Read Lashi PHAJHI" DANG: 1 Bible Online

PHAJHI" DANG: 1 - Lashi bible

PHAJHI" DANG: 1

¹He: zigi Yerusalem moo khokham bue" lid lo da" David da" yuggi zoo: myid soin: phajhi' si' su: da" mungdang: joem nghoid.

²Myid soin: phajhi" si su: tid zigi akoem:-akoem: nghoid. Kangso' gyung: khyo: gi akoem:- dangain" akoem: za: danghoid.

³Re" kangso' gyung: khyoo: gi moo" zei: ziyo' moo" joem koid wigi hau: shid re" yo" ci: shug wa zi nang moo ci yo" la".

⁴Byuxeig dayham" re" wigi byuxeig dayham" gi loo" khari" nghoid loug mougmyid gi dakhyo" za: dajo, jo, da:.

⁵Bid gi dathu nyid wigi davang lo" nyid ashi". Nyang: xang: shi" mo doem shid" wa shid re" hau: joyoo khyo myoug doug tung" doem tau" lo" da:.

⁶Lid gi mougpyi: khyo" hau' lo" lho: mougzhung: shoid khyoo: hau' lo" da:. Lid gi hau' lheing yhen" wigi akhang: joyoo khyoo: doem lo da:.

⁷Gyid lang khang" moo" gi panglai: khyoo: yau vang lo" da:. Nghoid loug we' panglai: gi abyeung" shi" nghoid da:. Gyid gi nyang: yau thu shid" jang" khyo: doem tau" lo" lho: xang: shi" mo doem shid" da:.

⁸Ja: khang" moo" gi ngheing" wa khyoo: za: nghoid da:. Dang: khoin" khyo" atho' tid loo: sho' ngheing" wa khyoo: bue" da:. Ngoonu" da" myojid" joem gi khanham we' yu" noug athang bue"- ngoonu" da" nukhyab joem gi khanham we' gyoo: noug athang bue" nyid.

⁹Shid phyang" bue" lid: lo bye: zigi doem bue" loo wa. Shid phyang" koid lid: lo bye: ziri doem koid ri" goo" wa. Da moug: gyab goin" moo aseig ci: we' ajo,.

¹⁰Nyangnu" gi «Yu" ge'. hid moo aseig daja: jo,» ga: tid ago". Nghoid loug we' hau: zi anghoid. Goonham' mo ngoonu" akhu: shi" mo hau: zi dangain" bain bue" yu" bye:.

¹¹Lid: loo bye: ayo, moo bue" lo bye: ziri hang" aboin: soo". Houg: lho: hid thang: nyid" ein: da" akhid" mo zi hau: ayo, agyoo: moo bue" ziri xoem" goo" wa zi anghoid.

¹²Myid soin: phajhi" si' su: ngoo gi Yerusalem moo Israela yi da" khokham bue" lid: loo bye:.

¹³Ngoo gi he: mougmyid gyab moo bue" lid: lo zi dangain" ri joeb ca: yu" lho: jhau" yu wa ein: myid phyed bye:. Mangsoo gi ngoonu" da" adang moo myid myoo: wa vhu" pi: lo, kyo' kyam: too" byid: bye:.

¹⁴Ngoo gi he: mougmyid gyab moo koid lo zi dangain" ziri shau" myang loo bye:. Houg: lho: ngo wigi nanu" ri tid kyoo" ba. Hau: gu: dangain" gi akoem: za: danghoid ago". Hau: zigi lid ri khaid myheig ziyo' du da:.

¹⁵Guid" jo, ziri ayo" dain: nhang: nghoid da:. Ajo, da" ja: ri age nghab nghoid da:.

¹⁶Ngoo gi ngoo nya: gung ri «Ngoo gi Yerusalem moo nga" shid vhu" mo vhoebkhang" lid lo da" phajhi" si' bang: tho' je se' da" byu zeing dayug bue" lo bye:. Phajhi" juyhi: yo lasi phajhi" ga: zi ci: nghoid ziri ngoo se'» ein: tid.

¹⁷Ngoo gi lasi phajhi" yo nheig agyeing: da" agyoo: mo phajhi" juyhi: yo' ko" da" agyoo: mo adu da" ziri myid kho' jhau" yu wa ein: myid phyed bye:. Nghoid loug we' ngoo shau" myang yu zigi lid ri cang khaid myheig zi danghoid nhung:.

¹⁸Nang phajhi" je si' lang" nang myid je myo: da:.- Nang je si' lang" nang je nheigloem: no da:.