Read Lashi COUNG" NGHEI 96 Bible Online

COUNG" NGHEI 96 - Lashi bible

COUNG" NGHEI 96

¹ASEING ri jikhoin" dang: seig thui: yo' coung" byid: ge'. Mougmyid gyab, goin" hau: ASEING ri coung" nghei nyid we'.

²ASEING ri jikhoin" khoin" nyid ge'- nyang: ri coung" nghei nyid we'. Nyang: gi nyhang" ri khyoid yu bye: ein: da" ngei bu lu dang: ri nyid" khang" moo" kho" kyo" nyid we'.

³Byumyu" yiri nya: da" myonhoo: phung" yoeb byumyu" cang: joeb, bang: ri Nya: da" gyi: thang moo" zoo" ri kho" kyoo" byid: nyid we'.

⁴ASEING gi gyi: sheung: nyid yoomo atho' tid loo: sho coung" nghei moin: su: nghoid nyid yu phara" joem dangain" tho' moo nyang: ri myonhoo: ngi shab byid: wa zigi ge nyid.

⁵Gootu: byumyu" dangain" bang: da" yu phara" joem gi soolhoo: za: date: nghoid nyid. Nghoid loug we' ASEING gi mougkhung: mougdi ri phain" so: to" abye:.

⁶myonhoo: ngi lang: yo' phung" yoeb bugthu sheing" jhu" khyoo: gi Nyang: ri lheung khoem to" wigi yoem zeing so, moo" yo' younglho' da" khyoo: joem gi Nya: da" Noku Yhoem: Moo" moo: dabyeung" jo.

⁷Mougmyid gyab, goin" jang" mo byumyu" yi bain sho bang: we"- ASEING ri coung" nghei nyid ge'- nya: da" phung" yoeb yo' amyeing" yoem: so' ri coung" byid: nyid we'.

⁸ASEING da myonhoo: phung" yoeb bo da" myeing khyang" ri coung" nghei nyid we'. To' byid: wa da" xoin" ri ci: lho: nya: Noku Yhoem: Moo" khyoo: vang yhi: we'.

⁹Nyang: thu' myhang lo da" uri gyeung" shang: su: da" shidkhoin" moo poid thug thoug too" we'. Mougmyid gyab goin" nya: shid: khoin" moo gyoug nain" nyid we'.

¹⁰«ASEING gi khokham nghoid. Mougmyid ri geing: geing: teing teing nyang: phain" so: to" wigi hau: zigi loeb dei nyid zi anghoid. Nyang: gi byumyu" yiri deingmain" khyoo: yo' dang: phyed byid: wa zi nghoid» ein: wigi byumyu" yi dangain" bang: ri tid kyoo" we'.

¹¹Mougmyid yoosoo" yo' mougkhung: mougdi joem we"- gau yi nyid ge'. Panglai: yo' hougmoo: bo da" dei moo: dei bang: dangain" we'- nyang: ri thui: zeing thui: moo" yo' nyho: phau: nyid we'.

¹²Pa: dam yo' hougmoo: nyid bang: we' gau yi ngei bu: nyid loo ge'. ASEING gi mougmyid ri vhoebkhang" wa ga: ju" gyo" loo lang" siyoo mo seiggam joem pyo: ziyo' nyho: nyid wa zi nghoid.

¹³Nyang: gi mougmyid tho' mo byumyu" yiri nyeung veung" tarha" yo' gam mi gam shoo" yi vhoebkhang" nyid wa zi nghoid.