Read Lashi DANG: ZHOEM 12 Bible Online

DANG: ZHOEM 12 - Lashi bible

DANG: ZHOEM 12

¹Lasi, laleug ri jheddab su: hang" nghoid loug we'-nyang: shoid vhang: nyid uri re" tid poin" byid: wa zi vho: ngei nyid. Jhau" mho' khyoo: shed ziri ngeug pyam nyid su: gi nheig agyeung: su: nghoid.

²ASEING gi byu gi ri vho: ngei nyid nghoid loug we akhyeung" da" moo" zoo" ri myid soin: nyid mo, rigi Nyang: gi yooboo dam kaid byid: nyid.

³Akhyeung" da" khyoo: gi gau: nyu: da" khyoo: ri ayo" byid- nghoid loug we' deing: byeung" da" byu yi koem gi geing: geing: teing teing yo" yab jo, boem wa zi nghoid.

⁴Ge da" yhoem: seing: myhi' gi nya: yhoem: seing: pho, da" phau: khuang joyoo yo' gau, yi joyoo nghoid nyid. Nghoid loug we' yhoem: seing: phoo ri sho' thu' nhang: da" yhoem: seing: myhi' gi shooyoug: ri yoem: loo" nhang: da" mung yhang: ti" zi nghoid.

⁵Deingmain" da" byu yigi nang ri nyeung vho, khyo" coung: goem byid: wa zi nghoid. Akhyeung" bang: koem gi nang ri mhau, shoem zoo: wa za: vhoo" byed nyid boem ago".

⁶Akhyeing" mo, da" khyoo: gi leung byed suid" shoin: nhang: da" khyoo: nghoid nyid. Nghoid loug we' deing: byeung" mo, da" khoin" thui: joem koem gi kyug nhain' zi shoug" nyid bang: ri yo" khyoid yu nyid.

⁷Akhyeung" bang: gi soem" gyo" lo" zi shoug" nyid wigi nya: da" amyed ashen yi adeing loo: nghoid da:. Nghoid loug we' deing: byeung" bang: da" yhoem: ikoin deungkhu: joem gi dageung: teung jo, wa zi nghoid.

⁸Nang lasi phajhi" boo su: nghoid rigi coung" nghei byid: zi nang shoug" wa nghoid. Nang ko" fang: su: nghoid ri koem gi subi" nang ri yu" nge pyam zi shoug" wa nghoid.

⁹Kangso, dei nyid wa shid re" yu" maya" byu dayug gi moo" zei: jid: ne: lho: nya: voem: doug: khu: khyoo: gi gye" nghoid khyo" nyid lho: zooyoid kham nyid su: tho' re" je" ge nyid.

¹⁰Byu gi yigi nyangnu" nya: da" gougnyhoug ri se' yu" coung: goem nyid nghoid loug we' akhyeung" da" byu yi koem gi nyangnu" da" gougnyhoug joem ri asho" ajhen: koid nyid boem.

¹¹Moo" zoo" moo: yoem: kaid da" yoo moo" zei: su: gi zoo: noem myoo" sho' yoo" nghoid loug we' ce" akyu" abo jang" moo: moo" nyid gyo yen" su: gi byugang: nghoid nyid.

¹²Akhyeing" ashoeb, bang: dangain" mo, vho: ngei nyid khyoo: gi akhyeing" ashoeb, da" moo" zei: zi za: nghoid boem loug we' deing: byeung" da" byu yi koem gi geing: geing: teing teing dayab, jo, boem ago".

¹³Akhyeing" ashoeb su: gi nya: dang: thui: mo wigi tei" ri baid yeug nyid nghoid loug we'-deing: byeung" su: koem gi kyi" khyeug khoug: mo nya: gung nyang: yo" lu: byoin thu' lo" nyid.

¹⁴Nang ri coung" nghei ngi: shab da" jhungshug joem gi nanyang: tid sang: zei: so'- moo" zoo" moo: ayang: nghoid wigi nang kham: yu moin: ziri nang yo" yu wa nghoid.

¹⁵Nheig agyeung: byu yigi nyangnu" gi jo da" byu yi nghoid ga: khanham we' myid jho: nyid boem ago". Phajhi" bo da" byu yigi phajhi" byid: da" dang: ri se' kham: yu nyid ago".

¹⁶Ashoeb su: gi nheig yo: lo ri houg: jang: subi" ri si' nhang: pyam. Shid khyoo: thang: khyoo: se' myid soin: yu" da" byu yigi aphoug" akhyoid koid da" khyoo: ri cishu: anhang: boem nghoid ago".

¹⁷Deingmain" da" khyoo: ri nang tid nyid uri deingmain" da" nyeung veung" tarha" ri cang pyeung nyid zi nghoid. Nghoid loug we' mhau, fain" da" dang: khoin" gi- tarha" shoid vhang: khyoo: moo: shu" yhe: lo" nyid.

¹⁸Amyid yu" loo: tid thu' kaid da" dang: gi no, sho' jab, kaid da" sham: yhang: ti" dam yo" tab, nyid. Nghoid loug we' phajhi" dang: khyo" ji sang: da" dang: khoin" thui: koem gi yo" nyeung ze: ge loo" nhang: nyid.

¹⁹Mhau' fain" nyid su: gi kang: leung" nyid nghoid loug we' deingmain" khyoo: gi pyaid moo: too: moo: dageung: teung jo.

²⁰Hau: akhyeing" ashoeb, moo" ri myid soin: nyid mo, gi nyeigdain tung" dain' mau" boem wa zi nghoid- nghoid loug we' ge lho, khyoo: shid re" yoem: kaid nyid bang: koem gi gau, yi ngei pyo: khyoo: ri myang yu boem wa nghoid.

²¹Deingmain" da" byu yi moo: gi agi ashoeb, khyoo: ce: noem we' thoung" shau" loo wa zi anghoid. Nghoid loug we' akhyeing" ashoeb da" byu yi moo: gi yau: khe" khyoo: za: dathoung" shoug" nyid boem wa zi nghoid.

²²ASEING gi mhau, fain" da" byu yiri ngheung" nyid nghoid loug- dang: zung" bang: rigi nyang: vho: ngei nyid.

²³Nheigloem: vi" sho' myang kaid bang: gi nyangnu" se' da" khyoo: ri yhoem" to". Nghoid loug we' koopyoid joem gi nyangnu" koo" da" khyoo: ri tid fu" nyid.

²⁴Moo" yoem: kaid zei: khyoo: gi- nang ri yoem: so' byid: wa nghoid- Nei" nyid da" khyoo: koem gi nang ri join, bue" loo" nhang: wa nghoid.

²⁵Myidmyo: nyid da" khyoo: gi re" da" ngei pyo: khyoo: ri yo" lhu: phyo' pyam byid: wa nghoid- nghoid loug we' nheig khyeug shoomyen: da" dang: khoin" thui: gi nang ri yi noug soem" si yo" bui" nhang: wa nghoid.

²⁶Deing: byeung" da" byu yigi nya: byencang" phoo ri khyoo: shed nyid. Nghoid loug we' akhyeing" ashoeb bang: da" khyoo: koem gi nyangnu" da" bidnoem yiri khyoo: shu" vhang: lo.

²⁷Nang nei" su: nghoid rigi nang cang sho: yen" zi khanham we' yo" yu wa zi anghoid- nghoid loug we' nang yoem: se' kaid su: nghoid rigi agyid asoo: myoo" sho' yo" yu wa zi nghoid.

²⁸Deing byeung" da" khyoo: gi kangso' dei nyid nhang: da" khyoo: nghoid wigi akhyeing ashoeb da" khyoo: gi shid: loo" nhang: da" khyoo: nghoid nyid.