Read Lashi PHAJHI" DANG: 12 Bible Online

PHAJHI" DANG: 12 - Lashi bible

PHAJHI" DANG: 12

¹Houg: yoomo nang ngi shi" da" ayo, nang nheigloem: thang da" bidnyid joem yo' «Kangso' gyung khyoo: moo ngoo apyoo:» ga: tid wa zain nyid aju" shi" ri re" phain" so: ASEING ri myid boin: we'.

²Hau: bidnyid moo re" shid re" bid kyi: lhammoo" joem da" bidbang gi shoem: lo" lho: moug: gyid bo da" jhoemmoug" pung gi khanham we' ayu: lo" byug wa da" bidnyid ju" loo wa.

³Hau: thang: nanya: gung ri goem loem byid: lo da" re" lo, joem gi nain" lho: akhid" yoem: bo da" re" khyid: joem gi yoem: neing: loo" wa. Re" zei joem gi voem yo" zoo: wa yhi' amyo: byug loo wa. Re" da" myojid" joem we' gyeing: gyeing: yo" yu" wa yhi' agyeing: loo wa.

⁴Re" nukhyab joem gi fu" moo" khyoo: mo thui: joem ri ashau" gyoo loo wa. Nang gi lug lheing: gyeig myheing thui: yo' jihkoin" thui: ri dajhi' jhi' za: shau" gyoo: wa. Nghoid loug we' ngho' myeing thui: lang" nang ri yhoeb nhau" nhau" loo wa.

⁵Nang gi myhang: da" joyoo joem ri gyoug lho: khyoo: so" ri we' gyoug ca" ja: bue" loo wa. Re" xam: phyu: byug wigi nanya: gung rilang" yu: yen" wa shid re" gye" youg: wa. Houg: lho: nang myid vo: khyoo: dangain" byug loo" khari" wa. Ngoonu" gi ngoonu" da" lo" thang dougnoo: joyoo khyoo: lo" nyid boem lho: fu" moo" khyoo: joem moo koug ngau zi jo, loo wa.

⁶Ngei jang coo' gi byid byug lho: sheing: myikug gi gyo" go, byug wa. Gyid thung" mo tei" gi byid byug wigi gyid jhuang: gi go, byug loo" khari" wa.

⁷Ngoonu" gung du: gi mougmyid mo myid phei" khyoo: doem tau" lo" wigi kangso' gi ngoonu" ri byid: da" Mangso jhang khyoo: doem tau" loo" wa.

⁸Myid phajhi" si' su: gi hau: zigi akoem: akoem: ga: tid da:. Hau: zi dangain" gi akoem: za: nghoid da:.

⁹Nghoid loug we' myid phajhi" si' su: gi phajhi" juyhi: si' yoomo sube" ri nyang: se' ci: ziri xo' wigi jhau" byid: da:. Nyang: gi dang: zhoem' joem ri jhau" zhang: yu lho: deingmain" zigi hau: joem jo ziri ci: shug da:.

¹⁰Myid phajhi" si' su: gi nheig teing dang: khoin" ri yoem: kaid sho: da:. Nyang: lhid" da" soug" cab joem gi deingmain" da:.

¹¹Phajhi" boo bang: da" jhau" shid dang: joem gi yang joem ri yu" coung: wa shid re" yang zung" su: ci: da" lhamdung: coin: joem yo' du ago". Houg: lho: khyu: zheing" to" da" phajhi' dang: zhoem joem gi teing sho' baid zhug to" da" joto' tin" zei: joem yo' du ago". Houg: joem gi ngoonu" da" dayug kyeing" nghoid da" yang zung" su: Mangso wigi byid: to" zi nghoid da:.

¹²Nga" zoo: we" hau: tho' mo zung" yu" wa khyoo: gootu: daloem: jo, ashi'. Mougsoug" pug joem gi lhid" thang ga: zi ajo,. Houg: lho sung jhau" zhang: yu yoomo nang ri myung: nhang: loo wa.

¹³He: gu dangain" thang: ri tid wa zi daja: kyeing" dajo, lo. Mangsoo ri gyoug phoug" lho: nya: da" amyeing" dang: joem ri tam" gyo: cang yhe: nyid we'. Ciwim gari hau: shid re" nyang: byu ri phain to" zi nghoid.

¹⁴Mangsoo gi nanu" koid zi ja: khang" moo" ri ge zi nghoid nghoid age zi nghoid nghoid zheig zoo: khau" koid da" moo" joem rilang" dang: phyed byid: loo wa.