Read Lashi PHAJHI" DANG: 9 Bible Online

PHAJHI" DANG: 9 - Lashi bible

PHAJHI" DANG: 9

¹Ngoo gi he: khyoo: ri myang" sho' gye" myid yu" ziyo' phajhi" bo deungmain" bang: zei: so" lo" da" lo, moo" joem ri nyangnu" da" jheddab myid yo' ngheing" da" myid rilang" gi Mangso wigi zei ci: ziri shau" myang bye:. Hang" we' nyang: nya: shid vhu" moo ci bui" wa zi asi' nghoid ago".

²Houg: moo adu go" zi ci: aboo nghoid da:. Deungmain" bang: yo' akhyeing" bang: jhang- gi bang: yo' agi bang: jhang- laloem lakhoug: boo bang: yo' aboo bang: jhang- xoin" ngei" byid: bang: yo' xoin" angei" byid: bang: jhang vhu" pi: lo, khyo' daja: kyeing" ju" loo wa. Byugi dayug gi yooboo yo" su: tho' aje gi. Jham' tang: dang: theing too" yug gi atoo" yug tho' je ge zi anghoid.

³Dangain" bang: jang" moo vhu" pi: lo, kyo' daja: za: ju" re" da:. Houg: lho: he: ziri mougmyid dang moo bue" da" ja: khang" moo" yo' dakhyo" shoid nyid da:. Byu joem dadei nyid nyid gi nyangnu" da" myid gi akhyeing" ashoeb ziyo ko" zi byeung" jo, ago". Houg: lho: nyangnu" gi nyeigdain tung" za: shid: lo" ago".

⁴Nghoid loug we' mougmyid tho moo dei nyid yug hang" nghoid loug we' myid byu wa zi daja: ja: yo" da:. Kangso' dei nyid da" lakhuid" gi shid: jo, da" khang: khyi: tho' je ge da:.

⁵Nghoid bye: dei nyid bang: gi nyangnu" shid: wa nghoid ziri se' ago". Nghoid loug we' shid: jo, bang: gi ci asi' nghoid ago". Nyangnu" gi je aphoug" jhungshug ayoo" nghoid ago". Nyangnu" ri bain sho' to" myid pyam ago".

⁶Nyangnu" da" jheddab myid- nyangnu" da" ngheing" khyoo:- nyangnu" da" vho: ngei khyoo: joem dangain" gi nyangnu" yo' dage" shid: byug da:. Nyangnu" gi he: mougmyid dang moo bue" zi ci: moo we' doem yo" bo boo wa zi anghoid.

⁷Shidkhyoo: xo' yhe: we' re" zoo: noem ri zo: lho: ngei pyo: nyid we' re" zabyid yhid: ri shug lho: pyo: nyid we' Hau: zi dangain" gi Mangsoo yo' nghoid da:.

⁸Khanham we' yu" pyoo: yu" ngei tung" nyid we'.

⁹He: mougmyid dang moo Mangso wigi nang ri byid: to" da" Kangso' gyung: khyoo: akoem: moo nang jheddab da" myiyi: myhi' yo' pyoo: pyoo: nyid we'. Hougmoo ce: akyu" abo da" akoem: bidnyid khang" moo" ri pyoo: pyoo: nyid we'. Ciwim gari hau: gu: gi re" yau: khe" kyi" khyeug dangain" da" gang mo nang yo" yu wa gu: dangain" nghoid abye:.

¹⁰Nang zei: da" moo" zoo" ci moo nghoid loug we' yoem: kaid wigi koid we'. Ciwim gari moovo moug: moo gi moo" zei: zi ajo, wa. Myid yu" zi ajo, wa lasi phajhi" ajo, wa Phajhi" juyhi: ajo, wa. Houg: lho: hau: joyoo gi nang yhe: loo" wa joyoo nghoid da:.

¹¹Ngoo boin: so" zi gootu: daloem gi he: mougmyid dang moo gye" yo" tang" bang: ajang" oung nyid wa zi anghoid. Gyi khaid sarhi' yi za: ajang" gyipui" oung: nyid wa zi anghoid ago". Phajhi" boo mo, ajang" we yoo" zoo: yoo" shug nyid wa zi anghoid. Yeig bang: ajang" jonu" yo" nyid wa zi anghoid. Ajang" we' aya: agyi:- age da" zhafa: gi yugkhang" moo" jang" moo se ju" da:.

¹²Re" da" ayo, ju" lo nyid ziri nang khanham we' asi nghoid da:. Ngho' joem gi lhid' moo nyeigdain tung" myi" boem ziyo' dakhyo"- goin moo wimdo, myi" ziyo' dakhyo"-ngoonu dajhi we' ajho: da" uri akhyeing" da" ayo, moo ngoonu" zang" myi" boem bye:.

¹³He: mougmyid yo' sen: wigi phajhi" khasu" akyu" bo da khyoo: dang: tu' gi ngoo myang zi gootu: daja: jo, ashi".

¹⁴Voobyu atung" myo: da" voozoo: daloem: jo, da:. Gye" yoem: so' gyi: da" khokham dayug gi hau: voo ri meing: zain: da:. Nyang: gi hau voogung ri lheing khoem to" lho: voogung vang khyam: ri phyo' thoid vang yhe: wa soin' da:.

¹⁵Houg: moo myung da" byu dayug nyid da:. Nghoid loug we' hau: voozoo: ri yo" khyoid yu wa yhi' nheig bo oung: gyeing: yug nghoid. Nghoid loug we' nyang: ri hang" we' amyid boin: goo" nghoid da:.

¹⁶Phajhi" gi yoem: so' tho' je ge ein: khanham we' ngoo dalhung tid nyid. Nghoid loug we' myung shoo" yug ri phajhi" bo ga: hang" amyed jhoo: yoomo nyang: tid ziri we' atam" gyoo: byid: nghoid ago".

¹⁷Koopyoid yi phung: moo vhoebkhang" su: dayug hau da" thui: tho' phajhi" bo yug da" nu" nham' da" dang: ri tam" gyo: wa zigi je ge da:.

¹⁸Phajhi" juyhi: gi gyi jonu" tho' je ge da:. Nghoid loug we' yooboo yoo" su: dayug gi ge ziri myoo" sho' ri yo" lhu: phyo' pyam da:.