Read Lashi DANG: ZHOEM 28 Bible Online

DANG: ZHOEM 28 - Lashi bible

DANG: ZHOEM 28

¹Akhyeing" ashoeb bang: gi nyangnu" ri hang" wigi akhaid nghoid loug we' lhoung phang: lo" ago". Nghoid loug we' nheigloem: deingmain" nyid su: koem gi khang khyi yo" dakhyoo" ti"- seing" deing khid" yo" nyid nyid da:.

²Mungdain: daloem: yooboo shoid nyid zigi Khokham dayoug thang: moo: dayug do, loo wa zi nghoid. Vhu" nug ge lho: se' myid yu" da" vhu" shi: bang: shu" vhu" she: rigi hau: mungdain: gi geung: teung jo, wa zi nghoid.

³Sho" jhen: mo, ri doin: zeig zo: nyid da" zoug: yigi shivoo: gug shi" ri baid sain" pyam, nyid da" moug: moo" yu: yo' du nyid.

⁴Tarha" ri cishu: anhang: rigi nang akhyeing" ashoeb mo, shoid khyoo: bo dab, nyid zi nghoid. Nghoid loug we' nang tarha" cang nghoid rigi akhyeing" ashoeb mo, ri gyi koid su: nghoid.

⁵Akhyeing" ashoeb, bang: gi tarha" ein: ziri asi nghoid ago- ASEING ri loem khau: nyid mo, koem gi hau: tarha" ri goo" lhoo: za: se' gyo: xoem" ci: boem ago".

⁶Nheigloem: deingmain" lho: sho" jhen: nyid zigi jonu" yo" de, jo, lho: adeingmain" bang: da" tho' re" je" ge'.

⁷Tarha" ri cang lo" da" zooyam, phoo gi vhu" nug gi su: nghoid- ce" akyu" abo da" byu yi yo, zoem" khau: yen" su: gi nya: phoo ri sho' thu nhang: nyid su: nghoid.

⁸Subi" gooyug ri mhau' fain" lho: atu" amyaid yo' ngei jhid" zo: khyo" wigi yo" loo de, lo nghoid rigi re" da" ziyoo jonu" joem gi sho" jhen: bang: ri nheig se' khyeug su: da" lo, khoug: khyoo ju" lo" byug wa zi nghoid.

⁹Nang tarha" acang nyid nghoid rigi re" da" akyu" mho' thui: ri Mangsoo gyoo: byid wa tho' re" gi gyo: ngheing" wa zi nghoid.

¹⁰Nheigloem: deingmain" su: ri akhyeing" ashoeb, da" moo" yo" zei: sho' ga: jhu, phyo' nghoid rigi nanyang: thoung: to" da" lhid moo: nang myi" wa nghoid. Yooboo ayoo" su: gi jhungshug yo" yu wa zi nghoid.

¹¹Yoo" mo, di mo, gi nyang: nya: phajhi" boo mo, nghoid ga: khanham we' dajho: nyid boem ago". Nghoid loug we' nheigloem: asam" aved yo' byu da" akyang" ri se' yu" da" sho" jhen: bang: gi je" se' nyid.

¹²Byugi yigi mungdain: ri vhoeb wa akhang" aya yoo" lang" mung" byu yi yugkhang" moo" gi gau, yi ngei pyo: nyid ago". Age, su: vhoebkhang" lo rikoem gi mung" byu yigi daphang: gau" yen" boem.

¹³Re" yooboo ri zau" to" nghoid rigi re" pyaid goin" moo: oung: doid khyoo: yo" yu wa zi anghoid. Hau: yooboo ri yhen: yu lho: wigi she: pyam, nghoid rikoem gi Mangso wigi nheig khyeug shoo myen: yu zi shoug" wa nghoid.

¹⁴ASEING ri khanham we' phau" myang: nyid we' houg: lang" nang gi ngei pyoo: wa nghoid. Nang nheigloem: thain: nyid nghoid rigi byo, yoin" lo" wa zi za: nghoid.

¹⁵Myung shoo" mo, da" atho' moo athoug" akhyoug: vhoebkhang" nyid da" zoug: phoo gi myeung kyoug nyid da" khang khyi, yhang: ti"- anghoid lang" gi zoo: noem sho: yen" da" voem, yhang: ti" gyoug noem' nghoid nyid.

¹⁶Ge da" nheigloem: lasi phajhi" abo da" zoug: gi nyang: nau khyo" vhoebkhang" nyid. Houg: gi athoug" akhyoug: da" zoug: lain: nghoid- adeing amain" da" khyoo: ri ngheung" nyid da" zoug: koem gi myang" sho' yo" vhoebkhang" nyid wa zi nghoid.

¹⁷Byu said da" yooboo yoo" su: gi nyang: nya: da" loeb duang: ri yo" myab, yhi mo, du: nyid su: nghoid. Nyang: ri ayhe: toem, pyam, go

¹⁸Nheigloem: deingmain" nyid we' houg: lang" nang gau: nyu: wa zi nghoid. Nang adeing amain" koid nyid nghoid rigi nang gi nyeigdain tung" leung loo" khari" wa nghoid.

¹⁹Moo" zoo" zei: khang yoem: kaid nyid da" yoo koid su: gi zoo: noem myoo" sho' yo" loo wa zi nghoid- ayo, akhyeing: ri agoin: to" lai pyam nyid mo, gi khanham we' myoung sho" loo" goo" wa nghoid.

²⁰Nheigloem: deingmain" nyid mo, gi mainkaid jeju" agoin' ayu: yo" jo, loo goo" wa zi nghoid. Nghoid loug we' gye" hain: khyo" yo" loo de, loo nau nghoid rigi nang ri yooboo dam kaid zi shoug" wa.

²¹myonhoo: khyen: zigi shoid khyoo: nghoid- nghoid loug we' tarha" agyi dayham" gi nge thang da" khougvhoid ri yu zo: khyo" shoid vhang: moo" ri zei: nyid ago".

²²Nya: shid re" za: myab, myab, yo" de, loo wa so' kho' nyid mo, gi nyangnu" da" tho' moo: sho" jhen: da" khyoo: ju" loo wa ziri asi, nghoid nyid boem ago".

²³Byu dayug yug ri yooboo tid poin" su: gi nyang: ri coung" byid: su: tho' re" je" wigi thang: phyang" jeju" boin: loo wa zi nghoid.

²⁴Nya: myhi' nya: pho jang" mo khau" yu zigi ashoid ga: myid su: gi khoug" foeb joem yo' dakhyoo" ti" nghoid nyid.

²⁵Nyang: nya: shid re" za: te: myid nyid zigi yau: khe" khyoo: za: dabui" nhang: nyid. ASEING ri loem khau: nyid su: koem gi nya: shid re" je" ge nyid khyoo: nghoid.

²⁶Nanyang: myid da" khyo" za: cang zigi nheig agyeung: zi nghoid. Goug: goug: za: nyid lho: re" tho' mo phajhi" je si' mo, jhau" shed da" khyoo: ri cang nyid we'.

²⁷Sho" jhen: bang: ri gam byid: nyid we' houg: lang" nang khanham we' amyung wa. Myung mo, ri ayu" loo: za: myo coem" ci: rigi byu myoo" sho' bang: gi nang ri nheung" loo goo" wa zi nghoid.

²⁸Akhyeing" ashoeb, bang: da" khoin" so, yo' lo boem lang" gi- meing: byu yigi phang: gau" lo" go" nghoid loug we' nyangnu" byed gyo" byug lang" gi adeing amain" da" bang: doem vhoebkhang" lo boem wa zi nghoid.