Read Lashi DANG: ZHOEM 18 Bible Online

DANG: ZHOEM 18 - Lashi bible

DANG: ZHOEM 18

¹Subi" yo' aveing" goo" mo, gi nyangnu" nya: khyoo: ri za: myid mo, nghoid ago". Nyangnu" gi subi" myoo" sho' mo, jo: ga: tid ziri abo veing" nghoid ago".

²Byugang: yigi cise, gyo: ase' gyo: ga: ziri cishu: anhang:- nyang: khayhi' bue" ein: ziri za: toin" shed nau nyid.

³Yooboo yo' asho' ashid: khyoo: gi dage" yhe: lo" nyid phoug" tab, ngi: byid: khyoo: ri ci: lheug kaid lang" gi hau: gung khoo: coem juang" yi zi shau" boem wa nghoid.

⁴Byu dayoug da" dang: khoin" joem gi Nammugdara yhang: ti" no, lho:- yau nyid da" gyid zoo: lang yhang: ti" gyeung: da- phajhi" juyhi: da" apoem: ayang: ge bue" nyid.

⁵Tarha" nyeung veung" da" khyoo: moo yooboo ayoo" su: ri soem" loo" nhang: lho: yooboo yoo" su: ri myonhoo: byid: khyoo: gi ajoo nghoid da:.

⁶Byugang: gi ngeug se: shed" lo rigi nyang: voosi" dam, mho' nyid zi nghoid.

⁷Byugang: gi dang: ji nyid ri nyang: nya: gung ri phyo' shoin, nyid zi nghoid da:. Nya: dang: khoin" lhid moo: nyang: myi" wa zi nghoid.

⁸Sube" gei sang: zigi gye" ngham"- hau: zigi ngoonu" khayhi' ju" sho' myhau: kaid nau lha".

⁹Byunei" gi phyo' shoin su: yo' dakhyoo" ti"- agi su: nghoid nyid.

¹⁰ASEING gi geung: teung da" gyipyu, zung nghoid- Hougmoo: deingmain" mo, yo' yhe: lho: goug: nyu: tung" yo" khau: nyid ago".

¹¹Yoo" mo, di mo, gi nyangnu" yo" da" jonu" joem yo' nyangnu" gi voomoo" ri lheung khoem, to" da" khyam: vang" yo' dakhyoo" ti" goem coung" byid: loo wa nghoid ga: tid ago".

¹²Nheigloem: akhyoo' su: ri hang" we' aphoug"- nghoid boin: mo, gi byo, yoin" lo" khyoo: moo: nyid ago".

¹³Aphoug tu" shi" ri tam" gyoo: we'- hougsu" ase' koid ri nang gi nheig agyeung: ziyo' nanya: gung ri sho thu nhang: nyid zi nghoid.

¹⁴Nang no nyid ri kangso' dei nyid nau da" nheigloem: gi nang ri yo" ge yang" loem" loo nhang: wa. Nang hau: ziri ci: phyug pyam nghoid rikoem gi re" nheig byu khyoo: gi bei: byug wa.

¹⁵Vhu" nug gi mo, gi khanham we' so, kho' tung" jhau" yu wa ga: jen" jen" nyang: nghoid boem ago".

¹⁶yhouggyen: da" byu dayug yo' nang yhe: shoug" goo" nau la". Nya: shid re" jhungshug ci: yhi: we' houg: lang" lei lei xi xi bue" loo wa nghoid.

¹⁷Tarha" yung" moo: nya: ri thougtheung ngeig su: dang: myid: amyed: myid: gi xang: shed" tid su: dang: ri jo ga: jho: nyid ago".

¹⁸Tarha: yung" moo: suyen" eig yug moo" daloem: tid go" ri hau: moo" ri phid baid khyo" ge tam" loo" nhang:.

¹⁹Re" mang: nhung" phoo ri pang" thoug we'-nang ri nyangnu" gi geung: jo, da" voogung vang khyam: yhang: ti" coung: goem' byid: loo wa nghoid. Nyang: yo' dabyo, go" nyid nghoid rikoem gi nyang: gi nang ri khoem" lhoem: dain" pyam wa nghoid.

²⁰Nang tid thu' kaid da" dang: thui: khyo" bue" lo khyoo: dangain" jang" moo nang kang: so' shoug" dei nyid wa zi nghoid.

²¹Nang tid thu kaid da" dang: gi kang: so' ri yo" dei nyid nhang: ziyo' dakhyoo" ti"- yo" shid: loo" nhang: nyid. Houg: yoomo re" da" dang: khoin" thui: gang mo bue" lo khyoo: dangain" ri kham: yu ca" nyid.

²²Yhoem: seing: myhi' shoug" yu rigi ge zi shoug" yu khyoo: nghoid nyid. Hau: zigi ASEING nang ri gi koid byid: zi nghoid.

²³Myung shoo" su: dang: tid rigi nyang: gi mho' nyhoem: khyo" yen, yoo" tung" tid nyid da- yoo" su: di su: koem gi akyung: akhyi" ga: phoug tu" nyid da:.

²⁴Bid noem dayham" gi myang" sho' akham' nghoid ago". Nghoid loug we' bidnoem dayham" gi co' xo' mang: nhung" yi tho' moo: je ge nyid ago".