Read Lashi DANG: ZHOEM 22 Bible Online

DANG: ZHOEM 22 - Lashi bible

DANG: ZHOEM 22

¹Myeing gi yo' jonu" ziyoo daja: ja: ri khyen: yu ca" nghoid rigi myeing ge loem: ri khyen: yu we'.

²Myung shoo" su: yo' yoo" su: di su: du go" da" khyoo: daja: gi eig yug goin" ri ASEING phain" so: to" ga: zi nghoid.

³Aphyoo" athang: se' myid yu" bang: gi yau: khe" khyoo: ju" lo nyid da"' uri myang lho: wigi jang" pyam, boem wa zi nghoid. Amyed, yu" su: koem gi houg: khyoo: dain" za: yhe: lho: thoung" shoug" thang: ri she' nung myid yo" loo wa zi nghoid.

⁴ASEING ri phoug" tab, cang yhi: we' nheigloem: nyhoem: khyoo, we' houg: lang" gi nang yo" loo de, lo lho: phau" myang: zi shau" wigi kang: sheing: myo, myi: wa nghoid.

⁵Re" kang: so' ri jheddab nghoid rigi akhyeing" ashoeb, bang: ri myhi' yu da- lhid joem thoung: to" khyoo: mo, vi" vi: jang" pyam, nyid we'.

⁶Zooshang: ri nyang: cang ge da" khyoo: ri jhau" byid: we' Houg: lang" nyang: gi dapyaid goin" xoem" ci: wa zi nghoid.

⁷Myung shoo" bang: gi yoo" su: di su: da" join' nghoid ago".

⁸Atarha" da" myoug" shi" sain" rigi byo, yoin" lo" khyoo: youg thu' lo lho: subi" ri nang doin: zeig zo: khyoo: thang byug wa zi nghoid.

⁹Agoin' ayu: gam, byid" we' re" da" zoo: noem ri myoung shoo" bang: yo' gam zoo: goo" ge'. houg: lang" nang ri mainkaid byid: zi shoug" wa.

¹⁰Nghoid boin: su: ri keung" thu' pyam, we' houg: lang" gi ngeig go" khyoo: byo, go" khyoo:- myeing lang: lho: tid zhoo" go" khyoo: gi ajo, khari" loo: wa.

¹¹Nheigloem: phyu: young" ziyo' nu" nham' tung" ji sang: khyoo: ri jheddab nyid ri we'. Khokham gi re" da" bidnoem bue" loo wa zi nghoid nyid.

¹²Mhoug mo, da" khyoo: ri ASEING gi cishu: anhang: khyo" wigi deingmain" da" khyoo: abei abyo, sho' zoem: to" ziri ASEING myang nyid.

¹³Byunei" gi yhoem: moo: za: nyid nyang: tunggung khyoo: thu' loo" lang" gi khang khyi, lhoem: ngaid wa ga: tid nyid.

¹⁴Myi: shoid lang shoid go" khyoo: gi shoo" kuang lhid nghoid. ASEING wigi nheing yo: zi shoug" mo, gi hougmoo: myi" jo, ago".

¹⁵Zooshang: mi" gi anghoid akhuang athoug" akhyoug: khyoo: za: lhoung se' koid ago"- jhau" mho' da" voosi" koem gi nyangnu" ri goolhoo: za: se' nyid yab goo" wa shid re" jhau" shed byid: nyid.

¹⁶Nang yo" loo de, loo wa shid re" yoo" mo, ri jhungshug byid- myoug shoo" mo, ri doin: zeig zo: khyo" koid nghoid rigi nanyang: myoung shoo" su: bue" loo wa zi nghoid.

¹⁷Tam" gyoo: we' ung: yeig phajhi" boo mo, tid da" dang: ri ngoo jhau" byid: ba -nyangnu" jhau" mho' dang: ri gyo: xoem" yu we'.

¹⁸Hau: ziri nang myid xoem" ci: lho: yo" ci: yhung: nghoid rigi ngei pyo: gau yi khyoo: shoug" wa zi nghoid.

¹⁹Nang ASEING moo loem khau: nyid wa ziri ngoo myid vho: nyid. Hau: ziri akhid" nang ri ngoo tid kyoo" wa nghoid.

²⁰Ngoo gi re" shid re"-phajhi" dang: soem" xi: ja:- tid kyo" lhid" xoem" too" byid: bye:. Hougmoo: lasi laleug phajhi" joem yo' ge da" phajhi" byid: dang: khoin" joem bo nyid.

²¹Houg: mo khyoo: joem gi nang ri deingmain" da" khyoo: ga: zigi ce" noem nghoid ziri jhau" shed byid: loo wa zi nghoid. Nang ri hau: zi yhe: shoo: nhang: go" nghoid rigi nang jo da" dang: phoid: khyoo: doem yo" ci: loo wa zi nghoid.

²²Myung shoo" mo, ri yo" ung: zo: da: ein:- adoin: zeig zoo:- tarha" yung" moo: bo pang" thoug wa byu ayoo" bang: ri a-ung: zoo.

²³ASEING gi nyangnu" shoid khyo" tarha" dang: phyed lho,- houg: bang: kangso' ri kyug nhain' nyid mo, ri ASEING gi kyug nhain' loo wa zi nghoid.

²⁴Nheigloem: leung" bang: yo' athoug" akhyoug: da" byu yiri bidnoem akoid.

²⁵Nyangnu" da" leig ri yu" yu lho: hau: ziri nang gi yo" thid pyam loo: wa zi anghoid.

²⁶Gootu: da" byu dayug yug shid re" jhen: yoovoin' ri bo yu wa ein: nang dangsoo" abyid.

²⁷Nang ayo" bo xab, byid: lo: nghoid rigi nyang: gi re" da" yhoeb cuang rilang" re" yu pyam, byid: loo wa zi nghoid.

²⁸Re" da" phoug" phyid" yi zhoug to" da" mougkyoo" lugzeing xoug" ri khanham we' ashu" pyam.

²⁹Ngoo ri: ge da" moo" zei: su: dayug toin" shed we'. Houg: lang" khokham yi myoo" sho' mo, mo ge thang phoug" dab, thang re" je" gi su: ri ngoo nanu" ri toin" shed byid: wa.