Read Lashi PHAJHI" DANG: 3 Bible Online

PHAJHI" DANG: 3 - Lashi bible

PHAJHI" DANG: 3

¹He: mougmyid dang moo: bue" zi ja: khang" moo" gi Mangsoo khyen: to" da" ayo, moo bue" ago".

²Nyang: gi khu: da" ayo, yo' shid: da" ayo, ri asoo" to" to" da:. Sho" da" ayo, yo' phoin' pyam da" ayo,

³Said pyam da" ayo, yo' noo byang" byid: da" ayo, phyo' khyo' pyam da" ayo, yo' koid wa ayo, ri asoo" to" to" da:.

⁴Nyang: gi kougshu: da" ayo, yo' ngei pyo: da" ayo, koug ngoug wa ayo, yo' goo" wa da" ayo,

⁵Ngei wa da" ayo, yo' angei wa da" ayo,- babug bug wa da" ayo, yo' babug abug wa da" ayo, ri asoo" to" to" da:.

⁶Nyang: gi shau" myang wa da" ayo, yo' byug lo da" ayo,. Yo" lo da" ayo, yo' she: lhei" pyam da" ayo,.

⁷Lang: ceig pyam da" ayo, yo' khyoeb zhoem: da" ayo,- Sam: zoo: nyid da" ayo, yo' dang: ji da" ayo, ri asoo" to" to" da:.

⁸Nyang: gi jheddab da" ayo, yo" ngheing" da" ayo, meing: zain: da" ayo, yo' meing: dam da" ayo, ri asoo" to" to" da:.

⁹Ngoonu" zei: da moo" dangain" mo ci: shau" yu la".

¹⁰Mangso wigi ngoonu" da" dang moo ki" byid: da" lid: da" yoo voin ri ngoo se'.

¹¹Nyang: gi ja: khang" moo" shid re" jo da" ayo, ri asoo" to" to" da:. Nyang: gi ngoonu" ju" loo wa da" ayo, ri si' nau da" nheigloem: ri kaid byid: bye:. Nghoid loug we nyang: koid ziri joeb byeung" sho' se' lho: nheugdeug wa akhang" ngoonu" ri khanham we' abyid:.

¹²Houg: yoomo ngoonu" khyo" yo" bue" thang koid wa khyoo: gi ngoonu" dei nyid shi" uri ngei pyoo: tung" nyid wigi ge bue" yhi' koid wa nghoid ziri ngoo myid boin: bye:.

¹³Ngoonu" dangain" ngoonu" zei da" moo" gi zoo: wa shug wa pyoo: wa shid re" nghoid ca" wa. Hau: zigi Mangso da" jhungshug nghoid da:.

¹⁴Mangsoo koid zi ja: khang" moo" apyaid atoo: moo geing: teing jo, wa ziri ngoo se' da:. Nang wigi houg: moo daja: we ayo" lung kaid- daja: we ayo" yu pyam wa. Houg: lho: Mangsoo koid zi daja: gi ngoonu" wigi nyang: ri gyoug phoug" wa zi nghoid da:.

¹⁵Bue" ziyo' ge bue" lo zi ci: nghoid loug we' shid phyang" bain bue" lid: loo bye: zi nghoid da:. Mangsoo gi daja: kyeing" ziri doem bue" nhang: doem bui" nhang: koid nyid.

¹⁶Hau: tho' agoo"- he: mougmyid dang moo tarha" ziyo' jo zi shau" myang wa da" khoo: moo akhyeing" ashoeb da" khyoo: shau" myang ziri ngoo xoem" ci:.

¹⁷Ngoo gi ngoo nya: gung ri hid su" ein: tid «Mangsoo gi deungmain" su: yo' akhyeing" ashoeb su: ri dakhyo" za: dang phyed loo wa. Ciwim gari ja: khang" moo"- lo, moo" khang" moo" gi nyang: nya: shid re" asoo" to" to" da" ayo, moo bue" loo goo" wa.

¹⁸Ngoonu" gi gougnyhoug joem tho' ce: aje ge ziri ci: shug byid: wa shid re" Mangso wigi ngoonu" ri jham" yu" bye: khyoo: ri ngoo myid phyed bye:.

¹⁹Lo" thang moo byu xangsu: yo' gougnyhoug joem shid re" vhu" pi: lo, kyo' daja: kyeing" lang" nyid da:. Byu xangsu: gi gougnyhoug yo' dakhyo" za: shid: lo" da:. Nyangnu" daja: kyeing" da" dei noem nghoid ago". Byu xangsu: dayug gi gougnyhoug dadu: tho' ci: aje: jain" nghoid da:. Ciwim gari byu yo' gougnyhoug kha: ja: shid re" we' kangso' gi ce: dang: kang: athu nghoid da:.

²⁰Eig ja: goin" zhoo" phei" nghoid da" dajo, yoo khyoo: kyeing" za: lo" ago". Eig ja: goin" houg: mo re" lo wigi eig ja: goin" houg: khyoo: doem lo" ago".

²¹Byu dayug da" Venyi: gi tho' khyoo: do, lo" la- gougnyhoug dadu: da" soobyoo gi myid khoug: khyoo: gyoo" lo" la ein: ziri hang" khasu" tho' si' wa la".

²²Houg: yoomo ngoo gi ngoonu" moo" zei: da" gang mo yo" yu ziri pyoo: pyoo: yo" ci: yhung: lho: nyid zigi ge thang moo" zoo" nghoid ziri shau" myid boin:. Houg mo jain" lho: ngoonu" yo" koid zi ci: ajo,. Ngoonu" shid byug thang: ri ci: bui" loo wa ziri ngoonu" yo" si' wa khyoo: ajo, nghoid wa.