Read Lashi ESAIA 1 Bible Online

ESAIA 1 - Lashi bible

ESAIA 1

¹He: mougsoug" pug moo Yuda khokham yi nghoid boem da" Uzia- Yotham- Ahaza- Hezekia bang: vhoebkhang" da" ayo, gyoo: moo Amoz da" yuggi zoo: Esaia ri Mangso wigi pang shug da" Yuda mung" yo' Yerusalem voomoo" khyoo: ri tid da" mungdang: joem bo nyid da:.

²ASEING gi «Mougkhung: yo myidjang we"- ngoo tid nyid ziri tam" gyoo: we'. Ngo wigi khu: gyi: kaid da" zooshang: yigi ngoo ri thougtheung gyi koid ago".

³Nu: joem gi nyangnu" ri hang" wigi seing: ziri se' lho: loo zei: joem gi nyangnu" aseing wigi nyangnu" ri khamoo voem: byid: zho" ziri se' ago". Hau: zigi nga" byumyu" Israela bang: se' tho' je se' da:. Nyangnu" dajhi' we' ase' gyoo: nghoid ago"» ga: tid.

⁴Yooboo koid da" byumyu" byo, yoin" ziyo' akhyeing" da" byumyu" nanu" we"- nanu" gi joem: byug abye:. Nanu" yooboo joem gi nanu" ri she: khyoid khyo' pyam abye:. Nanu" gi Israela da" gyeung" shang: da" ASEING Mangsoo ri ngeug he: pyam lho: nanu" gi nyang: ri nungthang phug pyam abye: go".

⁵Ciwim yoomo thougtheung gyi koid noug go" la". Yooboo dam je myoo: sho' byid: wa ziri nanu" vhoo: go" rhe". Israela we"- re" vhuloem gi dam khoo: za: byeung" sho' nghoid jo, abye:. Re" nheigloem: yo' myid gi no nyid abye:.

⁶Vhuloem mo khyid: ju" sho' ge zi dakhyi' we ajo, loo: nghoid da:. Nanu" gung gi thung" khyoid dam- dam joid- dam khoo: joem byeung" sho' nghoid abye:. Nanu" da" dam khoo: joem gi acid" sain' pyam- athoeb pyam yu" nghoid da:. Hau: joem ri macid" ajoid yu" nghoid ago".

⁷Nanu" mungdain: gi jham" coug: youg bue" byug wigi nanu" da" voomoo" joem gi myidgung mo nghe" gyo" pyam to" abye:. Nanu" yu" nyid uri nyang: tungbau byu yigi nanu" mungdain: ri seing: yu pyam lho: ja: khang" moo" ri phyo' shoin' pyam ago'.

⁸Goem loem wa joyoo ajo, da" zabyid khyam: zung” yug da" zang yo' tung: khoo" khyam: mo zoem" khyam" yhang: ti" Yerusalem za: deing jo, lho: hau: voomoo" ri we' vang: to" da:.

⁹Myhang: thang ASEING gi byu dayham" ri anyid deing nhang: nghoid rigi Yerusalem gi Sodom yo' Gomora yhang: ti" bain sho' phyo' shoin' pyam zi shoug" wa nghoid da:.

¹⁰Yerusalem we"- re" vhoebkhang" bang: yo' re" mung" byu yigi Sodom yo' Gomora mo bang: yo' du ago". ASEING nanu" ri tid nyid ziri tam” gyoo: ge'. Ngoonu" Mangsoo gi nanu" ri jhau" shed nyid ziri nyeing" gyo: yu we'.

¹¹Nyang: tid zigi «Nanu" ngoo ri ngei" byid: nyid boem da" xoin" hau: joem dangain" ri ngoo vho: da: ein: jhoo: go" rhe". Nanu" xoin" khyo" nghe' ngei" da" yang joem yo’ young" da" gougnyhoug joem da" xu: tho' ngoo je yo" da:. Ngoo gi nu loo: joem yang joem coidbaid joem da" suid" ri ngheing" bye:.

¹²Nanu" ngoo ri noku coung" wa re" boem uri he: joem dangain" ri nga" jhang ci: ri" wa shid re" nanu" ri hang" mho' la". Nga" Noku Yhoem: Moo" he: gu: ri koid wigi re" nang nhe" pyam wa hang" mho' la".

¹³Nanu" ci: re" da" xoin" joem gi aji amyed danghoid. Nanu" nghe' ngei" da" shoem: nam pyo: xu: shoem: ri we' ngoo ngheing" bye:. Ngoo gi: nanu" da" lhammoo" xain" pui"- Dougno: Bidnyid yo' nanu" da" noku thung" khyo" foem: phung: jang" moo ngoo anau bo boo. Hau: joem gi nanu" da" yooboo joem yoomo dangain" byo, yoin" byug abye:.

¹⁴Nanu" da" lhammoo" xain" pui" joem yo' gyeung" shang: bidnyid joem ri ngoo ngheing" da:. Hau: joem gi ngoo voin lid: nyid da" yoovoin lid: nghoid ago".

¹⁵«Nanu" lo, tu: wigi akyu" mho' boem uri nanu" ri ngoo ayu" wa. Nanu" khayhi' akyu" mho' mho' atam" gyoo: byid: wa. Ciwim gari nanu" lo, gi suid" za: nghoid ago".

¹⁶Nanu" nya: gung ri sain' sho' koid pyam ge'. Nanu" koid nyid ziri ngoo myang da" he: akhyeing" da" moo" dangain" ri theing: pyam ge'. Nghoid bye:- akhyeing" da" moo" ri theing: pyam lho:

¹⁷Jo zi koid wa zhang: yu we'. Tarha" deingmain" ziri cang ge'. Doin: zeig zoo: shoug" bang: ri pang" thoug byid: we'. Coug" zoo: yiri nyangnu" yo" yu eung: da" akhang" ri byid: we'. Coug moo" yiri goem loem byid: ge'» ga: tid.

¹⁸ASEING gi «Akhid" hau: moo" ri sho' pyam boem ge'. Nanu" yooboo gi suid" su" ne dab jo, nghoid loug we' ngoo gi nanu" ri gyu: yhang: ti" phyu: sho' cid" pyam byid: wa. Nanu" byang: byang: ni sho' dab nghoid loug we' yang moug" yhang: ti" phyu: loo goo" wa.

¹⁹Nanu" ngoo ri tam gyo: nghoid rigi myidgung mo thu da shivoo: shiloem ge thang ziri shoug" zo: loo goo" wa.

²⁰Nghoid loug we' nanu" ngoo ri aphoug" thougtheung boem nghoid rigi nanu" shid: doem goo" wa. Ngoo ASEING tid too" bye:» ga: tid da:.

²¹Shid phyang" jhug zug lo da" voomoo" gi shava myhi' yhang: ti" koid nyid wa. Shid phyang" dalheing: gi hau: voomoo" moo deingmain" bang: byeung" sho' nyid lid: lo nghoid loug we' akhid" gi byu said bang: kyeing" nyid deing jo, ago".

²²Yerusalem we" goonham' nang gi ngei yo' du lid: lo da:. Nghoid loug we' akhid" nang gi ce: phoug" adab loo: nghoid da:. Nang gi zabyid yhid: gi yo’ du loo bye:. Nghoid loug we' akhid" nang gi gyid cen: danghoid lo: da:.

²³Re" vhujhung: yigi thougtheung gyi koid mo, yo’ khoug" hoeb yi da" byencang" yi za: nghoid ago". Nyangnu" gi khanham we' jhungshug joem yo’ khougvhoid joem ri kham: yu mo, nghoid ago". Nyangnu" gi coug" zoo: yiri tarha" yung" moo khanham we' abo goem loem byid:. Cougmoo" yi da" moo" ri khanham we atam" gyoo byid: bang: nghoid ago".

²⁴Houg: yoomo akhid" myhang: thang ASEING Israela da" yoem: so' bo da" Mangsoo tid nyid ziri tam" gyoo: we'. «Nga" gyivoo yi nghoid da" nanu" adang moo ngoo latoo: phug wa. Houg: lho: nang gi ngoo ri kyi" khyeug abyid: loo: wa.

²⁵Ngoo gi nang ri thougtheung dang: phyed byid: wa. Ngoo gi joto' ri kyeing sain' yhang: ti" nang ri we' kyeing sain' lho: re" da" ayung" alho' ziri khyoid pyam byid: wa.

²⁶Goonham' nang lhoung yo" yu" da" bang: yhang: te" da" vhoebkhang" bang: yo' phajhi" byid: bang: ri nang ri ngoo byid: wa. Houg: lang" Yerusalem gi deungmain" jhug zug da" voomoo" ga: myheing zi shoug" wa» ga: tid da:.

²⁷ASEING gi deingmain" yug nghoid yoomo nyang: gi Yerusalem ri we' houg moo nyid da" nheigloem: thid loo bang: yugkhang" moo" ri khyoid yu wa.

²⁸Nghoid loug we' yooboo koid bang: yo’ nyang: ri thougtheung gyi koid bang: yugkhang" moo" rigi khyoeb mhoin’ pyam loo wa. Nyang: ri she: pyam bang: yugkhang" moo" ri nyang: said pyam loo: wa.

²⁹Seiggam joem yo' sho" to" da" gyeung" shang: khyam: joem ri nang noku coung" lo ziri nang nheig koug loo wa.

³⁰Nang gi shid: lo" nyid da" shookhi" gam yo' hang" wigi we' gyid ashoin" da" bain: khyam: yo’ dakhyoo" ti" nyhau" shu: loo" wa.

³¹Myijhen" wigi zain nge" lo da" khoofoo: yo’ dakhyo" za: yoem: so' gyi: da" bang: gi nyangnu" nya: akhyeing" da" lo, moo" wigi phyo' shoin' pyam shoug" loo goo" wa. Hau: byo, yoin" khyoo: ri hang" we' ayo" toem' pyam goo" wa.