Read Lashi DANG: ZHOEM 14 Bible Online

DANG: ZHOEM 14 - Lashi bible

DANG: ZHOEM 14

¹Myiyi: yi da" phajhi" juyhi: yo'-yhoem: ri zhoug too" nghoid loug we'-ko" fang: da" khyoo: gi hau: yhoem: ri lhu: phyo' sain" pyam nyid.

²Nheigloem: dain dain nyid su: gi ASEING ri gyoug phau" nyid su: nghoid bye:- adeing amain" khyo" nyid zigi Mangsoo ri aphoug" amyang: su: nghoid.

³Ko" fang: su: da" nghoid boin: phau: khuang khyoo: gi dang: gye" tid nyid. Nghoid loug we' phajhi" boo su: da" dang: khoin" thui: gi nyang: ri goem loem byid: nyid.

⁴Yoo phoug da" nujung joem anyid nghoid rigi re" gug jhi: gi akoem: za: nghoid wa. Nghoid loug we' hau: nujung loo: joem yoomo gug jhi: moo: gug shi" joem yo' byeung" jo, wa nghoid.

⁵Loem ge" da" sagse: phoo gi deingmain" da" khyoo: ri khanham we' datid nyid. Nghoid loug we' loem agi" su: gi mhau, fain" da" dang: mo lid lho: gootu: ci" we' ase' tid.

⁶Nghoid boin: da" byu yigi khanham we' phajhi" bo byu age bui"- nghoid loug we' lasi phajhi" bo da" byu yi koem gi- phajhi" ri lei za: yo" jhau" yu nyid.

⁷Ko" fang: nyid mo, jang" mo vi: moo: nyid we' nyangnu" gi nang ri jhau" byid: wa zi ci" we' ayoo.

⁸Ci: yoomo si su: jhang: su: gi phajhi" bo nyid lha". Khasu" wim gari nyang: zei: eung: da" moo" zoo" ri nyang: se' nyid yoomo nghoid. Ajoeb, abyeung" da" byu yigi ciyoomo ko" fang: nyid boem lha". Khasu" wim ga: ri nyang: gye" si' boin: nyid yoomo nghoid.

⁹Byugang: yi gi yooboo koid nyid boem nghoid loug we' hau: ziri" cishu: anhang: nghoid ago". Nghoid loug we' byu gi yi koem gi yooboo khyoid pyam, byid: zi shoug" wa vho: nyid ago".

¹⁰Re" da" gau, yi khyoo: gi: nanya: shid re" nghoid- re" nheig koug sho" jhen: khyoo: we' nanya: shid mo nghoid. Hang" we' hau: ziri: re" yo: vang gam yu pyam byid: wa zi anghoid.

¹¹Akhyeung" su: da" yhoem: ikoin deungkhu: gi byo, yoin" loo: wa nghoid- Nghoid sho' loug we' byugi yi da" yhoem: ikoin deungkhu: koem gi geung: teung jo, wa zi nghoid.

¹²Deingmain" bye:” ga: nang myid soin: nyid khyoo: khaid gi nang ri moovo moug: khyoo: shu" yhe: loo" se' nyid.

¹³Yi foo: khyo' da" khyoo: moo koug shu: khyoo: gi: gau" loung" jo, se' nyid gau yi khyoo: thang byug lang" gi- koug khyoo: gi khanham we' houg: moo: jo, nyid.

¹⁴Byugang yigi nyangnu" yo' moin: yi" ziyo' dakhyoo" ti"- shoug" kham: yu wa zi nghoid. Byugi yi we' nyangnu" zei: to" ziyo' dakhyoo" ti"- aphoug" ri shoug" kham: yu boem wa nghoid.

¹⁵Byugang: gi: ce" ja: ri: we' loem" nyid wa zi nghoid- phyiri: phala: da" byu yigi nyang: thoid ce" lo" da" khoobyi ri: lhed zed" nyid.

¹⁶Phajhi" boo su: gi yau: khe" kyi" khyeug ashoug" sho' lhed zed" nyid. Nghoid loug we' ko" da" byugang: koem gi alhid azed" ziyo' ahain: akhyoid za: dakoid nyid.

¹⁷Nheigloem: leung" su: gi koomoo" ri zei: nyid Phajhi" je" si' su: gi sam zoo: danyid nyid da:.

¹⁸Lasi phajhi" abo, da" byu yigi nheig agyeung: da" ziyo' moin: yi" aphoug" ri" shoug" yu ago". Nghoid loug we' yeug da" byu yi koem gi lasi laleug jhungshug ri shoug" yu ago".

¹⁹Akhyeing" ashoeb, da" byu yigi deingmain" da" byu yi shidkhoin" moo shoug" goeb, pid boem wa nghoid- khyo' nyhoem: zoore"- nyangnu" ri nheing khyeug wa khyoo: ri mho' ago".

²⁰Asho" ajhen: da" byu yiri gi nya: yhoem: kyoo" cang" za: anghoid hang" we' avhoo: nghoid ago". Nghoid loug we' yoo" su: di su: koem gi bidnoem seing" cang" myoo" sho' yo.

²¹Ngilho' khyoo: ri nang vho: ngei nghoid rigi asho" ajhen: su: ri nang nheig khyeug we'. Hang" ri nghoid loug we' aphoug" akhyoid koid khyoo: gi yooboo nghoid nyid.

²²Nang ge da" moo" riza: zei: nyid nghoid rigi byu gooji yi da" loem khau: khyoo: yo' phau" myang: khyoo: ri nang shoug" kham: yu wa zi nghoid. Nang akhyeung" da" moo" ri dazei: nyid nghoid rigi nang shoid abye:.

²³Moo" ri zei: nyid we' re" voem: gyi: wa nghoid- nang agoin: zhoung: jo, lho: dang: za: datid nyid nghoid rigi asho" ajhen: khyoo: za: shoug: loo wa nghoid.

²⁴Phajhi" bo da" byu yigi jonu" yo' coung" nghei ngi: shab ziri shoug" kham: yu nyid. Nghoid loug we' ko" fang: da" byu yigi nyangnu" da" ko" fang: da" khyoo: moo: myonhoo: sho: nyid ago".

²⁵Nyang: gi deungmain" da" dang: tid nyid nghoid rigi hau: sagse: dang: gi kangso' ri khyoid yu nyid. Mhau fain" da" dang: ri tid nyid nghoid ri koem gi nyang: gi subi" ri mhau, fain" nyid su: nghoid.

²⁶ASEING ri gyoug phau" nyid da" khyoo: gi nya: ikoin deungkhu: byu yi yo' nya: shid re" loem khed" khyoo: yo' gau: yi khyoo: ri byid: nyid.

²⁷Nang gi shid: gyoin, noogyoin, ri jang" pyam, nau la". ASEING ri gyoug phau" nyid we'. Hau: zigi: kangso' gyid bug nghoid.

²⁸Khokham pho, da" gyi: sheung: reung: thang khyoo: gi Nyang: vhoebkhang" nyid da" mung" byu yi anyid- nyang: gi akoem: za: danghoid nyid.

²⁹Nang sam' zoo: tam" to" nghoid rigi nang phajhi" boo su: nghoid loug we' nang nheigloem: nge" loung nyid nghoid rigi nang khayhi' ko" fang: khyoo: ri za: toin" shed nyid khyoo: nghoid.

³⁰Ngei pyoo: myenjham" za: se' nyid da" nheigloem: gi gung du: ri yang" zain" nhang: nyid nghoid loug we' noo" zo: da" nheigloem: koem gi mung yhang: ti" nghoid nyid.

³¹Ashoug" ajhen: bang: ri nang doin: zeig zo: nghoid rigi nyangnu" ri: phain" so: to" Mangsoo ri nang aphoug" akhyoid koid nyid khyoo: nghoid- nghoid loug we' asho" ajhen: bang: ri nheig khyeug da" nheigloem: yo" toin" shed su: koem gi ASEING ri noku coung" nghei da" aved nghoid nyid.

³²Athoug" akhyoug: da" byu yigi nyangnu" da" akhyeung" moo" zoo" joem khyo" wigi nyangnu" nya: da" joem: lo" khyoo: ri koid nyid ago". Byugi yi koem gi nyangnu" deing: byeung" moo" zoo" wigi nyangnu" ri goem loem byid: zi shoug" nyid ago".

³³Phajhi" juyhi: gi phug soo" lheig se' myid yu" bang: da- myid soin: khyoo: dangain" moo: bo jo. Byugang: yigi phajhi" juyhi: khyoo: ga: ziri ci" we' ase' gyoo: nghoid ago".

³⁴Deingmain" khyoo: gi mungdain: ri gyi: sheung: loo nhang: nyid. yooboo khyoo: gi khayhang: te" da" mungdain: ri we' sho' thu nhang: nyid

³⁵Khokham yigi koung rhe, da- mung" vhoeb zoug: yiri vho: nyid nghoid loug we' moo" a oung: da" zoug: yi rigi shen" yhen dam kaid nyid.