Read Lashi DANG: ZHOEM 30 Bible Online

DANG: ZHOEM 30 - Lashi bible

DANG: ZHOEM 30

¹He: zigi Yake nya: zoo: Agura da" phoug" tab, dang: zhoem nghoid «Mangsoo gi ngoo yo' anyid- Mangsoo yo' ngoo dage" anyid. Ngoo nyang: kyeing" dasho" jhen: nyid.

²Ngoo gi byu tho' re" gougnyhoug yo' je du go" nyid Byu dayug moo: ca" nyid da" lasi phajhi" ngoo moo: aboo.

³Ung: yeig phajhi" ri khanham we' ashau" jhau" yu yu" Mangso khyoo: ri we' ngoo ci: asi.

⁴Mougkhung: moug: di mo, lo da" lasi laleug gi- hang" yo" se' la". Lid ri nya: lo, khoug: moo: hang" yo" zhoeb, ci: wa anghoid lang" pain" dacu' moo: gyid ri nang yo" join, ci: wa la". anghoid lang" mougmyid da" kyoo" ri hang" yo" kyam, to" la". Nyang: gi hang" su: nghoid nyid? Nang se' ri tid yu" shi" we' nya: zoo: gi hang" nghoid.

⁵Mangsoo gi nyang: tid to" da" dangsoo" khoin" joem ri cang byeung" nyid. Nyang: wigi goin' coung: byid: baja" ga: sho: nyid mo, ri nyang: gi goo, yo' dakhyoo" ti" bui byid: nyid.

⁶Nyang: gi khanham we' atid da" dang: ri nang tid bye: ga: sang: lang" gi nang ri gyi koid lho: nang gi mhoug su: nghoid ziri di: bang" myang thu' loo nhang: wa nghoid.

⁷Mangsoo we"- nang ri ngoo mho' yoid nyid ngoo ashid: loo" shi" ri khyoo: eig ja: yo" yu nhang: we'.

⁸Mhau' tid da" khyoo: moo: ngoo ri acang nhang:- ngoo ri gye" we' ayoo" nhang:- gye" we' amyung nhang:- ngoo moo: ca" nyid da" zoo: noem za: byid: we'.

⁹Ngoo moo: ca" nyid tho' re" jonu" ziyoo yo" jo, loo lang"-nang ri ngoo ci: aca" loo: ga: tid loo wa zi nghoid. Nghoid lang" ngoo sho" jhen: nyid wigi khoug" zo: lho: nga" Mangsoo ri myeing yoin" loo" nhang: wa zi nghoid.

¹⁰Dei zoo: dayoug da" gei ri nya: Aseing shidkhoin" moo atid kyoo" loo- nang ri nheung" lho: nang dam, shoug" loem wa nghoid.

¹¹Nya: pho, bi" ri nheung" lho: nya: myhi' bi" ri phoug" ase' tab da- byu dayham" nyid nyid ago".

¹²Lo" thang sho' aco' ajhoid bue" nyid nghoid loug we' nyang: nya: gung ri gye" gyeung" shang: ga: myid nyid mo, byu dayham" nyid.

¹³Nyang: nya: gung ri gye" ge ga: myid jho: nyid mo, dayham" we' nyid. Nyangnu" gi khayhi' ge ga myid jho: nyid go" la".

¹⁴Byu dayham" gi sho" jhen: bang: yo' ca" yo kyi" khyeug nyid mo, atho' moo nheig ase' khyeug loo: atu" amyaid phyed zo: nyid ago". Nyangnu" gi hougsu" koid lho: voem: doug: khu: nyid boem ago".

¹⁵Foid nyoug dadu: gi myiyi: nu" eig yug yo".Nya: eig yug goin" da" myeing gi«Ngoo ri byid: we'», ga: ago". Khanham we' nheig ase' shid: ja" myid: ja: jo.

¹⁶Hau: zigi Moovo moug:- zoo: du, amyhu: da" myiyi:- moug: gyid ca" nyid da" myid kyug- ayo" said loo: sho' nge" nyid da" myi:- bi" nghoid.

¹⁷Nya: phoo ri yinoug tu' pyam, lho: nya: myi, mang: lo" ri anoug ashoo" koid su: hang" nghoid loug we' join yu joem wigi phyo' zo: pyam wa zi moin: yi" nyid. Anghoid lang" gi nya: myojid" ri kano, joem wigi thei" phoug pyam, byid: wa zi moin: yi nyid.

¹⁸Ngoo atho' se' gyo: da" no, thang khyoo: myid ja: jo.

¹⁹Hau: khyoo: gi moug: laid phyoo" moo: dang: yen" da" zoin bung: dadu:-lug moo" boem, tho' moo: so" yen" da" lhangmyu dadu:- panglai: tho' moo: khyoo: sho: yhe: lo" da" sang phoo: daloem- yo' yuggi, yo' myiyi: jheddab go"- ga: khyoo: nghoid.

²⁰Dangsoo" azoung" da" yhoem: seing: myhi' gi hid: su" koid- nyang: avoid avhu: koid shoid pyam thang: ri gung yhe: ced" pyam, lho: ngoo ci: ashoid bye: re: ga: tid.

²¹Mougmyid, atho' oung: zeung: da" khyoo: myid ja: jo-

²²Khokham bue" lo" da" join,- nyang: ci" we' avhoo: ci" we' ashoug" zoo: sho' zoo: noem yo" da" byugang:-

²³Yhoem: yo" lo" da" ngheung" pho" myiyi: myhi'- Nyang: nya: yhoem: seing: myhi' da" joyoo moo lhoid yu pyam, da" join, myhi' nghoid.

²⁴Mougmyid tho' moo: gung ngi, nghoid loug we' atho' tid loo: sho' phajhi" juyhi: bo da- gougnyhoug myid: ja: nyid.

²⁵Hau: zigi yoem: neing: nghoid loug we' zain gung shid re" zoo: noem, sho: zheung" to" da" layed.

²⁶Yoem: aboo nghoid loug we' lug moo" zeing gyoo: moo: yhoem: se' koid loung" da" ceuglhid".

²⁷Khokham ayoo" nghoid loug we' veing" veing" se' dang: yen" da" jhenkhyeug joem.

²⁸Nyang: ri re" da" lo, voo: moo: dayo" kaid ci: nghoid loug we' Khokham yi da" yhoem: cang yo" nyid yen" da" yhoem: lhoug nghoid.

²⁹Khyoo: so" lo" ri gye" yu" yung" tung" wim da" myid: ja: jo.

³⁰Hau: zigi gougnyhoug dangain" mo yoem: bo thang lho: hang" ri we' agyoug da" khang khyi.

³¹Coidbaid joem- go" lheung: yen" da" gyo, phoo joem yo' Meing: byu yi da" agung moo: so" yen" da" khokham joem nghoid.

³²Nang gi nheig agyeing: loo: nghoid boin: ziyo' akhyeung" da" moo" zei: thu' kaid wa zi myid yeung ci: rigi daso' theung: lho: damyid yu" shi" we'.

³³Nu: noug" ri lhu: leig rigi noug" xu: ri yo" yu wa sube" da" nhoo: moo: yhe: thoug" byid: rigi suid" yau, loo wa. Subi" nheig yoo: wa khyoo: lhu: pau: rigi yau: khe" khyoo: za: shoug" zoo: wa nghoid.