Read Lashi DANG: ZHOEM 24 Bible Online

DANG: ZHOEM 24 - Lashi bible

DANG: ZHOEM 24

¹Akhyeing" ashoeb, mo, ri ayu" no" nyid nyangnu" yo" we' bidnoem akoid nyid.

²Nyangnu" gi yau: khe" khyoo: koid thu' wa ga: za: myid soin: yu" nyid boem. Nyangnu" nhoid fo, kaid khang" moo"- dayug yug gi dam dab, shoug" nyid ago".

³Phajhi" juyhi: yo' se' gyo: phoid: yu da" khyoo: gi oug" khu ikoin deungkhu: joem ri ayang: qei" byid: nyid.

⁴Lasi, laleug phajhi" bo da" jang" moo yhoem: khoug: moo: byeung" sho' phoug" dab, younglho' da" zi joem yo' lhoo, yhoung to".

⁵Ung: yeig phajhi" bo zigi yoem: bo tho' re" je" ge nyid. Lasi, phajhi" gi yoem: so' tho' mo je" akhyag nghoid nyid.

⁶Khasu" tid tid lo" thang jang" moo: gi nang gi gyi atoo, shi" mo goolhoo" za: soin myid yu" ca"- Phajhi" byid: khyoo: myoo" sho" yo" yu ri oung: doid lo" khyoo: we' je" yo" yu nyid.

⁷Ung: yeig phajhi" dang: khyoo" gi nheig agyeing: su: se' gyo: yu wa shid re" gi alei nghoid da- yhouggyen: da" moo" sham: go" uri gi nyang: ci" we' ase' tid nghoid da:.

⁸Nang gi khanham we' akhyeing" ashoeb, moo" ri za: myid soin: yu" nyid nghoid rigi nang rigi lhu: phyo' su: ga: khyo" za: subi" tid fu" lo" boem wa zi nghoid.

⁹Koophoid myid soin: thu' kaid da" moo" zoo" gi yooboo za: nghoid. subi" gootu: ri age khyo" za: lhoung tid nyid su: ri sube" wigi coem, ngheung" lo boem.

¹⁰Nang moo: yau: khe" khyoo: shoug" lo jang" mo yoem: neung: lo" nghoid rigi nang gyeing" nyang: yoem: neing: su: nghoid bye:.

¹¹Atarha" khyo" said pyam, shoug" lo" nyid da" byu dayug ri khyoid yu wa shid re" ano: nyid loo.

¹²Nang yo' ci: asen: ga: tid nyid nghoid loug we' Re" da" emyed khoug: moo: myid nyid da" khyoo: ri ASEING nyang: si' byid: nyid lho: dang: phyed byid: nyid. Nyang: gi nang ri yu" nyid lho: se' nyid. Hau: lho: nang koid da" moo" moo: cang wigi phoug" tab, jhungshug ri byid: loo wa zi nghoid.

¹³Nga" zoo: we" byooyhid: ri shug we' houg: gi ge zi nghoid. Byooyho' mo byooyhid: gi: re" yhoo: moo: cau: ziyo' dakhyoo" ti"

¹⁴Phajhi" juyhi: gi re" da" nheigloem: soozoo: shid re" ge khyoo: nghoid ziri se' too" we'. Phajhi" juyhi: ri sho: too" we' houg: lang" re" da" shid vhu" mo khyoo: gi young" lhoo, wa zi nghoid.

¹⁵Nheigloem: deingmain" nyid su: jang" mo lhoid zoo: wa ga: myid soin: nyid da" akhyeing" ashoeb, bang: yhang: ti" akoid goo. Nya: yhoem: ri aphyo, pyam goo.

¹⁶Nheigloem: deingmain" su: gi khamyhoo lheing: jhoid leung nghoid loug we' nyang: gi khanham we' yo" doem to' yab. Nghoid loug we' byo, yoin' khyoo: gi akhyeing" ashoeb bang: ri phyo' shoin' pyam nyid.

¹⁷Re" da" gyivoo joem gi byo, yoin" lo" khyoo: ri thoung" shau" boem ri ayu" goug goo. Nyang: khyid: vhu" thoung" lho: leung lo" ri ayu" ngei nyid.

¹⁸Nang hougsu" yu" jang" nyid ziri ASEING myang wigi ayu" ngei wa nghoid. Houg: lang" nyang: ri dam kaid wa khyoo: ri doem yoeb yu pyam, byid wa zi nghoid.

¹⁹Akhyeing" ashoeb, mo, yoomo nang myid amyo: nyid nyangnu" ri ayu" no" nyid.

²⁰Akhyeing" ashoeb mo, shid re" thang: phyang" ein: zi ajo. Nyang: myid byu nyid wa khyoo: ci" we' ajo, loo nghoid da:.

²¹Nga" zoo: we" ASEING ri gyoug phau" nyid we' khokham ri we' phoug" tab, ngi: byid: nyid we' nya: eig yug ri tu: lhoin" wa shid re" abo soin, nyid.

²²Houg yhang: ti" tu: lhoin" bang: gi khamyhang amyang" ri byo, yoin" loo" goo" wa zi nghoid. Mangsoo yo' Khokham wigi yo" byid: da" yau: khe" khyoo: ri nang yo" myid boin: nyid la".

²³Phajhi" juyhi: boo bang: gi hidsu" ga: we' lhoung tid boem- tarha" agyi phoo gi dashoid shoid khyoo: bo dab, zigi shoid, nyid.

²⁴Yooboo yoo" su: ri yooboo ayoo" ga: tid nghoid rigi nyang: ri dangain" mo, coem, ngheung" lho: nheung" zi shoug" wa nghoid.

²⁵Yooboo yoo" su: ri yooboo dam kaid su: koem gi gyi: sheung: lo wigi myeing gi tid fu" byid: zi shau" loo wa nghoid.

²⁶Deingmain" khyo" phoug tu" da" khyoo: gi bidnoem agyeing" nghoid ziri aved toin" shed nyid zi nghoid.

²⁷Re" yoo thung" anyeing" shi"- voem: doug: khu: moo" ri goolhoo: akoid too" too" gi yhoem: akoid ikoin deungkhu: avang shi.

²⁸Byu dayug yug da" khyoo: ri goolhoo: ase' too" loo- nyang: ri yooboo foin: da" moo" akoid thu. Nyang: ri khyoo: vhang: vhang: loo" nhang: da" dang: atid.

²⁹«He: yug rigi nyang: ngoo ri koid yhang: ti"- ngoo shi" nyang: ri la too: phug wa» ein: age tid.

³⁰Nheig agyeung: da" byu" dayug da" yoothung" yo' zabyid khyam: joem khyo" ngoo so" lid: lo.

³¹Nya: yoo joem gi myo, se: lho: zu: gyoem" wigi se: nghoeb to" abye:.khyam: kyam, to" da" lug cuang joem we' byo, gyo" jo, bye:.

³²Hau: ziri ngoo yu"- hau: khyoo: ri myid yu" lang" houg: mo jhau" yu khyoo: dakhaid yo" yu.

³³Daso' yhoeb- daso' yhoeb nghui" nghue"- lo, pyoid theug ci: wigi daso' byam no: yu we'.

³⁴Nghoid loug we' nang dayhoeb, jo, shi" uri sho" jhen: khyoo: gi myivhoem: ci: da" khyangtoug: joem yhang: ti" myab" myab, ju" lo boem wa nghoid.