lhoug zung" nyid da" Mangsoo ri gau yi jihkoin" khoin" shang.

²Nya: shidkhoin" moo jeju" boin: ziyo' ngoonu" vang yhi: shang- jihkoin" dang: thui: yo' nyang: ri ngei bu: coung" byid: shang.

³Khasu" wim gari ASEING gi gyi: thang Mangsoo nghoid lho: yu phara" yi dangain" tho' mo gyi myhang: thang da" khokham zeing nghoid.

⁴Nyang: gi no, thang da" lug khyug: khoug: mo wigi myhang: thang da" boem phyoo" tho' moo: ju" sho' mougmyid gyab, goin" ziri vhoebkhang" nyid su: nghoid.

⁵Nyang: gi nyang: phain" so: to" da- panglai: gyid yo' nyang: gung nyang: alhoo: zhoug to" da" myidjang ri we' vhoebkhang" nyid.

⁶Ri" ge'- nyhang" nyang: ri poid thug thug lho: noku coung" nghei nyid boem shang. Yha" da" ASEING phain" so: soo: su da" shidkhoin" moo: poid thoug thug to" boem shang.

⁷Nyang: gi: ngoonu" da" Mangsoo nghoid- nyhang" gi nyang: lhoug zung" goin coung: nyid da byumyu" yi nghoid. Nyang: lhoug zung" nyid da" yang phung: yi we' nghoid nyid. Nyang: ce noem tid nyid ziri akhid" nyid" nyang: tam" gyoo: we'.

⁸Meriba moo: nyid lid loo bye: nanu" da" nya: phoug" phyid" yi yhang: ti" we' Nasa siyoo khoug: moo hau: bidnyid ri nyangnu" koid lid lo yhang: ti" we' nanu" da" nheigloem: ri athain: nyid loo: goo.

⁹Nyangnu" gi nyangnu" da" shid re" ngoo zei: shoug da" moo" zoo" ri shau" myang boem abye: go:. Nghoid loug we' ngoo ri hau: joyoo moo jham" ca: yu abye: go.

¹⁰Ngoo gi myid xi: zain' bain sho hau: byumyu" yiri anau, yu" loo. Nyangnu" gi dang: gye" azung" bang: nghoid goonhung:. Hau: lho: nyangnu" gi ngoo tid to" da" tarha" joem ri ngeug pyam bang: nghoid nyid boem ago" ein: ngoo tid bye:.

¹¹Ngoo gi nheig yoo: nau nyid ziyo' Nyangnu" ri myenjham" za: shoug" nyid wa shid re" ngoo byid: wa ein: da" mungdain: khyoo: khanham we' ayo" vang loo" goo" wa ein: ngoo nheung" too" bye:.