Read Lashi SHOLUMON JIKHOIN" 1 Bible Online

SHOLUMON JIKHOIN" 1 - Lashi bible

SHOLUMON JIKHOIN" 1

¹Ge thang da" Sholumon jikhoin" dang:

²Re" nhoid yo' ngoo ri babug bug byid: bye:. Re" jheddab myid gi zabyid yhid: tho' je ge nyid da:.

³Nang joid ci: da" xu: gi gye nam pyo: nyid da:. Re" myeing khyang" gi hau: ziri boin: soo" nhang: nyid zi nghoid. Myiyi: dayug we' re" jheddab nheigloem: mo ayo" phang: loo" nghoid da:.

⁴Nang yo' dage" ngoo ri khe: yu wigi nyha" tang: phang: shang. Nga" khokham bue" lho: ngoo ri re" yab khyoo: shu" loo" we'. Nyha" tang: dage" pyoo: shang. Zabyid yhid: yed sho' shug lho: pyo: nyid shang. Myiyi: myhi' yi dangain" nang ri jheddab zigi ce: moug" cang aboo.

⁵Yerusalem mo myiyi: yi we" ngoo gi ceig ceig no, nghoid loug we' young" nyid. Kedara midcoo: boem" mo zoem" yhang: ti" ceig ceig no, nghoid loug we' Sholumon da" kho" khoug: mo khoem" goo pain" tho' re" gi je young".

⁶Ngoo ri bid zang" wigi shoo" no, yoomo ngoo ri ayu" ngi goo". Nga" mang: bang: ngoo ri nheig yo: wigi zabyid khyam: moo ngoo ri moo" koid nhang: bye:. Ngoo gi nga" gung shid re" shoung: wa ayo, ayo" byid: nghoid da:.

⁷Ngoo jheddab su: we" ngoo ri tid we' Re" yang phung: ri nang mhain" khayoo: yhe: shu" zhoo" wa lha". Nyid" dang: gung ri nyangnu" khayoo: vhoeb noo: wa la". Ciwim yoomo gootu: yang zung" bang: da" yang phung: khoug: moo nang ri ngoo shoo: wa shid re" ca" la".

⁸Myiyi: yi mo jheddab thang su: we" nang gi joyoo asi' rhe". Yang phung: thang: cang yhi: we'. Yang zung" bang: da" zoem" yam moo re" coidbaid joem shid re" coung" yoo gi jo, zi nghoid.

⁹Ngoo jheddab su: we"- Phara u da" myang: rheing" mo myang: loo: ri myang: myhi' gi nheig dab yhang: ti" nang gi yuggi yiri nheig dab nyid.

¹⁰Re" xam: gi re" baloid moo young" nyid da:. Re" leung zeing ju" sho' sheing: gyoo" re" wigi lug nyoug yhang: ti" du nyid da:.

¹¹Nghoid loug we' ngoonu" gi re" shid re" sheing: yi: yo' ngei khu joem koid byid: shi" wa zi nghoid.

¹²Nga" khokham gi nya: yhoeb yoo moo jhang" jo, uri nga" nam pyo: ja: gi lid moo nam pyo: nyid da:.

¹³Nga" jheddab su: gi nga" yang gang moo jhang" jo, uri Mura boo" yhang: ti" shoem: nam da:.

¹⁴Nga" jheddab gi Engedi zabyid khyam: moo jo, da" bain: boo" yo' du da:.

¹⁵Ngoo jheddab su: nang gi khayhi' young" nyid lha". re" myojid" we' jheddab myid yo' khayhi' bang nyid la".

¹⁶Ngoo jheddab su: nang gi khayhi' young" nyid lha". Ngoo ri khayhi' myid pyoo: nhang: nyid lha". Vufu" yoo gi nyha" da" yhoeb yoo nghoid da:.

¹⁷Gyoin: gam gi nyha" yhoem: da" khung: doem: nghoid lho: shithang: gam gi nyha" yhoem: da" moug: goo thi" nghoid nyid da:.