Read Lashi DANG: ZHOEM 7 Bible Online

DANG: ZHOEM 7 - Lashi bible

DANG: ZHOEM 7

¹Nga" zoo: we"- ngoo tid dang: ri daboin: so" nyid we' ngoo nang ri zei: nhang: da" khyoo: ri khanham we' ato" myhed pyam.

²Ngoo tid da" dang: khoin" joem yo' dakhyoo" ti" zei: nyid we'. Hougsu" nghoid rigi nang kangso' shoug" dei nyid wa Re" da" myo, loem: ri nang goem loem byid: nyid ziyo' dakhyoo" ti"- nga" da" jhoug" myeing" jhoug" thui: ri zed" lhed lho: cang nyid we'.

³Nga" jhoug" myeing" jhoug" thui: ri khanham we' xoem" ci: we' hau: ziri nheigloem: ung: khoug: moo: lhed" too" we'.

⁴Phajhi" juyhi: ri gi re" da" nhammoo" yhang: ti"- nheigloem: phajhi" rigi re" byencang" agyeing" yhang: ti" zoem" khau: nyid we'.

⁵Hougsu" nghoid lang" nyangnu" gi gooje, yhoem: seing: myhi' joem yo' mhau, jhu, phyo' go" da" dang: ri tid zoore kuang lo da" myiyi: yi jang" mo nang ri yo" khyoid yu wa zi nghoid.

⁶Ngoo dalheing: ri nga" yhoem: bangzoo: khoem" khyo" nghe: shoid khyoo: yu" kaid ri

⁷Ci: athoung" shoug" yu" shi" da" zoolu: yi myoo" sho' bang: ri ngoo myang kaid- nyangnu" moo" nheig agyeung: da" zoolu: zoo: dayug ri ngoo yu" xoem" kaid.

⁸Nyang: myiyi: myhi' dayug nyid da" yhoem: khyoo: jhoin: khyo" so" lid: lo" wigi

⁹Myen" moug: coid loo lang" gi nyang: gi hau: myiyi: myhi' da" yhoem: yam, khyo" so" lid: lo" nyid.

¹⁰Houg: lang" hau" myiyi: myhi' gi nyang: ri re" shoug" yu da:. Hau: myiyi: myhi' gi shava, myhi' yhang: ti"- lhoo, yhoung ci: wigi nyang: ri mhe, yu wa ga: soin, nyid abye:.

¹¹Nyang: gi sho' ase' ziyo' myo, yang" da" myiyi: myhi' nghoid wigi fu" moo" khyoo: cang khanham we' daso" yen.

¹²Houg: yhang: ti"- dalheing: lheing: gi khyoo kang" khyoo: jhoin: cang- dalheing: lheing: gi fu" moo" khyoogung moo: we' dalheing: lheing: gi kid" vang khoug: cang we' lhoung lang" yab nyid yen.

¹³Nyang: gi hau: zoolu: phoo ri lhoem: nheug vu, yu wigi boobug boug lho: yu" zhoug to" zoore

¹⁴«Akhid" nyid" nga" da" xoin" du: ri ngoo nyheung soin' to" wigi xoin" to' shoo" we' yoo" bye:.

¹⁵Houg: yoomo nang ri tau, yu wa ein: ngoo thu' re" ngoo nang ri cang shoo: wa shid mo thu' lo- nang gi hid: moo: nyid nhung: lha".

¹⁶Ngoo gi nga" da" yhoeb cuang ri Egutu meing: mo thu' lo da" voidvoo: aja: ja: dab, da" zin: yung" pain" mi yo' myhu" too" bye:.

¹⁷Hau: da" yhoeb cuang ri nam, pyo: da" mura:- nam, pyo: da" bain: xu: aja: ja: yo' soin' too" bye:.

¹⁸Ri" we' damyen goin" pyo: koin shang! Yha" eig yug gi nyang: cang" nyang:- poo: go" ci: lho: ngei pyo: nyid wa nghoid.

¹⁹Nga" yhoem: seing: phoo we' yhoem: moo: anyid- nyang: gi moug: ve: meing: khyoo: gyung: sheing: so" lo" byug bye:.

²⁰Nyang: gi ngei zi myoo" sho' voin lo" wigi labain eig loem: thang: rilang" nyang: doem yo" tau" loo wa zi anghoid-» ga: tid nyid.

²¹Hougsu" nu" nham' da" aved asam" yo' nyang: ri yo" kuang yu lang" mhe, mhoid" jhu, phyo' da" dang: khoin" moo nyang: gi myi" jo, abye:.

²²Said wa shid mo she: yhe: lo" da" nushain: loo: yo' dakhyoo" ti"- hau" myiyi: myhi' jang" moo: cang yhe: loo" bye:- gyoin: khyoo: thu' byam, gyo" lo" da" xaid loo: yhang: ti"-

²³Seing" khoin" moo: myookhaid beug kyang to" zi shoug" wa. Nyang: gi gyoin: khoug: khyoo: dang: vang lo" da" ngho' yhang: ti"- nya: da" kangso' gi kyi" khyeug yau: khi" zi shoug" nyid bye: zi nyang: asi, shi.

²⁴Hougsu" wigi akhid" koem gi nga" zoo: yi we"- nga" dang: ri tam" gyoo: loo: ge'- ngoo tid da" dang: moo: nheigloem: zoug jo, we'.

²⁵Houg: yhang te" da" myiyi: wigi re" nheigloem: ri ayo" mhoid" jhu, yu loo" baja"- nya: jhang khyoo: vhang: wigi we' avang yhi.

²⁶Nyang: gi yuggi myoo" sho' ri byo, yoin" pyam, nhang: lid lo yu" bye: ziyo' nyang: shu" said pyam da" byu yi atho' nghab, loo: sho' nghoid bye:.

²⁷Nang hau: myiyi: myhi' da" yhoem: khyoo: dato' yhe: nghoid rigi nang gi moovo moug: khyoo: gyo" lo" nyid su: nyang: nghoid bye:. Hau: zigi shid: jang" moo: ju" lo" da" khyoo: kyang nghoid.