Read Lashi SHOLUMON JIKHOIN" 3 Bible Online

SHOLUMON JIKHOIN" 3 - Lashi bible

SHOLUMON JIKHOIN" 3

¹Nga" yhoeb yoo tho' moo myen khang" myen yhoeb wigi ngoo jheddab su: ri yhoebmo, myang zi nghoid. Ngoo nyang: ri cang sho: nghoid loug we' nyang: ri ashoug" myang nghoid da:.

²Ngoo gi voomoo" khoug: cang khyoo: cang yhoem: gyoo: cang thu so" yen" wigi ngoo gi ngoo jheddab su: ri cang shoo: bye: zi nghoid. Ngoo cang shoo: nghoid loug we' nyang: ri ashoug" myang nghoid da:.

³Voomoo" zung" bang: ri myang wigi ngoo gi nyangnu" ri nanu" nga" jhed ri abo myang goo" la" ein: myid: bye:.

⁴Nyangnu" yo' gang: go" thang: daso' zoo: ri nyang: ri ngoo shau" myang bye: zi nghoid. Ngoo nyang: ri zei: zeing wigi nga" myhi' da" yhoem: ngoo ri khu: kaid da" yab moo aju" ju" gi nyang: ri anhang: kaid zi nghoid.

⁵Yerusalem myiyi: myhi' yi we"- Nanu" gi ngoonu" da" jheddab myid ri aphyed pyam wa ein: shoocid: joem yo' xaid joem ri jham' tang: lho: ngoo ri dangsoo" khoin" byid: we'.

⁶Kid" ung" bang: oung" byid: da" nam pyo: Mura xu: myikhoug" pung yhang: ti" dain" pyoid yoo khyo" nam do, lo zigi cenoem nghoid lha".

⁷Sholumon gi nya: zhungtang moo zhoung: wigi dang lo nyid ago". Israela mung" mo reung: thang da" gyizoo: yi nghoid da" kangso' zung" bang: khyug xi: yug we' bo da:.

⁸Nyangnu" dangain" shamcoin" ci: wigi meing: zain: jang" moo seing" yang" bang: nghoid ago". Myen" ri thougtheung zain: bang: gye" bo wigi nyangnu" yugkhang" moo" gi shambyang ri voin ci: ago".

⁹Khokham Sholumon gi seig phau" thang ja: yo' koid da" zhungtang moo zhoung: wigi dang lo ago".

¹⁰Houg: da" zeing moo ngei yo' thoeb. Houg: atho' moo myhu" da" pain" gi sheing: khyeing: pain" nghoid. Hau: da" tang nhi" gi Yerusalem mo myiyi: myhi' yi jheddab myid yo' yo, to" da" khalham" void pain" nghoid da:.

¹¹Ziun myiyi: zoo: yi we"- re" wigi khokham Sholumon ri yu" ge'. Nyang: gi lo, xo' pui" koid da" pyo: thang goug thang nyid" ri nya: vhuloem moo nya: myhi' zhung" byid: da" bidmug ri zhung" ci: da:.