Read Lashi DANG: ZHOEM 10 Bible Online

DANG: ZHOEM 10 - Lashi bible

DANG: ZHOEM 10

¹He: zigi Sholumon da" dang: zhoem, joem nghoid- phajhi" bo da" zooshang: gi nya: phoo ri phau: khuang nhang: wigi ko" pyoid da" zooshang: gi nya: myhi' ri koug shu: nhang: nyid.

²Adeing: amain" khyo" yo" sho: yu da" jonu" gi nang ri ce" akyu" we' ayo" byid. Nghoid loug we' nheigloem: dain: khyoo: gi nang ri shid: wa jang" mo yo" khyoid yu.

³ASEING gi deingmain" da" byu yiri zooyoid zi ashoug" nhang: nghoid loug we' akhyeung" bang: ri koem gi nyangnu" myid, vho: khyoo: ri ayo" yu loo: sho' koid loo wa.

⁴Nei" khyoo: gi nang ri asho" jhen: nhang: nghoid loug we' yoem: kaid zei: so, khyoo: gi nang ri yo" loo de, loo nhang: wa nghoid nyid.

⁵Nheigboo ung: gyeing: su: gi gug shi" mei: shi" myheung voin" to" uri shab yu nyid. Gug yham" yo, ri yhoeb jo, su: gi sho' asi, su: nghoid nyid.

⁶Byu gi yigi mainkaid jeju" ri shoug" kham: yu wa akhyeung" byu yi da" nhoid khoin" thui: gi athoug" akhyoug: moo" ri yhoem" to" nyid.

⁷Byu gi yigi mainkaid jeju" daloem: khyo" xoem" to" zi shoug" loug we' akhyeung" da" byu yigi daso, nghoid lang" to" myhed pyam, zi shau" boem wa.

⁸Nheigboo ung: gyeung: da" byu yigi ge da" phajhi" byid: dang: ri lhoem: kham: yu se' nyid. Akoo" apyoid da" dang: tid bang: gi byo, yoin" lo" boem wa zi nghoid.

⁹Nheigloem: dain: da" byu yi koem gi pyoo: za: gau: nyu: lho: myenjham" nyid boem loug we' adeing amain" khyo" moo" zei: bang: koem gi myheug lhoung lo" zi: shau" boem wa nghoid.

¹⁰Deingmain" da" khyoo: ri zau" too" su: gi yau: khe" kyi" khyeug khyoo: ze" bue" nyid nghoid loug we' bang bang gyi koid jhau" byid: nyid su: gi ngei pyoo myenjham" khyo: shid re" moo" zei: nyid.

¹¹Byu gi yi da" nhoid khoin" thui: joem gi kangso' gyid bug nghoid loug we' akhyeing" su: da" nhoid yhoo: khoin" thui: gi athoug" akhyoug: khyoo: ri nghoeb yhoem" to" nyid.

¹²Ngheing" da" nheigloem: gi yau: khe" khyoo: ri lhu: nhoug" lhu: zhuang" byid: loug we'-jheddab nheigloem: gi shoid vhang: khyoo: dangain" ziri khyam" sa: yo" byid: nyid.

¹³Phajhi" koung da" byu yigi dang: kang: bo da" dang: ri tid nyid nghoid loug we' ko" pyoid da" byu yi koem gi shen" yhen zi shau" boem wa nghoid.

¹⁴Phajhi" boo su: gi nyangnu" yo" se' da" lasi laleug dangain" ri young: xoem" too" nghoid loug we' akoo" apyoid bang: dang: to' tid lo rigi yau: khe" kyi" khyeug khyoo: gi nam, tain" moo: ju" jo, bye:.

¹⁵Jonu" gi jonu" yoo" su: ri lhoug zung" byid: nyid myoung sho" da" khyoo: gi sho" jhen: su: ri lhu: phyo' nyid.

¹⁶Ge, lho, moo" zei: da" aphoug" jhungshug gi kangso' khyoo: nghoid nyid yooboo moo" zei: nyid su: gi je" no, thu: da" yooboo za dadoem loung: yu nyid.

¹⁷Jhau" byid: nyid uri tam" gyo: da" byu yigi kangso' shoug" dei nyid boem wa nghoid. Nyang: nyang: shoid vhang: da" yooboo ri ayhen: yu nyid da" byu yigi kyi" khyeug da" shid: gyoin' thoung" shau" boem wa zi za: nghoid.

¹⁸Nyang: nya: da" nheigloem: khoug: moo ngheung" da" myid ri yhoem" too" su: gi mhau da" byu nghoid nyid. Sube" da" gei sang: shang pyang: yen" su: hang" nghoid loug we' nheig agyeung: su: nghoid.

¹⁹Nang dang: je, myo: tid nyid lang" yooboo je myo: lo. Nang phajhi" boo su: nghoid rigi:-sam' zoo: nyid nyid wa zi nghoid.

²⁰Byu gi yi tid da" dang: khoin" joem gi ngei gyeing" yo' du nyid akhyeung" su: da" myid soin: khyoo: gi akoem: za danghoid nyid

²¹Byugi yi da" dang: joem gi byu myoo" sho' bang: ri akyu" jeju" shoug" kham: yu nhang: nyid. Nghoid loug we' nanya: nheig agyeung: da" khyoo: gi nanya: da" gung du: ri nanyang: said nyid.

²²Nang jonu" yo" lo zigi ASEING mainkaid jeju" nghoid. Hougmoo: myid myoo: ung: loug khyoo: ci" we' aboo.

²³Anghoid akhuang da" moo" zei: su: gi nheig agyeung: su: nghoid wigi vhu" nug gi mo, gi phajhi" juyhi: mo ngei pyo: khyoo: ri yo" yu nyid ago".

²⁴Deingmain" da" byu yigi nyangnu" nyang: vho: ngei nyid da" ziyoo joem ri yo" yu nyid boem. Akhyeung" bang: gi gye" gyoug pho" thang da- khyoo: ri yo" yu boem wa zi nghoid.

²⁵Akhyeung" bang: rigi uglid moo" hau, lo ri bo moid tang" lo" byug nghoid loug we' deingmain" da" byu yi koem gi khanham we' gau: nyu: nyid boem.

²⁶Nei" da" byu yiri re" da" shid mo ce" moo" ri we' azei: nhang:- yhid: jhen: yeing ri re" da" zei, ri kyoem: nhang: yhang: ti"- anghoid lang" myikhoug" gi re" da" myojid" ri phyeig nhang: yhang: ti"- nyang: gi nang ri nheig ze" yoo: nhang: wa zi nghoid.

²⁷ASEING da" dang: ri tam" gyo: nyid we' houg: lang" nang gi kang: sheung: nyid wa zi nghoid. Akhyeung" bang: gi nyangnu" da" ayo, aju" shi" ri shid: lo" byoug boem wam: bye:.

²⁸Byugi yi da" nheig byu nyid khyoo: gi nyangnu" ri ngei pyoo: nhang: nyid nghoid loug we' akhyeing" ashoeb mo, koem gi ciyo" yu wa ga: lang" nyid cang aboo loo.

²⁹ASEING gi deingmain" mo, ri lhoug zung" goem coung: byid: nyid nghoid loug we' anghoid akhuang koid mo, rigi phyo' shoin' pyam wa zi nghoid.

³⁰Deingmain" bang: gi khanham we' gau: nyu: nyid boem- nghoid loug we' akhyeung" bang: koem gi he: mungdain: moo: yo" bo shoug" nyid deung boem wa zi anghoid.

³¹Deing: byeung" da" byu yigi phajhi" juyhi: dang: tid thu' nyid nghoid loug we' ashoeb da" dang: tid thu' da" yhoo: rigi toem, pyam zi shoug" wa nghoid.

³²Deing: byeung" da" byu yigi nheig khyeug da" dang: ri se' tid nyid ago- nghoid loug we' akhyeing" ashoeb bang: gi khanham we' subi" ri noo, nhang: da" dang: za: datid thu nyid ago".