Read Lashi DANG: ZHOEM 19 Bible Online

DANG: ZHOEM 19 - Lashi bible

DANG: ZHOEM 19

¹Mhoug foeb, koopyoid bui wa tho' re" gi nheigloem: dain: lho: wigi myoung sho" jhen: nyid zigi: je ge nyid.

²Lasi, laleug phajhi" aboo loo za: nheigloem: to" zi agi- nheigloem: leung" zigi yau: khe" khyoo: shoug" wa nghoid.

³Byu dayham" gi nyangnu" da" athoung" akhyau: lo, moo" khyo" wigi byo, yoin" loo" nhang: nyid ago". Hau: lho: ASEING ri yooboo zhoug nyid boem ago".

⁴Yoo" mo, di mo, gi khanham we' bidnoem aseig ri sho: nyid ago". Myung mo, koem gi nyangnu" yo" da" bidnoem dajhi za: ziri lang" ayo" zoem: too" nghoid ago".

⁵Tarha" yung" moo: nang mhau, tid nghoid rigi yooboo dam byid: zi shoug" wa nghoid- hougmoo: lhoid pyoin khyoo: jo, zi anghoid.

⁶yhouggyen: da" byu yi wigi myonhoo: byid: yu zi shoug" wa shid re" yugkhang" moo" yoem: kaid ago"- myonhoo: byid: su: yo' yugkhang" moo" bidnoem koid nyid boem.

⁷Sho" jhen: su: rigi nya: mang: nya nhung" yi lang" cishu: anhang: nghoid nyid ago- nyangnu" bidnoem ayo" zigi ce: moug" cang aboo. Nyangnu" khayhi' yoem: kaid loug bidnoem age yoo.

⁸Yo" jhau" ju yhi' phajhi" yu wigi nanya: gung ri jheddab nyid we' hau: lho: nang shoug" yu bye: gu: ri xoem" ci: ri gyi: sheung: oung: doid loo" wa zi nghoid.

⁹Tarha" yung" moo: mhau, tid su: hang" nghoid loug we' yooboo dam age loid wa nyang: gi joem: lo" byug wa nghoid.

¹⁰Byugang: yigi nghoid boin: langi: khyo" nyid wa zigi aeung: nghoid da- join yigi byu zeing yi tho' moo: vhoebkhang" wa aeung: nghoid da:.

¹¹Nang vhuloem khyid: thang: se' myid yu" su: nghoid rigi nanya: nheig yo: khyoo: ri yo" khang" ung: wa zi nghoid. Dayug youg wigi age zi re" koid ri asi, goin' koid pyam, zigi gyi: thang da" ge khyoo: nghoid.

¹²Khokham nheig joem: yo: zigi khang khyi myeung ziyo' du nyid. Nyang: pang" thoug byid: zi koem gi ca" nyid uri vo, da" moug: gyid yo' du nyid.

¹³Nheig agyeung" da" yug gi zoo: gi- nya: phoo, ri joem: loo" nhang: nyid. Myeing" myo: da" myhi' zeing gi dazo, zo, yau gyo" nyid da" gyid yo' du nyid.

¹⁴Byu dayug gi yhoem: yo' ngei ri nya: myhi' pho, lo, mo shoug" seung: yu da- nghoid loug we' nheig bo da" yhoem: seing: myhi' ri yo" byid" su: gi ASEING za: danghoid.

¹⁵Nang nau rigi nei" nyid we' yhoeb za: lho: dayhoeb, jo, we' nang zooyoid zi shau" loo wa nghoid.

¹⁶Mangso tarha" cang nghoid ri: nang kang: sheing: wa hau: ziri nang cishu: anhang: nghoid rigi nang shid: loo" wa.

¹⁷Myung mo, ri: byid: zigi ASEING ri jhid" byid: ziyo' du nyid. ASEING gi nang ri doem tau" xab, byid: loo wa zi nghoid.

¹⁸Re" da" zoo: yiri: jhau" yu gi, shi"- da" ayo, moo: jhau" byid: we' Hougsu" ajhoug ” shed nghoid rigi nyangnu" nya: gung ri lhu: phyo' wa shid re" yoem: byid: nyid su: nang nghoid.

¹⁹Byu dayug gi nheig khoo" yo: nyid nghoid rigi hau: da" aphoug" yooboo dam gi nyang: ri kham' zoo: nhang: we'. Nyang: ri yau: khe" khyoo: mo dalheing: khyoid yu nghoid rigi dalheing: doem khyoid yu ca" loo wa nghoid.

²⁰Phajhi" byid: da" dang: ri jhau" yu nau lho: tam" gyo: nghoid rigi danyid" nyid" ri phajhi" ju, yhi: boo su: bue" loo wa nghoid.

²¹Xangsu: byu yigi ja: khang" moo" ri myoo" sho' soin' nyheung too: nghoid loug we' ASEING myid vho: khyoo: za: dabue" loo wa nghoid.

²²So, kho' myo, no, da" khyoo: gi myonhoo: shoem: loo" wa khyoo: za: nghoid mhoug su: bui" wa shid re" gi myoung sho" zi je ge nyid.

²³ASEING da" dang: ri tam" gyoo: we' Houg: lang" nang kang: sheing: wa nghoid. Dam loem wa jang" mo, nheugshid: ziyo' loid byoin gau: nyu: khyoo: shoug" wa zi nghoid.

²⁴Byu dayham" gi nyang: nya: nhoid khoug: khyoo zoo: noem koid: kaid wa zilang" gye" nei" mo, nghoid nyid ago".

²⁵Nghoid boin: nyid mo, rigi yooboo dam byid: ca"- Houg: lang" nheig aboo, shi" mo, myang se' lho: jhau" yu boem goo" wa Nang phajhi" juyhi: bo zigi khyoo" shed, jhau" nyid uri kham: yu boem wa zi nghoid.

²⁶Sho' asi su: yo' apoug" akhyoid koid su: za: nya: phoo ri athoug" akhyoug: koid lho: nya: myhi' ri yhoem: mo khaid thu' pyam, loo wa zi nghoid.

²⁷Nga" zoo: we" jhau" kham: yu khyoo: ri no: pyam, lang" gi nang se' too" bye: gu: ri we' cishu: anhang: she: pyam, loo wa nghoid.

²⁸Sagse: gi byu dayug yug ri noo nhang: wa ga: myid soin: nyid rigi hau: jang" moo: tarha" nyeung veung" khyoo: aboo- akhyeing" ashoeb, bang: gi akhyeing: ashoeb, da" main' ri vho: ngei nyid boem ago".

²⁹Nghoid boin: da" byugang: yigi deing" deing nya: voosi" dam shoug" loem zo: boem wa zi nghoid.