Read Lashi PHAJHI" DANG: 2 Bible Online

PHAJHI" DANG: 2 - Lashi bible

PHAJHI" DANG: 2

¹Ngoo gi ngoo nya: gung ri pyoo: sho' nyid yu lho: myid pyo: ga: zi ci: nghoid zi sho: yu wa ein: myid phyed to". Nghoid loug we he: zigi akoem: nghoid ziri shau" myang yu.

²Yi zigi koopyoid moo" zoo" nghoid ziri shau" myang yu bye:. Pyo: ja: gi ge khyo: abue" nhang: ein: ziri shau" myang.

³Ngoo gi phajhi" ri shau" yu wa myid vho: ziyo' zabyid yhid: shug lho: ngoo nya: gung ri pyoo: sho' nyid yu" wa ein: myid phyed bye:. He: zigi mougmyid tho' moo re" nyid da" ayo, moo ge thang khyoo: nghoid nyid bye: ein: ngoo shau" myid.

⁴Ngoo gi moo" zeing ri koid bue" lid: loo bye:. Ngoo nya: shid re" yhoem: joem zhug lho: zabyid khyam: joem sho" loo bye:.

⁵Ngoo gi khyam: moo agam aja: ja: yo' dage" shigam joem ri sho" too" bye:.

⁶Ngoo gi houg: joem ri gyid byid: wa shid re" gyid thoem" joem du: bye:.

⁷Ngoo gi join myoo" sho' yug ri qei lho: nga" yhoemkhung: moo join nu" yi khu: re" ago". Yerusalem moo nyid lid: loo mo dangain" tho' ngoo gi gougnyhoug kyung je" myoo: sho' yo" seing: bye:.

⁸Ngoo gi ngoo vhoeb da" mougmyid joem mo khokham ngei jhi: joem mo ngei yo' sheing: ri aboem azang yung: too" bye:. Yuggi yi yo' myiyi: yigi ngoo ri jikhoin" khoin" wigi ngei bu: nhang: ago". Houg: lho: ngoo gi yuggi dayug yo" vho: da" nhoo' myiyi: dangain" yo" da:.

⁹Jo da- ngoo gi gyi: sheung: bye:. Yerusalem moo nyid lid: lo da" bang: dangain" tho' ngoo je gyi: sheung: bye:. Houg: lho: nga" phajhi" gi ngoo mo khanham we' aneing: lo.

¹⁰Ngoo vho: zi ci: nghoid loug shau" yu bye:. Ngoo gi pyo: ja: daja: ri we' alid: pyam. Ngoo zei: lo da" moo" zoo" ja: khang" mo" da" gang mo ngoo nghoid boin nyid houg: lho: he: gu dangain" gi nga" da" aphoug" jhungshug nghoid.

¹¹Hau: thang: ngoo gi ngoo koid lid loo bye: zi dangain" da" khyoo: yo' hau: ziri khayhi' yoem: kaid lho: moo" zei: lo ziri myid yu" da:. Ngoo gi ci we' anghoid nhung: ziri myid boin: re" bye:. Hau: zigi lid ri cang khaid ziyo' du da:. Dajhi' we' akyu" aboo nghoid da:.

¹²Lo" thang moo gi khokham dayug gi shid phyang" mo khokham joem koid lid: loo bye: ziri za dayo" koid da:. Houg: yoomo ngoo gi phajhi" bo ziyo' nheig agyeing: da" khyoo: ci: nghoid ziri se' yu wa myid yu" shid" nyid bye:.

¹³O"- ngoo si' bye:- Moug: boo" gi moug: soid tho' je ge ziyo' dakhyo" phajhi" juyhi: gi nheig agyeing: zi tho' je ge da:.

¹⁴Phajhi" juyhi: boo bang: gi nyangnu" kha khyoo: yhe: lo" nyid ziri se'. Nheig agyeing: bang: gi asi' nghoid ago". Nghoid loug we' dangain" bang: shid re" daja: kyeing" da" vhu" pi: lo, kyo' gi ngoonu" dangain" ri lang" nyid ziri ngoo se' da:.

¹⁵Ngoonya: gung ngoo nyang: myid yu" «Nheig agyeing: mo, phu" zo: ziri ngoo we' phu" zo: da:. Houg ri ngoo houg phajhi" mo ce: akyu" shoug" yu la"» «Ciwe' ayo" yu» ein: ngoo tu".

¹⁶Phajhi" juyhi: boo bang: ri hang" we' amyid boin: nheig agyeing: bang: ri we' hang" amyid boin:. Ju" lo wa da" ayo, moo gi ngoonu" dangain" bang: we' coem' to" myhed pyam ri" goo" wa. Phajhi" boo bang: yo' nheig agyeing: bang: ngoonu" dangain" bang: gi dakhyo" kyeing" za: shid: loo" goo" wa.

¹⁷Houg: yoomo byu kangso' gyung: khyoo: gi nga" shid re" ce: dang: kang: athu. Ciwim gari hau: ayo, mo ja: khang" moo" gi ngoo ri yau: khi" mo lid: wigi ce: daja: we' aci: ri" byid: nghoid da:. Dangain" gi akoem: nyang: nghoid da:. Ngoo gi lid ri dalhung khaid nhung:.

¹⁸Ngoo moo" zei: lho: shoug" yu to" da" zi ce: daja: we' nga" shid re" dang: kang: aboo. Ciwim gari hau: gu: ri nga" khoo: moo xo' zhung: su: da" lo, khyoo: too" byid: kho' ca" wa ziri ngoo se' da:.

¹⁹Houg: lho: nyang: gi phajhi" bo ri boo wa.- nheig agyeing: ri agyeing: wa hang" se'. Nghoid loug we' he: mougmyid tho' moo ngoo moo" zei: da" akyu" ja: khang" moo" ri nga" phajhi' yo' shoug" yu to" da" ja: khang" moo" ri nyang: seing: yu ri" wa. Hau: zi dangain" akoem: danghoid.

²⁰Houg: yoomo ngoo houg yhi' houg myo' yoem kaid moo" zei: ziri amyed afoo" myid bue" bye:.

²¹Nang gi re" phajhi" juyhi: dangain"- lasi phajhi" dangain" yo" jhang: gu dangain" wigi moo" zei lho: yo" sho: to" zi dangain" ziri hau: shid re" ci: akoid- ce: moo" azei: to" da" su: shid re" too' khoo' ca". Hau: zigi ce: akyu" aboo jo, we ajo,.

²²Nang gi moo" zei: wigi pyaid thang sho' seing" kho" nyid. Hau: shid re" ci: shug byid: wa ci: yo" lha".

²³Nang dadei nyid nyid moo nang koid zi ja: khang" moo" gi seing" kho" ziyo' nheigloem: no zi za: bue" nhang: da:. Ci: daja: we ayo" yu loo"- Myen" moug: coid yo, rilang" re" myid nheigloem: gi doug: ayo" noo: nghoid da:. Dangain" zi akoem: danghoid.

²⁴Byu dayug shid re" ge thang zigi nyang: nya: vhoo" kung: phoug" shau" yu to" ziri zo: lho: shug lho: ngei pyoo: tung" nyid zi nghoid da:. Nghoid loug we' hau: ziri lang" Mangsoo mo nghoid ziri ngoo myid boin: da:.

²⁵Houg mo lid wigi gootu: kha: khyo" we nanya: gung nanyang: pyoo: sho' yo" zoo: yo" nyid wa la".

²⁶Mangsoo gi nyang: ri neig shid: nheugdeug nhang: bang: ri phajhi" juyhi:- lasi phajhi" yo' ngei pyo: khyoo: ri byid: da:. Nghoid loug we' yooboo yoo" bang: rigi moo" zei: nhang:. Vang ngei yoo" nhang: lho: yung: nhang: wigi nyangnu" shau" sho: yu da" ziri nyang: ri nheugdeug nhang: mo, shid re" byid: pyam wa. Hau: zi dangain" gi akoem: za: nghoid da:. Hau: zigi lid ri cang khaid ziyo' du da:.