Read Lashi DANG: ZHOEM 8 Bible Online

DANG: ZHOEM 8 - Lashi bible

DANG: ZHOEM 8

¹Tam" gyoo: ge' phajhi" juyhi: gi zheug yoid nyid se' myid se' soin: khyoo: gi nyang: gung nyang: shoug" gyoo: sho' yoid nyid.

²Fu" moo" khyoo: yam, moo bouggung joem da" atho' moo: yo' khyoo: kang" shoem: joem moo: we' nyang: yab jo.

³Voomoo" vang khoem" moo" duang: moo: we' khoem: duang: joem ayam, moo: we' nyang: yoid nyid.

⁴Nyang: gi Byu xangsu: yi we"- ngoo nanu" ri mho' yoid nyid. He: mougmyid tho' moo: nyid da- byu yugkhang" moo" ri ngoo yoid khe: nyid.

⁵Nanu" gi ayang" akung shi" goola? yang" koung loo wa shid mo jhau" yu we'. Nanu" gi nheig agyeung: bang: nghoid nyid go" la". Phug soo" leug da" nheigloem: yo" yu sho' jhau" yu nyid we'.

⁶Nga" da" ge thang dang: khoin" joem ri tam" gyo: nyid we'. Nanu" ri ngoo tid kyo" da" dang: dangain: gi deingmain" zi nghoid.

⁷Ngoo tid da" dang: gi deingmain" zi nghoid nyid wigi mhau, fain" da" khyoo: ri ngoo ngheung" nyid.

⁸Ngoo tid nyid da" khyoo: dangain: gi deingmain" zi nghoid wigi ashoid avhang: ziyo' khyoo: shu" vhang: lo" zi aboo.

⁹Nheig loem phajhi" yo' byeung" jo, da" byu moo: gi hau: khyoo: dangain: bang bang nghoid nyid. Lu dang: ri goolhoo: tam" gyoo: su: gi nheigloem emyed moo: hau: khyoo: dangain: nyang: bang bang nghoid nyid.

¹⁰Ngei, sheung: da" gungthid- nga" khyoo: shed dang: ri khyen: yu we' Sheing: gyeung" tho' moo: je phau" da" lasi phajhi" ri khyen: yu we'.

¹¹Ngoo gi phajhi" juyhi: nghoid- ngoo gi phoug" dab, da" ngei sheing: lug nyau, tho' moo je, ge nyid. Nang vho: nyid da" zi ce: ja: yo" we' ngoo ri yo" tu, wa zi anghoid.

¹²Ngoo gi phajhi" juyhi: nghoid lho: nheigloem: phajhi" we' ngoo yo. Lasi, phajhi" yo' phug soo" lheug da" dang: phyed khyoo: we' ngoo yo.

¹³ASEING ri coung" nghei tu: to' da" khyoo: gi ashoeb khyoo: ri ngheung" khyoo: nghoid. Ngoo gi phau: khuang nghoid boin: ziyo' nheigloem: myhang: khyoo: ashoeb, khyoo: joem yo' shoid vhang: khyo" tid sang: da" dang: khoin" thui: joem ri ngheing" su: nghoid.

¹⁴Ngoo gi moo" ze" bui" wa da" phajhi" khyau" ziyo' hau: khyoo: ri zei: bue" nyid. Ngoo moo: se' gyo: da" nheigloem bo ziyo' ngoo moo: yoem: so' bo nyid.

¹⁵Khokham yiri we' vhoebkhang" jang" moo: ngoo bo pang" ge lho, da" tarha" ri koid thu' wa shid mo we' zoug: yiri ngoo bo pang" thoug nyid.

¹⁶Mougmyid tho' mo mung" zoug: yugkhang" moo"- mung" khyoo" voin, da" ludaid yi yo' zoug: koid da" byu yi dangain" gi ngoo bo pang" thoug da" yoem: vhoo" yo' shu" vhu" vhoebkhang" nyid boem ago" da:.

¹⁷Ngoo ri jheddab bang: ri ngoo jheddab nyid ngoo ri shoo: bang: hang" we' ngoo ri shoug" sho: myang ago".

¹⁸Jonu" ziyoo yo' myonhoo: phung" yoeb byid: wa da" khyoo: nyid ge nyid de, lo khyoo: yo' oung: doid lo" da" khyoo: byid: wa shid re" ngoo yo.

¹⁹Nanu" nga" jang" mo yo" kham: yu da" phajhi" gi gyeung" thang da" sheing: yo' ge thang da" ngei tho' moo: je ge zi nghoid.

²⁰Ngoo gi deing: byeung" da" khyoo: moo: so" yen" wigi nyeung veung" da" tarha" khyoo: moo: cang lo.

²¹Ngoo ri: jheddab bang: ri jonu" byid: wigi nyangnu" da" yhoem: joem moo: ngei sheing: yo' byeung" loo nhang:.

²²ASEING gi dangain" da" xang: shed" moo: ngoo ri phain" so: to" zi nghoid wigi goonham, gooco' mo nya: lo, moo" ashid" nghoid bye:.

²³Mougmyid yoosoo" ajo, shi" mo moug: thu' xang: poin: da" shid mo nyang:- ngoo ri phain" so: too" shoug" bye:.

²⁴Nammugdara joem yo' gyid thu' gyid bug ajo, shi" mo nyang: ngoo ri khu: kaid bye:.

²⁵Boem, joem ajo, shi" mo bouggung joem nya: joyoo moo: aju" jo, shi" re- ngoo ri khu: kaid bye:.

²⁶Mangsoo gi mougmyid yoosoo" yo' hau: da" dam lam: jo, pa: dam joem yo' myidjang mo myidzhoo" dazhoeb, lang" ajo, shi" ayo, mo ngoo ri khu: kaid bye:.

²⁷Nyang: gi mougkhung: mougdi ri nyheung to" ziyo' Nammugdara ri lid lo" wigi mougkyoo" moug: yam, cang koem" yen" uri hougmoo: ngoo bo so" yen" bye:.

²⁸Mougkhung: moo: jhoemmoug" ri nheung: loo nhang: ziyo'-Panglai: gyid bug joem ri phang kaid lho:

²⁹Panglai: gyid joem ri nyang: tid to" mougkyoo" mo ayo" lid do, loo" wa shid mo tid too" bye: ziyo' mougmyid da" ateing" ayang: ri nyang: zhoug to" uri hau: jang" moo: ngoo bo nyid nyid bye:.

³⁰Ngoo gi nya: nam, moo: yhoem: zhug su: yhang: ti" nyid nyid bye:. Ngoo gi nyid" khang" moo" nya: da" ngei pyo: apoem: bui" byid: nyid wigi nya: shidkhoin" moo: khanham we' gau, yi nyid.

³¹Mougmyid tho' moo: ngoo gau yi nyid wigi xangsu: byu yi yo' dage" ngoo myid ngei nyid.

³²Akhid" zoolu: yi we"- nga" dang: ri tam" gyoo: ge'. Ngoo tid nyid khyo" koid loo: ge'. houg: lang" nanu" ngilhoo' goo" wa zi nghoid.

³³Nang shoug" jhau" yu bye: da: khyoo: ri tam" gyoo: re". Phajhi" bo nyid re" hau: ziri ashe: pyam, loo.

³⁴Nga" dang: ri tam" gyo: ziyo' nga" khoem" duang: moo: nyid" khang" moo" nyid nyid wigi nga" yhoem: khoug: moo: vang lo da" khoem" duang: moo: dalang" nyid su: gi ngilhoo' wa nghoid.

³⁵Ngoo ri shoug" shoo: su: gi Kangso, ri shau" shoo: wa ASEING we' nyang: ri vho: ngei nyid wa zi nghoid.

³⁶Ngoo ri ashau" sho: da" byumyu" yigi noophyoo" shoug" nyid boem wigi ngoo ri ngheung" nyid bang: hang" we' shid: lo" khyoo: ri jheddab nyid boem ga: wigi tid nyid.