Read Lashi DANG: ZHOEM 23 Bible Online

DANG: ZHOEM 23 - Lashi bible

DANG: ZHOEM 23

¹yhouggyen: da" byu dayug yo' nang voem: shoin" zo: nyid u" ri nyang: hang" nghoid ziri re" da" ung: khoug: moo: boin: re.

²Nang gye" nyang: zo: ngham" nyid da" nanya: gung ri khang" we'

³Nyang: zho" nyid da" gye" ngham" zoo: shug joem ri myo, no, so, akho, nyid. Nyang: gi nang ri phajhi" khyoug" se' nyid.

⁴Nang yo" loo de, loo wa shid re" re"' da" yoem: gyoug: sho' akoid nyid. Phajhi" juyhi: ri ci: yhoung: nyid we'.

⁵Re" da: ngei sheing: gi dung dab, lo wigi dang: phang: lo" da" zoin, bung: yo' dakhyoo" ti" myo, damyeug moo: za: thang byug se' nyid.

⁶Cen" su: da" zoo: shug pui" moo: dage" ayhe: bo zoo: nyang: zho" da" ngham" noem, zoo: shug ri: we' aso kho' nyid.

⁷Kaid lung: zoo: shi" we' ga: nyang: tid nyid nghoid loug we' nya: nheigloem: moo: gi houg: khyo" aboo. Nya: nheigloem: moo: gi nyang: kha te" yug nghoid ga: ziri myid yu" nyid.

⁸Nang bain zo: shoug thang: ri dangain" doem lab, doug thu' pyam, lho: wigi nyang: ri coung" byid: khyoo: we' akoem: za: bue" lo" byug wa zi za: nghoid nyid.

⁹Byu: gang: yiri dang: gi ayhe: tid- re" dang: ri nyang: phoug" tab, byid: wa zi anghoid.

¹⁰Kyoo" zeing xoug" ri Khokham we' age shu"- coug" zoo: nu" yi seung: da" myidjang ri we' ayhe: gab, seung: yu.

¹¹ASEING gi nyangnu" shoid khyo" yoem: so' ri: bo lhoug zung" su: nghoid. Nyang: gi coug" zoo: nu" yi da" sei: khyo" nang ri thougtheung loo wa zi nghoid.

¹²Re" da" sara: yo' saramyhi' bi" jhau" byid: da" dang: ri gyo: lho: goo" lhoo: za: xoem" ci: we'. Nang yo" jhau" yhi' jhau" yu we'.

¹³Zooshang: ri jhau" mhoo, wa shid re anhe" nyid. Ge da" voosi" wigi baid ri nyang: shid wa zi anghoid.

¹⁴Gyeing" nyang: hau: ze wigi nya: kangso' ri yo" khyoid yu wa zi nghoid nyid.

¹⁵Nga" zoo: we" nang phajhi" bo lo rigi ngoo gi gye" ngei pyoo: wa zi nghoid.

¹⁶Nang ung: yeig phajhi" dang: tid ga: ziri shau" gyo: rigi ngoo gye" shoug" phau: khuang wa zi nghoid.

¹⁷Yooboo yoo" bang: ri ayu" no" nyid re" da" pyaid moo: ASEING ri gyoug phau" khyoo: ri yhouggyen: too" we'.

¹⁸Hougsu" nghoid rigi re" da" shid vhu" mo khyoo: gi gye" younglho' nyid wa zi nghoid.

¹⁹Nga" zoo: we" tam" gyoo: we' phajhi" juyhi: bo lho: kangso' dei nyid da" khyoo: ri nyeing" zoo: myid yu" we'.

²⁰Yhid: ri gye" shoug lho: zoo: noem moo: za: vhu" vhoem" yen" mo, yo' nang azoem" khau: nyid.

²¹Yhid: ya: yi yo' zo: lid shoug lid mo, gi sho" jhen: loo" zi nghoid. Nang gi zo: lho: yhoeb- zo: lho: yhoeb za: akoid nyid.

²²Re" phoo tid nyid da" dang: khoin" joem ri tam" gyoo: we' nyang: anyid ri nang gi byu bue" loo wa zi anghoid. Re" myhi' mang: lo" ri nyang: ri jeju" boin: da" khyoo: toin" shed nyid we'.

²³Deingmain: khyoo: phajhi" juyhi: bo da" khyoo: jhau" kham: yu khyoo: joem yo' ge da" nheigloem: hau: ziri nang gu phyed lho: ung" zoo: wa ein: lang" age myid yu: sho' phoug" dab, zi nghoid.

²⁴Deingmain" su: da" nya: phoo gi gye" ngei pyo: gau, yi wa khyoo: bo jo,- phajhi" juyhi: bo da" yug gi zoo: yoomo nang myonhoo: ngilang yo" nyid.

²⁵Re" da" myhi' pho tang: ri nang yoomo myonhoo: ngi: boo nhang: nyid we'. Re" myhi' ri gau, yi nhang: nyid we'.

²⁶Nga" zoo: we" goolhoo: za: tam" gyoo: we' nga" da" byunyid byu yab da" akhyoo" ri yu" yu we'.

²⁷Shava myhi' yi yo' akyang" byo, da" myiyi: yigi said pyam wa shid mo thoung: to" da" lhid nghoid nyid.

²⁸Nyangnu" gi khyangtoug: joem yo, dakhyoo" ti" nang ri lhoem: nyid lho: yuggi myoo" sho' bang: ri dang: thang" cab, phyo' pyam, nhang: mo, nghoid nyid boem ago".

²⁹Yhid: gye" shoug lho: yhid: shoo: shoug wa ga: yoem: kaid nyid su: dayug ri toin" shed we'. Houg: lang" khanham we' yau: khe" khyoo: bui" nhang: nyid lho: khanham we' no ngau, nyid ziyo' nya: gung du: ri nyang: myid nheig koug nyid su: dayug ri nanu" ri ngoo toin" shed ba. Nya: da" myojid" loem: gi byang: byang: ne, wigi nyang: yo" jang" pyam, wa da" dam gi nyang: je dab da:.

³¹Houg: gi ni, ni, wim lho: goem' khoug: moo: lo, lo, re zi yu" shug noug toung" da" yhid: wigi nang ri ajhu, phyo' ung: nhang:.

³²Thang: nab kyoo' ri nang gi dug thain: da" lhangmyu, wigi thei" to" ziyo' dakhyoo" ti" kham' zo: loo" wa zi nghoid.

³³Re" da" myojid" moo: void void wim, ziri myang thang lo" lho: nang gi goolhoo: za: ayo" myid yu"- jang jang za: ayo" ji loo wa.

³⁴Nang gi nammugdara gyid thoem" tho' moo: myu: gyam" yen" yhang: ti" kham' zo: lho: hau: akhoug: moo: shilhang su" lei: nyid da" panglai: gyid sangphoo, yo' dakhyoo" ti" nang nheig no nheig lhoid lhoid kham' zo: yau: nyid wa nghoid.

³⁵Nang gi ngoo dakhyi, khyi, moo: thoung" yu bye: myang- dayug yug wigi ngoo ri re" baid too" sam" bye:- ngoo aboin: loo nhung: ngoo ciwim wigi aboin: asoo" wim bye: lha". Doem shoug kaid shi" wa la: ga: tid loo wa zi nghoid.