Read Lashi DANG: ZHOEM 21 Bible Online

DANG: ZHOEM 21 - Lashi bible

DANG: ZHOEM 21

¹ASEING gi gyid lang ri khang" nyid ziyo' dakhyoo" ti" khokham nheigloem: ri we' lei lei, za: khang" byid: nyid.

²Nang koid zi ja: khang" moo" gi joo bye: ein: nghoid loug we' nang myid da" khyoo: ri ASEING gi yu" nyheing byid: nyid ziri boin: soo" we'.

³Deingmain" ziyo' nyeung veung" khyoo: ri koid we' hau: zigi ASEING ri ngei" byid: wa xoin" du: ci: yhe: tho' re" vho: ngei nheig shed: khyoo: nghoid nyid.

⁴Akhyeing" ashoeb mo, da" nheigloem: moo: gi nghoid boin: ziyo' phau: khuang khyoo: gi vhoebkhang" nyid. Houg: gi yooboo nghoid.

⁵Goolhoo: za: soin' young too" we' houg: lang" gi nang agoin, agoo" yo" loo jo, loo wa zi nghoid. Soung hain: koid da" moo" zoo" mo gi khanham we' myoo: sho' ashau" yu wa.

⁶Nang adeingmain" khyo" yo" yu to" da" jonu" joem gi amyang" ri byoug loo" khari" wa nghoid. Hau: jonu" abei: byug shi" ri shid: zoug: nhoid khyoo: nang ri shu" yhe: loo" wa zi nghoid.

⁷Akhyeing" ashoeb mo, gi nyangnu" da" athoug" akhyoug: moo" khyo" wigi joem: thang byoug lo" zi shoug" nyid boem ago- nyangnu" gi deingmain" khyoo: zei: wa shid re" dangeug pyam nyid boem ago".

⁸Yooboo yo" da" byu yigi guid" da" khyoo: moo: so" nyid ago". Yooboo ayoo" mo, gi deing: byeung" da" khyoo: ri koid nyid ago".

⁹Myeing" myo: myeung nyid da" yhoem: seing: myhi' yo, dage- yhoem: khoug: moo: nyid wa tho, re yhoemkhung: tho, moo: lo" nyid zigi je ge nyid.

¹⁰Akhyeing" ashoeb bang: gi- khanham we' akhyeing" ashoeb da" moo" koid wa zooyoid boem yhang: ti" nyangnu" gi: hang" ri we' nheig khyeug shoo" myen: khyoo: aboo nghoid ago".

¹¹Nghoid boin: su: dayug gi yooboo dam loem zo: nyid uri ase' soin: myid yu" su: lang" ri se' yu" jhau" yu nyid da:. Ung: yeig phajhi" boo su: gi nyang: ri jhau" byid: jang" mo, se' gyo: kham: yu nyid.

¹²Deing byeung" nyid da" Mangsoo gi akhyeing" ashoeb, su: da" yhoem: khoug: moo: cibue" nyid ziri myang nyid lho: nyang: gi akhyeing" ashoeb su: ri byo, yoin" loo" nhang: wa zi nghoid.

¹³Nang gi myoung shoo" su: yoid, ngau nyid ziri atam" gyoo: byid: nghoid rigi pang" thoug byid: wa shid re" nanyang: ngau yoid thui: ri hang" we' tam" gyoo: byid: wa zi anghoid.

¹⁴Byu dayug yug nang ri nheig yo: ri nang ase' khyo" byid: da" jhungshug gi nyang: ri nheig yoo: tam" loo" nhang: wa nghoid.

¹⁵Nyeung veung" deingmain" da" khyoo: koid uri byugi yigi gau, ago". Nghoid loug we' akhyeing" ashoeb, mo, gi nheigloem: thang nyid ago".

¹⁶Ge da" khyoo: mo ve: gang: loo" mo, hang" ri nghoid loug- shid: loo" no, lo" khyoo: gi dalang" nyid.

¹⁷Pyo: khyoo: sho: ziyo' yhid: shug foo" zo: koid lho: ngham" da" zoo: noem riza- vhu" vhoem" myo, no, khyoo: gi khanham we' nang ri jonu" yo" loo nhang: wa zi anghoid.

¹⁸Akhyeung" bang: gi byugi yiri phu" zoo: baja" ga: nyangnu" koid da" khyoo: moo: nyangnu" nyang: phu" zo: zi shau" boem wa nghoid.

¹⁹Gyo: ngheing" tung" ga: myeing" myo: myheung nyid da" yhoem: seing: myhi' yo' dage" nyid wa tho' re" gi dain" pyoid yoo, moo: yhe: nyid wa zigi je" ge nyid.

²⁰Ung: yeig phajhi" boo mo, gi jonu" yo" lho: wigi nyid gi nyid de nyid goo" nghoid loug we' nheig agyeung: mo, gi nyangnu" yo" da" ngei sheing: ri houg: yoo" houg: yhoung: pyam nyid ago".

²¹Nheig khyeug shoomyen: lho: nheigloem: zung" zung" za: nyid we' Houg: lang" nang kang: sheing: wa zi nghoid. Subi" gooje wigi nang ri phau" myang: lho: tarha" nyeung veung" khyo" zoem" khau: lo boem wa zi za: nghoid.

²²Yeug da" gyizoug: moo" gi yoem: bo da" gyivi, mo, lhoug zung" to" da" voomoo" ri yo" zain: oung: lho: nyangnu" khau: nghe: nyid da" vang khyam: ri we' yo" phyo' sain" pyam, nyid.

²³Nang yau: khe" khyoo: ri jang" pyam nau nghoid rigi nang tid wa dang: ri zed" lhed lho: tid sang: nyid we'.

²⁴Ngoo ri: nghoid boin: nyid da" byu dayug toin" shed ge'. Houg: ri gyo: lho: nheigloem: myhang: su- phau: khuang nyid su- ase' myid yu" da" byu dayug ngoo nanu" ri toin" shed ba.

²⁵Moo" anau, khang da" byunei" gi nyang: nya: gung du: ri said nyid zi za: nghoid.

²⁶Nyang: gi nyang: yoo nau ziri za: myid nyid Deingmain" su: koem gi yo" gam byid: lho: agoin' ayu: khanham we' dayo" gam, byid: nyid.

²⁷Akhyeing" ashoeb, mo, xoin" ngei" byid: ziri ASEING ngheung" nyid. Nyangnu" da" nheigloem: moo: age ziri myid lho: ngei" byid: xoin" ri je" ngheung" nyid.

²⁸Mhoug su: tid da" sagse: dang: ri hang" aloem"- bue" lo da" khyoo: joem ri goolhoo: za: se' myid tu' yu" su: da" dang: joem ri koem gi loem" jeung" nyid boem ago".

²⁹Deingmain" bang: gi nyangnu" nya: da" khyoo: ri goolhoo: myid loem" ci: boem. Akhyeing" ashoeb mo, koem gi ge bue" yhi' mo, nghoid goin' koid ca" nyid boem ago".

³⁰ASEING nang ri thougtheung gyi koid nghoid rigi xangsu: byu yi da" phajhi: koung yeug da" vhu" nug lasi- nheigloem: phajhi" gi nang ri ayo" pang" thoug.

³¹Nang gi gyikhaid pui" shed re" myang: joem ri yo" nyheung soin' too" nghoid loug we' oung: doid loo" nhang: su: gi ASEING za: danghoid nyid.