Read Lashi SHOLUMON JIKHOIN" 6 Bible Online

SHOLUMON JIKHOIN" 6 - Lashi bible

SHOLUMON JIKHOIN" 6

¹Myiyi: yi mo young" thang su: we"- re" jhed khakhyoo: yhe: loo" bye: lha". Ngoonu" we' nyang: ri bo pang" shoo: wa shid re" re" jhed khakhyoo: yhe: lo" ein: ziri ngoonu" ri tid kyoo" we'.

²Nga" jhed gi seig xu: gam yug da" nya: khyam: khyoo: yhe: loo" bye:. Nyang: gi khyam: khoug: moo gougnyhoug phung: ri voem: zho" nyid wigi myioeb bain: koid: zheing" nyid da:.

³Nga" jheddab su: gi ngoo seung: su: nghoid wigi ngoo ri we' nyang: seung: da:. Nyang: gi nya: gougnyhoug joem ri myioeb yoo moo coung" yhe: zho" nyid da:.

⁴Nga" jhed nang gi Tirza yhang: ti" young" wigi Yerusalem voomoo" yhang: ti" yu" jheddab tung" zi nghoid da:. Nang gi voomoo" zeing joem yhang: ti" moug: dei myid noin" lo" da:.

⁵Re" myojid" nga" jang" mo lheing: loo" we' hau: zigi ngoo ri tei" lhoung to" da:. Re" xam: joem gi Gilead boem yam cang go" xang" yen" da" coidbaid kyung yo' du da:.

⁶Re" zei joem gi gung cid" young" cid" lho' pyam bye: da" yang kyung yhang: ti" phyu: jo, da:. Hau: zigi dakhaid we' agyu" loo: za: dangain" zi joeb joeb yug jo, da:.

⁷Re" baloid gi re" myo, nghoeb za: pain" khoug: moo myi: su" bang nyid da:.

⁸Khokham jang" moo yhoem: seing: myhi' khyug xi: yug dangcang: myhi' shid xi: yo' zoomyi: yi atho' tid loo: sho' nyid nghoid loug we'

⁹Ngoo jheddab zigi dayug kyeing" danghoid ziyo' nyang: gi pheing" kyoug" yhang: ti" yu" jheddab toung" zi nghoid. Nyang: gi nya: yhid da" zoo: ti" zoo: nghoid da:. Nya: yhid da" jhed thang su: nghoid da:. Myiyi: yi dangain" nyang: ri myang lang" nyang: ri coung" nyid boem ago". Khokham myhi' yi yo' dangcang: myhi' yi nyang: ri jikhoin" khoin" wigi coung" nyid ago".

¹⁰Nyang: gi bid yo' lhammoo" yhang: ti" doug bang wigi young" gyeing: nyid. Gooyug hang" su: gi myo, myang yid, ti" yo" bang nyid wa la".

¹¹Langkhung" mo agam nu" joem ri yu" wa shid re" we'- zabyid gam moo afu' nu" yiri yu" wa shid re" we' lamei shigam moo aboo" ri yu" wa shid re" we' ngoo gi Lashab khyam: khyoo: gyoo" loo bye:.

¹²Ngoo gi seing" gug thung" nyid. Nang gi ngoo ri meing: zain: jang: khyoo: yhe: lo" da" gyi myang: rheing" yhang: ti" jheddab myid shid re" lhu: zhuang" byid: nyid.

¹³Shulam myiyi: nu" we"- goo" we' lhei' we'. Nang go" nyid ziri ngoonu" ri yu" nhang: we'. Ngoo byu myoo: sho' coem' yu" nyid da" agyo: moo go" nyid ziri nang cisu" wim yoomo yu" nau nyid lha".