Read Lashi DANG: ZHOEM 13 Bible Online

DANG: ZHOEM 13 - Lashi bible

DANG: ZHOEM 13

¹Phajhi" bo da" zoo shang: gi nya: phoo wigi nyang: ri tid poin" tid kyeung" nyid uri nheigloem: zung" zung" tam" gyo: nyid. Nghoid loug we' nheigloem: nghoid boin: nyid da" zooshang: gi nyang: shoid khyoo: ri khanham we' ase' yhen: yu.

²Byu gi yigi nyangnu" tid sang: da" khoin" thui: yoomo coung" nghei ngi: shab jhungshug shoug" kham: yu boem- nghoid loug we'-fain" zoo: mhoug zo: nyid mo, koem gi lhoid zoo: fain" zoo: wa da" khyoo: ri za: zooyoid gyid shed yhang: ti"- dayoid, shed nyid boem ago".

³Nang tid nyid da" dang: ri lhed zed" lho: wigi nanya: kangso' ri goem loem byid: nyid we'. Asoin: yu" loo: tid sang: da" dang: gi nya: gung ri nyang: lhu: phyo' pyam nyid.

⁴Nei" da" byu yigi da ja: ja: ri gye" myid vho: nyid nghoid loug- hau: ziri nyang: gi khanham we' yo" yu wa zi anghoid. Yoem: kaid thoug shang" nyid su: koem gi nyang: vho: nyid khyoo: ce" noem, ri we' shoug" yu wa zi nghoid.

⁵Deingmain" bang: gi mhau, fain" da" dang: ri ngheung" ago". Akhyeing" ashoeb, bang: da" dang: thui: gi asho' ashid: nghoid ziyo' phoug" yoid, zi shoug" nyid.

⁶Deingmain" khyoo: gi yooboo adab, bang: ri lhoug zung" goem loem byid: nyid. Akhyeing" ashoeb da" khyoo: gi- yooboo yoo" bang: da" byid gyo" soem" joem: lo" khyoo: nghoid nyid.

⁷Byu dayham" bang: gi gye" yoo" su: ti" ti" nyid boem nghoid loug- nyangnu" ci" we' ayoo" nghoid ago- byu dayham" gi gye" sho" jhen: su: ti" nyid nghoid loug we' agyid asoo: myoo" sho' ri seung: ci: ago".

⁸Yoo" zoo: su: gi nya: ngei sheing: yo' nyang: ri yo" khyoid yu nghoid loug we asho" ajhen: da" byu yi koem gi hang" wigi we' kyug nhain' da" khyoo: ajo.

⁹Deing: byeung" bang: gi doug bang da" bidbang yhang: ti" nghoid nyid wigi akhyeing" ashoeb bang: gi lid hau, wigi shid: loo" soin' da" myi bung: yo' du nyid.

¹⁰Nheigloem: myhang: lho: nghoid boin: da" khyoo: gi kyi" khyeug khyoo: mo lid lho: ce" noem we' yo" ze" bue" khyoo: ajo. Phajhi" jhau" byid: su: gi phajhi" je" si' su: nghoid.

¹¹Re" da" jonu" ri nang gye" lei khyo" yo" yu lang" gye" myab, khyo" hau: ziri ze" soem" pyam wa nghoid. Gye" yoem: kaid zoore" sho: zheung" da" jonu" gi nang moo: je" myo: tham: loo wa.

¹²Nheig byu jang: thang byoug ri nheigloem: ri khyau" pyam byid: zi shoug" nghoid loug we' nheig byu to" ziyo' dakhyoo" ti" bue" lo da uri nang ri gau yi da" nheigloem: yo' byeung" loo nhang:.

¹³Nang gi re" da" phajhi" byid: dang: ri to' myhed pyam, nghoid rigi yau: khe" kyi" khyeug khyoo: ri shoug" wa nghoid. Nang hau: jang" moo: cang lo" nghoid ri koem gi nang gau: nyu: nyid wa zi nghoid.

¹⁴Phajhi" boo su: da" jhau" mho' dang: gi kangso' gyid bug nghoid. Hau: zigi re" da" kangso' soem" loo" wa ci, ca" lo da" uri nang ri yo" khyoid yu wa zi nghoid.

¹⁵Vhu" nug gi mo, gi phau" myang: ziri shoug" kham: yu nyid boem- nghoid loug we' loem age" bang: gi byo, yoin" da" khyoo: moo: dayhe: lo" nyid boem.

¹⁶Phyiri: phala: da" nheigloem: boo bang: gi nyangnu" moo" azei: shed" loo" shi" uri khanham we' myid soin: yu" nyid ago". Nghoid loug we' akoo" afang: bang: koem gi nyangnu" asi, aboin: da" khyoo: ri tid fu" nyid boem ago".

¹⁷Loem age da" lagyoo: yigi yau: khe" kyi" khyeug khyoo: ri ze" bui" nhang: nyid. Nghoid loug we' loem ge" da" byu yi koem gi ngei pyo: myenjham" khyoo: ri ze" bui" byid: nyid.

¹⁸Jhau" mho' byid: ziri anau, kham: yu su: gi asho" ajhen: asho' ashid: zi thoung" shoug" wa nghoid- so, nyheung khyoo" shed dang: ri tam" gyoo: su: koem gi phau" myang: khyoo: ri shoug" kham: yu wa zi nghoid nyid.

¹⁹Nang myid vho: khyoo: ri shoug" kham: yu zigi ge lho khyoo: nghoid. Ko" fang: da" byu yigi akhyeing" da" moo" zoo" mo doem lheung: loo wa shid re" ngeug pyam nyid boem.

²⁰Phajhi" boo su: yo' zoem" khau: nyid we' houg: lang" nang phajhi" bo loo wa nghoid. Nghoid loug we' ko" fang: da" byu yo' nang bidnoem koid nghoid rigi nang byo, yoin" lo" zi shoug" wa nghoid.

²¹Yau: khe: kyi" khyeug khyoo: gi yooboo dab, mo, da" joyoo khang" moo" moo: dacang lo nyid. Nghoid loug we' deing: byeung" da" byu yi jang" moo: koem gi ge da" khyoo: joem yo' phoug" tab, ngi: byid: da" khyoo: joem dacang lo nyid.

²²Byu gi yigi nya: myid: nya: zoo: yi shid re" jonu" young: too" byid: khoo, wa nghoid. Nghoid loug we' yooboo dab, mo, da" jonu" koem gi deing: byeung" da" byu yi jhang khyoo: ju" loo wa nghoid nyid.

²³Shivoo: asho" da" myidjang gi sho" jhen: mo, shid re" zoo: noem, myoo" sho' yo" zei: loo nhang:. Nghoid loug we' adeing amain" da" byu yi koem gi hau: yoothung" ri ayo" zei: loo: sho' toem, pyam, byid.

²⁴Re" zoo: ri nang ashen" yhen nghoid rigi nang nyang: ri jheddab nyid zi anghoid- nang nyang: ri jheddab nyid nghoid rigi nyang: ri jhau" mho' khyoo: shed nyid wa zi nghoid.

²⁵Deing: byeung" da" byu yigi gyi: sho' shoug" zo: nyid. Nghoid loug we' akhyeing" ashoeb bang gi khanham we' zooyoid, gyid dashed nyid ago".