Read Lashi PHAJHI" DANG: 8 Bible Online

PHAJHI" DANG: 8 - Lashi bible

PHAJHI" DANG: 8

¹Ja noem joeb gi ce: dang: kang: bo ziri phajhi" boo su: za: se' da:. Phajhi' juyhi: gi nyang: ri yi nhang: wigi nya: myonhoo: lang: mhug ci: ziri byug loo nhang: da:.

²Khokham tid ziri koid we'. Houg: lho: Mangsoo ri ahain: agyoin dangsoo" ciri" we pashau" byid:.

³Khokham gi nyang: nyang: koid nau da" moo" ciri we' yo" koid da:. Houg: yoomo nya: shidkhoin" mo thu' loo" we'. Houg: yhang: ti" gyoug ca" da" joyoo moo anyid nyid.

⁴Khokham gi amyeing" akhang" yo" koid da:. Houg: lho: nyang: koid ziri hang" we' pyi: ayo" shoo: nghoid da:.

⁵Nya: amyeing" dang: ri nang datam" gyo: nyid nyid gi nang moo goem loem da:. Houg: lho: phajhi" boo su: gi kha: ayo, ri khasu" koid wa ein: ziri se' da:.

⁶Ja: khang" moo" ri koid wa shid re" jo da" ayo, yo' jo da" akhyoo" jo, da:. Nghoid loug we' ngoonu" dajhi' kyeing" da se'.

⁷Ci bue" re" nyid ziri ngoonu" mo hang" we asi'. Houg: lho: ngoonu" ri tid kyoo" wa hang" anyid.

⁸Hang" we' nyang: nya: gung ri ashid: sho' ayo" koid. Nyang: shid: wa bidnyid ri we' ayo" shui". Shid: gyoin gi ngoonu" ayo" loid da" gyipui" nghoid da:. Ngoonu" gi houg: mo ayo" mhoug thu loo" nghoid da:.

⁹Mougmyid tho' moo koid nyid da" khyoo: joem ri ngoo myid yu" uri hau: gu: dangain" ri ngoo shau" myang. Mougmyid tho' mo byu dayham" gi yoem: so' yo" wigi dayham" gi nyangnu" da" vhoo moo kyi" khyeug yo' kham zo: nyid da:.

¹⁰Nghoid bye:- akhyeing" ashoeb da" byu yiri nyangnu" loeb moo yhe: myhoeb pyam kho' ziri ngoo myang. Nghoid loug we' loeb mo doem phang: tau" loo bang: gi houg: bang: akhyeing" ashoeb da" moo" ri koid kho' da" voomoo" khoug: moo: nyang: houg bang: ri coung" nyid boem ziri we' ngoo myang. Hau: zigi akoem: nghoid da:.

¹¹Byu yigi ciwim yoomo yooboo sho: moo" ri lei lei za: koid thu boem loug la". Ciwim gari yooboo moo" ri yooboo dam myab abyid: boem yoomo nghoid da:.

¹²Yooboo yoo" su: gi yooboo moo" ri dashoo: ja: koid loug dei ri dadei nyid shi" wa. O" nghoid bye:- nyangnu" citid ziri ngoo se'. Mangsoo ri nang tam" gyo: nghoid rigi ja: khang" moo" ci: aca" wa.

¹³Nghoid loug we' akhyeing" ashoeb bang: shid re" gi zi anghoid. Nyangnu" kangso' gyung: khyoo: gi bid yoeb yo' du wigi nyangnu" gi apyaid ngi shi" uri shid: byug wa. Ciwim gari nyangnu" gi Mangsoo ri atam" gyoo: yoomo nghoid» ga: tid.

¹⁴Nghoid loug we' he: zigi ce: dang: kang: aboo nghoid da:. Mougmyid tho moo cibue" nyid ziri yu" yu" we'. Dalheing: lheing: deungmain" yug gi akhyeing" ashoeb yug yooboo dam moo shau" phu" zo: da:. Houg: lho akhyeing" ashoeb yug gi deungmain" yug da" aphoug" jhungshug ri kham zo: da:. Hau: zigi akoem: nghoid ein: ngoo tid.

¹⁵Houg: yoomo ngoo gi byu dayug gi nyang: nya: gung ri pyoo: sho' nyid ca" da:. Ciwim ga: ri he kangso' gyung: khyoo: moo nyang: shoug" yu da" pyo: ja: ein: wa zigi zo: shug lho: nyang: nya: gung ri pyoo: pyoo: nyid zi za: nghoid da ein: goolhoo: za: shau" myid loem bye:. Nyang: ri Mangso wigi he: mougmyid dang moo byid: to" da" kangso' gyung: khyoo: gu moo moo" zei: myung: nyid uri neing: thang he: ziri yo" koid wa nghoid da:.

¹⁶Ngoo gi phajhi" boo wa shid re" yo' he: mougmyid dang moo ci bue" nyid ziri jhau" zhang: yu wa shid re" yoem: kaid khang" moo" byu gi myen" ri nyid" ri ayhoeb acoem" gyeing: lho:

¹⁷Mangsoo koid nyid ziri khanham we' ayo" se' gyoo: wa ein: ziri ngoo boin: bye:. Byu gi khayhi' yoem: kaid nghoid loug we' khanham we' shau" sho: myang wa zi anghoid. Phajhi" si bang: gi nyangnu" se' ga: tid fu" loug we' nyangnu" asi' nghoid ago".