Read Lashi PHAJHI" DANG: 6 Bible Online

PHAJHI" DANG: 6 - Lashi bible

PHAJHI" DANG: 6

¹He: mougmyid tho' moo gye" xoo: sho' tarha" adeing byeung" zi koid thu to" ziri ngoo shau" myang bye:.

²Mangsoo gi byu dayug yug ri jonu" - ngi: shab khyoo:- ziyoo jonu" ri byid: da:. Nghoid bye:- nyang: vho: zi dangain" byid: da:. Nghoid loug we hau: ziri pyoo: pyoo: akyu" kham zoo: wa akhang" abyid: nghoid da:. Being" voo dayug gi gungthid khyo" hau: ziri pyoo: pyoo: kham zo: loo wa. Hau zigi akoem: nghoid da:. Hau: zigi ajo zi nghoid da:.

³Yuggi dayug gi nya: zoo: dashoo: yug yo" wigi ayo, myang" sho' dei nyid da:. Nghoid loug we' nyang: kha myhang dei nyid dei nyid nya: da" ngei pyo: zi ashau" yu wigi goo" lhoo' za: myhoeb shoung: zi ashau" nghoid rigi kang so, adei zi khu: da" zooshang: she' je ge nyid da:.

⁴Hau: zoonu" khu: re" zigi zoonu" shid re" ce: akyu" aboo. Nyang: gi moug: coid khoug: khyoo: byug vang lo" lho: nyang: ri coem' to" myhid pyam ago".

⁵Nyang: gi nyid gung bidbang ri khanham we' ashau" myang. Kangso' gyung: khyoo: ga: zi ci: te" zi nghoid ziri asi' nghoid da:. Nghoid loug we' atham: thang nyang: gi dougno: ziri shoug" yu abye:.

⁶Eig khyeing" zain: dei nyid loug we' kangso' gyung: khyoo: moo pyo: zi ashoug" da" su: tho' doug noo khyoo: ri je shoug" yu da:. Lo" thang moo gi nya: eig tang: goin" dajo, yoo khyoo: za loo" wa zi nghoid ago".

⁷Byu dayug gi zoo: wa shug wa toeb za: yoo" wa shid re" moo" zei: nghoid loug we' khanham we' tham: zo: ga: zi ajo,.

⁸Phajhi" juyhi: boo su: gi nheig agyeing: su: tho' khayhi' je ge nyid la". Sho" jhen: yug gi kangso' gyung: khyoo: ri khasu" koid wa ziri se' lho: ci: akyu" kham zoo: wa la".

⁹Hau: zigi akoem: nghoid da:. Hau: zigi lid ri cang khaid myheig ziyo' du da:. Nang yo" zi moo nheugshid: zigi goonoem daja: ja: ri khanham we myid vho: nyid tho' je ge da:.

¹⁰Bue" lo bye: da" ja: khang" moo" gi goonham' goo" co' mo soin: phyed too" gu: nghoid bye:. Houg: lho: byu dayug gi nya: tho' yoem: boo yug yo' ayo" ngeig ziri ngoonu" dangain" se' da:.

¹¹Nanu" je myang" sho' ngeig go" ri hau: zigi je akoem danghoid da:. Houg: lho: nang gi ci: aje gi.

¹²Yoeb byoo yo' dayhang: ti" lid: loo" bye: kangso' gyung: khyoo: nghoid da" nya: kangso' gyung: khyoo: akoem:- he: aleing" kyeing" da" ayo, moo byu dayug shid re" ce: ja: ge thang ziri khasu" yo" si' wa la". Byu dayug shid: byug thang: ri mougmyid dang moo cibue" wa ziri khasu" yo' si wa la".