Read Lashi DANG: ZHOEM 15 Bible Online

DANG: ZHOEM 15 - Lashi bible

DANG: ZHOEM 15

¹Nu" nham' khyo" phoug tid da" dang: gi nheig yo: khyoo: ri jham" loo" nhang: nyid nghoid loug we' athoug" akhyoug: da" dang: tid su: gi nheig yo: khyoo: ri lhu: noug" byid: nyid.

²Phajhi" boo bang: dang: tid kaid ri nyangnu" gi lasi phajhi" ri gyo: ngei tung" se' tid ago". Byugang: yi koem gi ce" akhyoo" abo da" dang: ri tid shoin" nyid ago".

³ASEING gi joyoo khyi, khang" moo" moo cibue" nyid khyoo: ri myang nyid gu nghoid. Nyang: zei: da" moo" gi: ge age ziri nyang: yu" zung" nyid.

⁴Nheig khyeug shoo" myen: da" dang: gi kangso' nghoid nyid. Athoug" akhyoug: tid nyid da" dang: gi nanya: nheigloem: soozoo: ri byo, yoin" loo" nhang: nyid.

⁵Re" pho, da" jhoug" myeing" ri akham: yu khyoo: gi nang ko" fang: da" khyoo: nghoid. Nya: da" khyoo: shed jhau" mho' dang: ri: kham: yu zigi phajhi" bo da" khyoo: nghoid.

⁶Deing: byeung" da" byu yigi nyangnu" da" jonu" ri zheung" young: to". Nghoid loug we' akhyeing" ashoeb, da" byu yi koem gi yau: khe" kyi" khyeug shau" da" uri nyangnu" jonu" joem ri ci: phyug pyam boem ago".

⁷Lasi, laleug gi byugang: yi jang" mo yo" yu wa zi anghoid. Ung: yeig phajhi" boo mo, jang" mo pyoo: byid: nyid.

⁸ASEING gi byu gi yi akyu" mho' dang: ri vho: ngei nyid. Nghoid loug we' tarha" aci: bang: ci: re" da" xoin" du: joem ri nyang: gi ngheung" nyid.

⁹Akhyeung" byu yi da" nyid yab khyoo: ri ASEING ngheung" nyid. Nghoid loug we'-deingmain" da" moo" zei: bang: ri nyang: jheddab.

¹⁰Shoid vhang: da" moo" ri nang zei: nyid nghoid rigi atho' tid da" shen" yhen khyoo: ri nang thoung" shoug" wa zi nghoid. Nanya: gung du: nyang:- khyoo: shed jhau" mho' ziri akham: yu nghoid rigi nang gi shid: loo" wa zi nghoid.

¹¹Moovo moug" lang" ri hau: joyoo moo: cijo, ziri ASEING ri asi, loo: sho' ayo" nghoeb too" nghoid da:.

¹²Nghoid boin: da" byu yigi khyoo" shed jhau" mho' khyoo: ri avhoo: nghoid ago". Nyangnu" gi phajhi" je boo mo, da" phajhi" byid: da" dang: ri khanham we' amho' yu" nghoid ago".

¹³Subi" gi gau, yi ngei pyo: nyid uri nyangnu: yi noug soem" si nghoid nyid goo" loug we' nyangnu" koug shu: zi thoug" shoug" nyid da" uri nyangnu" myonhoo: moo: nheigloem: gyau: jo, da" aved ri myang.

¹⁴Lasi phajhi" gi bang: gi jhau" mho' yu wa shid re" vho: ngei nyid ago". Nghoid loug we' nheig agyeung: da" byu yigi ci" asi, aboin: khyoo: moo: nheing deug nyid ago".

¹⁵Asho" ajhen: su: da" kangso' gyung: khyoo: gi khanham we' thoug shang" yoem: kaid nyid ca" nghoid loug we' ngei pyo: nyid bang: koem gi khanham we' pyoo" pyoo: za: shoug" nyid boem ago".

¹⁶Sho" jhen kham' lho: ASEING ri gyoug phau" nyid da" khyoo: gi yo" de, lho: kyi" khyeug shoug" nyid tho' re" je ge nyid.

¹⁷Nang yo' jheddab go" byu yi yo' dage- nghang" pho nyoug yu: zo: zigi ngheing" go" nyid da" joyoo moo ngham" thang da" shoo" shoug" zo: nyid tho' moo: je ge nyid.

¹⁸Nheigloem: nge" loung nheig yo: khyoo: gi myeing" myoo: yhoo: she: khyoo: joem ri bui" nhang: nyid. kham' zeung: khyoo: gi: ngei pyo: myenjham" khyoo: joem ri byid: nyid.

¹⁹Nang nei" nyid su: nghoid rigi yau: khe" kyi" khyeug khyoo: khyi khang" moo: moo nang thoung" shoug" wa. Nghoid loug we' nang nheigloem: dain: su: nghoid ri loem gi yau: khe" kyi" khyeug khyoo: nang thoung" shoug" wa zi angoid.

²⁰Phajhi" bo da" zooshang: gi- nya: phoo ri goug nhang: nyid, Byugang: zoo: gi nya myhi' ri aphoug" akhyoid koid nyid.

²¹Nheig agyeung: da" byu yigi nyangnu" byugang: koid khyoo: moo: gau yi nyid boem ago". Nghoid loug we' phajhi" boo su: gi deingmain" da" moo" ri zei: wa zi nghoid.

²²Phajhi" byid: da" khyoo: dangain" ziri nang yo" kham: yu yhi' kham: yu nyid we'. Hougsu" lang" gi nang oung: doid loo" wa zi nghoid- Hau: khyoo: joem ri nang ayo" kham: yu nghoid rigi nang soem" joem: gyo" loo" wa zi nghoid.

²³Nya: ayo, yo' du eung: da" dang: ri se' tid zigi khayhi' gau yi joyoo nghoid nyid lha".

²⁴Phajhi" bo da" byu yigi moovo moug: khyoo: khyang: da" khyoo: moo: agyo" loo" loo: za: kangso' dei da" khyoo: moo: so" do' lo" nyid.

²⁵ASEING gi nghoid boin: nyid mo, da" yhoem: joem ri lhu: phyo' pyam byid: nyid. Nghoid loug we' cougmoo" myhi' da" jonu" joem rikoem gi goem loem byid: nyid wa zi nghoid.

²⁶ASEING gi akhyeing" ashoeb khyo" myid soin: khyoo: ri ngheung" nyid. Nghoid loug we' ngei pyo: dang: tid ziri loem gi nyang: vho: ngei nyid.

²⁷Atu" amyaid ri adeing amain" khyo" sho: yoem: kaid nyid khyoo: gi re" yhoem: byu yi moo: yau: khe" kyi" khyeug shau" loo wa nghoid. Khougvhoid jhungshug ayu zo: rigi nang kang: sheing" wa zi nghoid.

²⁸Byugi yigi nyangnu" dang: ci: aphoug tid shi" ri xang: shed" myid shi" damyid yu" nyid ago". Akhyeung" da" byu yi loem gi dang: phyed za: phoug tu" wigi hau: zigi yau: khe" khyoo: bui" nhang: nyid.

²⁹Byugi yi akyu" mho' da" uri ASEING gi: tam" gyo: nyid. Nghoid loug we' akhyeung" bang: da" akyu" mho' da" dang: ri koem gi ci: asoin: byid: nghoid da:.

³⁰Yizoo: byoem: da" myonhoo: gi nang ri ngei pyoo: nhang: wigi ge da" lu dang: gi nang ri: je gau yi nhang: nyid.

³¹Nang gi jhau" mho' ziri kham: yu wigi tam" gyo: da" byu nghoid rigi nang gi phajhi" boo su: nghoid nyid.

³²Jhau" mho' da" dang: ri nang atam" gyo: nghoid rigi Hau: zigi re" da" gung du: ri noo nhang: nyid zi nghoid- khyoo" shed, jhoug" myeing" dang: ri nang lhoem: kham: yu nghoid rigi phajhi" gye" bo da" byu nang bue" loo wa nghoid.

³³ASEING ri gyoug phau" khyoo: gi phajhi" nyang: nghoid bye:. Nang coung" nghei ngi: shab khyoo: yo" yu noug su: nghoid rigi nheigloem: khyo' nyhoem: lho: nyid we'.