Read Lashi ESAIA 13 Bible Online

ESAIA 13 - Lashi bible

ESAIA 13

¹ He: zigi Amoz da" yuggi zoo: Esaia gi Mangso jang" mo kham: yu da" Babelon yo' sen: da" mungdang: nghoid da:.

²Pyoid pyoid da" bouggung tho moo meing: zain pui dung khoin: ri tu: shab too" ge'. Nghoid boin: da" voomoo" khoem" moo" duang: joem ri khaid zain: wa nyangnu" ri aved byid: da" khyo" gyizoo: yiri zeig nyhoo: nhang: lho: nanu" lo, ri tu: too" ge'.

³Gyeung" shang: da" gyipui" ri khaid zain: wa yo' nyang: nheig yo: da" bang: ri yooboo dam byid: wa shid re" nya: da" nghoid boin: wigi loem ge" da" gyizoo: yiri ASEING khe: thu kaid abye:.

⁴Boem joem atho' mo mung" byu phung: mo" da" thui:- byumyu" yo' mungdain: joem zeing: foem: nyid da" thui: ri tam" gyoo: ge'. ASEING da" gyidab joem gi gyi khaid pui" shid re" nya: gyiphung: ri soin' nyid da:.

⁵Nyangnu" gi mougmyid athang: moo jo, da" mungdain: joem mo ju" re" nyid ago". Nya: nheig yo: zigi mungdain: goin" ri phyo' shoin' pyam wa shid re" ASEING ju" re" nyid da:.

⁶ No wigi kyi: ngoug ge'. Yoem moo" yo' phyo' shoin' wa nghoid da" ASEING da bidnyid gi jhang re" nyid bye:.

⁷Yugkhang" moo" da" lo, gi gyau: loo" khare" lho: yugkhang" moo" da" yoem: gi gyau: loo" khari" wa.

⁸Nyangnu" dangain" gyoug boem wigi zookhu: noo no da" myiyi: yo' dakhyo" no zi shau" boem goo" wa. Nyangnu" nyang: cang" gyoug wigi yu" loo goo" wa. Nyangnu" da" myonhoo: gi sho' ziyo' nge" nyid boem wa.

⁹Nya: da" nheig joem: khoo" khoo" yo: ziyo' atho' tid loo sho' nheigloem: yoin da" bidnyid nghoid da" ASEING bidnyid gi ju" loo nyid da:. Mougmyid gi dain" pyoid yoo bue" lo" byug wigi yooboo yo" da" yugkhang" moo" ri said toem" pyam zi shau" wa.

¹⁰ Kyi: cab khang" moo" yo' kyi: phung khang" moo" bang zi theing: pyam boem goo" wa. Bid thu ri" loug moug: coid loo" khari" wa. Lhammoo" gi bang loo: wa zi anghoid.

¹¹ASEING gi «Mougmyid ri kyi" khyeug zi bue" ri" nhang: wigi akhyeing" da" byu dangain" ri nyangnu" da" yooboo shid re" yooboo dam byid: wa. Nghoid boin: bang: yugkhang" moo" ri ngoo doin: nyhoem: khyo' pyam lho: phoug: mo, yo' anoug akhyoid koid bang: yugkhang" moo" ri yooboo dam byid: wa.

¹²Kangso' dei lho: nyid deing gyoo" bang: gi sheing: tho' je neing: loo" khari" wa.

¹³Mougkhung: ri ngoo nhoin' kaid wa ziyo' myhang: thang ASEING ngoo gi nga" nheig yo: ziri ci: shu' byid: da" bidnyid moo myidgung gi nya: joyoo moo loeb noin" thu loo wa.

¹⁴Babelon moo nyid boem da" tungbau byu yigi shoo" kuang su: lo, mo phang: sain" loid lo" da" shoocid: joem yo' dakhyoo"- Yang zung" su: abo da" yang joem yo' dakhyoo" nyangnu" mungdain: khyoo: tang" phang: loo" goo" wa.

¹⁵Shau" myheig yu da" yugkhang" moo" gi shamcoin" thau" said pyam zi shau" boem wa.

¹⁶Nyangnu" asho" ajhen: yu" nyid uri nyangnu" da" noug" nu" yigi baid mhoin' said pyam zi shoug" goo" wa. Nyangnu" da" yhoem: joem gi lhoid yu pyam zi shoug" lho: nyangnu" da" yhoem: seing: myhi' yi ri rue" pyam zi shoug" wa» ga: tid.

¹⁷ASEING gi «Babelon ri gyi zain: wa shid re" Medi ri lhu: zhuang" kaid da:. Nyangnu" gi ngei ri ci: asoin:- sheing: wigi nyangnu" ri ayo" jham" yu" nghoid da:.

¹⁸Nyangnu" da" lid: yo' myoo: joem wigi zoolu: yiri said pyam boem goo" wa. Nyangnu" gi zoonu" yiri nheig khyeug myid aboo goo" wa. Zooshang: nu" yiri nheig akhyeug goo" wa.

¹⁹ Babelon gi mungdain: dangain" tho' yung" thang da" mungdain: nghoid da:. Hau: zigi nya: byumyu" yi da" nghoid boin: wa khyoo: nghoid da:. Nghoid loug we' Sodom yo' Gomora ri ngoo koid lo: bye: ziyo' dayhang: ti" ngoo ASEING gi Babelon ri phyo' sain" pyam wa.

²⁰Houg moo hang" we adoem nyid loo: wa. So" lam" yen" da" Arab kha: yug we hougmoo: nya: zoem" ri akoid wa. yang zung" bang: hang" dayug we' houg moo nya: yang joem ri coung" azhoo" loo: wa.

²¹ Hau: joyoo gi dain" pyoid yoomo nyid da" gougnyhoug joem nyid joyoo bue" wigi khung" boeb joem gi houg moo nyangnu" da" soid koid goo" wa. Gola-ug ngho' joem gi houg moo nyid re" boem goo" wa. Coidbaid lam" joem gi byo, yoin" jo, da" khyo" thu byam lid loo" goo" wa.

²²Gyipyu, zung joem yo' khokham kho" joem gi khuid" koo" yo' siyoo lakhuid" joem myeing thui: lang: thang: tu" thui: gi yheing: ga: jo, wa. Babelon da" ayo gi ju" abye:. Nya: bidnyid gi thang lo" abye:» ga: tid da:.