Read Lashi DANG: ZHOEM 29 Bible Online

DANG: ZHOEM 29 - Lashi bible

DANG: ZHOEM 29

¹Yooboo tid poin" khang" moo je" wigi nheigloem: dathain: nyid nghoid rigi khanham we' ayo" doem so, nyheing loo: sho' byo, yoin" lo" khyoo: thoung" shoug" wa zi nghoid.

²Deingmain" da" Khokham toin" shed yu" ge'- nanu" ri ngoo ngei pyo: nyid da" mung" byu yi toin" shed ba- akhyeing" ashoeb, da" zoug: ngoo ri toin" shed ge'- koug shu: nyid da" mung" byu yi ngoo toin" shed wa.

³Phajhi" juyhi: ri nang phoug" se' tab zigi re" phoo gi nang yoomo la ngi: yo" koid wa nghoid- shava myhi' jang" moo: ngei yhoung: thang pyam, da" zigi athoug" akhyoug: da" nheig agyeung: su: nghoid nyid.

⁴Khokham gi deing: byeung" khyo" cang nyid ziri nya: mungdain: moo: yoem: bo, loo wa zi nghoid. Nghoid loug we' nyang: gi ngei sheing: riza: te: myid nyid nghoid rigi nya: mungdain: ri lhu: phyo' pyam, loo wa nghoid.

⁵Re" da" bidnoem yiri agoin: mhau, coung" byid: khyoo: gi nanya: shid re" nanyang: gyoin: du: nyid zi nghoid.

⁶Akhyeing" ashoeb, bang: gi nyangnu" da" yooboo moo: myi" ago- nheigloem: moo: deingmain" nyid mo, koem gi ngei pyo: ziyo' loid byoin, lo" ago".

⁷Byugi dayug gi myoung shoo" bang: da" akho: akhang" ri se. Akhyeing" ashoeb bang: koem gi houg: yhang: te" khyoo: joem ri ase' gyoo: nghoid boem ago".

⁸Subi" gooje, da" khyoo: ri cishu: anhang: su: gi voomoo" joem ri yo" lhu: nhoung kaid ago". Phajhi" boo mo, koem gi yug yo da" khyoo: ri yo" koid thu' kaid ago".

⁹Vhu" nug gi su: wigi byugang: yiri yung" shoug nghoid rigi hau: byugang: yi za: nyho: yi pyam, byid: lho: myen, jham" khyoo: yoo" wa zi anghoid.

¹⁰Suid" shug wa zi gyid su" shed nyid mo, gi deingmain" bang: ri ngheung" nyid boem- nghoid loug we' deingmain" mo, koem gi houg: yhang: te" bang: da" kangso' ri goin' coung: byid: lo boem wa nghoid.

¹¹Nheig agyeung: mo, gi nyangnu" da" nheig yo: nheigloem: ri di: bang" za: toin" shed nyid boem. Nghoid loug we phyiri: phala: se' myid soin: yu" bang: gi nheigloem: sheung: lho: hougte" ziri zeung: oung: nyid boem.

¹²Zoug: yigi adeing amain: da" lu dang: ri tam" gyo lho: wigi nya: vhoo: mo, zoug: yi dangain" we' mhau, fain" vang: bue" loo" wa.

¹³Sho" jhen: su: yo' nyang: ri zeig zoo: su: ri dakhyoo" ti" nya: eig yug goin' ziri myojid" tab, byid: too" su: gi ASEING nghoid.

¹⁴Khokham gi sho" jhen: bang: yo" yu moin: da" akhang" ri coung: goin' byid: nghoid rigi nyang: gi myang" sho' yo" vhoebkhang" nyid wa zi nghoid.

¹⁵Yooboo ayang: toin" shed ziyo' tarha" ri cang nhang: nyid zigi zoo shang: me" shid re" ge zi nghoid. Zooshang: mi" gi nyangnu" vho: khyo" za: yhe: lo" nghoid rigi nya: mhyi, ri sho' phu" nhang: loo wa.

¹⁶Akhyeing" mo, da" yoem: so' yo' lo, rigi yooboo moo" myoo" sho' zei: thu' loo wa nghoid. Nghoid loug we' deingmain" mo, gi houg: yhang: te" mo, byed gyoo" lo" ziri myang lo boem wa zi nghoid.

¹⁷Re" zoo: ri tarha" cang wa shid re jhau" mho' we' houg: lang" nang gi nya: yooboo ri khanham we' shau" myid boin: loo wa nghoid. Nyang: gi nang ri sho' aphu" nhang: wa nghoid.

¹⁸Mangso khyoo: shed zi ashau" yu da" mungdain: gi abyoo asain" bue" nyid Mangso da" tarha" ri cang su: gi gau yi nghei pyo: nyid.

¹⁹Dei zoo: ri nhoid yo' za: te: tid poin" rigi atam" gyoo: wa nyang: se' gyoo: nghoid loug we' cishu: nhang: wa zi anghoid.

²⁰Nheig agyeung: da" byugang: gi amyed soin: yu" loo: dang: tid nyid su: tho' re" nheig byu jang" je" jo shi.

²¹Re" da" dei zoo: phoo ri ngi, shi" mo nyang: vho: ja" ri ja: khang" moo" byid: nyid rigi danyid" da" bidnyid moo: gi nang seung: da" jonu"- dangain" nyang: wigi yu pyam, byid: loo wa nghoid.

²²Nheigloem: leung" mo, gi yau: khe" khyoo: yo' myeing" myo: byo, go" khyoo: ri myoo" sho' bue" thu' loo nhang: nyid.

²³Nghoid boin: khyoo: gi nang byed byo" byug wa khyoo: nghoid. Nheigloem: khyo' lho: nyid su: koem gi sube" wigi phau" myang: khyoo: shoug" nyid wa zi nghoid.

²⁴Khoug" foeb da" byencang" gi nya: shid re" age thang da" gyivoo nghoid. Nyang: wigi tarha" yung" moo: deingmain" zi tid nghoid rigi khoug" foeb gi yooboo dam kaid zi shoug" wa nghoid. Nyang: khyo" wigi deingmain" da" dang: atid nghoid rigi Mangso wigi nheing" wa zi nghoid.

²⁵Subi" gooje, wigi nang ri ciga: goo" wa la"» ga: myid ci: khyoo: gi gyoug ci' ca" nyid. Nghoid loug we' ASEING ri loem khau: nyid nghoid rikoem gi nang gau: nyu: nyid wa nghoid.

²⁶Byu yugkhang" moo" gi mung" vhoeb zau: da" myonhoo: ri: sho: nyid ago". Nghoid loug we' nyeung veung" da" khyoo: gi ASEING jang" mo za: dayo" yu nyid.

²⁷Deingmain" bang: gi akhyeing" bang: ri ngheung" lho: akhyeing" ashoeb bang: we' deingmain" bang: ri ngheung" nyid.