Read Lashi ESAIA 16 Bible Online

ESAIA 16 - Lashi bible

ESAIA 16

¹Dain" pyoid yoo moo jo, da" Sela voogung mo Moba byu yigi jhungshug khyo" yang nu" dadu: ri Yerusalem moo vhoeb nyid da" su: ri byid: kaid da:.

²Nyangnu" gi Arnon gyid yam moo lang" nyid boem wigi ngho' soid mo khaid thu pyam shau" da" ngho' joem yhang: ti" myid byu khyoo: atoo" loo: za: thu: khyoo: hid khyoo: lam" yen" ago".

³Nyangnu" gi Yuda byu yiri «Khasu" koid wa ziri ngoonu" ri tid we'. Nyid" gung bid lung yo, moo jham" da" bid shoem yoeb byid: da" seiggam yo' dayhang: ti" ngoonu" ri goo byid: goola. Nanu" da" bid shoem: yoeb mo ngoonu" ri dougnoo: nhang: goola. Ngoonu" gi gyi phang: phang: mo, nghoid. Ngoonu" ri hang" ashau" myang wa da" joyoo moo nyhoem" too" goola.

⁴Nanu" da" mungdain: moo ngoonu" ri nyid nhang: la. Ngoonu" ri phyo' shoin' pyam nau boem mo, da" lo, mo ngoonu" ri goem loem byid: goola» ga: tid ago". (Zeug zo: ziyo' phyo' shoin' pyam zigi bei: byug wa. Mungdain: ri phyo' shoin' bang: we' thang lo" byug wa.

⁵Houg: lang" David da" amyed ashen yi mo dayug gi khokham bue" re" lho: nyang: gi mung" byu yiri jhug zug ziyo' jheddab myid yo' vhoebkhang" loo wa. Nyang: gi jo ziri koid wa shid re" myab loo wa. Tarha" nyeung veung" ziri myang ri" wa.)

⁶Yuda byumyu" yigi «Moba byumyu" yi khayhi' nghoid boin: boem da" thui: ri ngoonu" shoug" gyoo bye:. Nyangnu" nghoid boin: lho: phau: mo, nghoid boem ziri ngoonu" se' da:. Nghoid loug we' nyangnu" phau: zigi akoem: nghoid ago"» ga: tid ago".

⁷Nyangnu" yau: khe" kyi" khyeug yoomo Moba byumyu" yi ngau loo goo" wa. Kira Heresa voomoo" moo nyangnu" lhoung zo: boem da" zoo: noem gi ri myid boin: lang" nyangnu" dangain" ngau loo goo" wa. Nyangnu" nheigloem: thang byug loo goo" wa.

⁸Heshbon nam mo yoothung" joem Sibma mo zabyid khyam: joem gi phyo' shoin' pyam shoug" ago". Hau: zabyid khyam: mo zabyid yhid: gi byumyu" yiri vhoeb da" bang: ri shug yed nhang: ago". Goonham' zabyid nei joem gi Yezera voomoo" ju" sho' bidthu shoid dain" pyoid yoo ju" sho' bidvang shoid thoem" shid: thu: tab ju" sho' nei byab yhe: da:.

⁹Akhid" ngoo gi Yezera shid re" ngau ziyo' dakhyoo" ti" Sibma zabyid nei joem shid re" ngau da:. Nga" ngoug byid joem gi Heshbon yo' Eleale dang moo gyo" zang" bye:. Ciwim gari mung" byu yiri ngei bu: nhang: da" zabyid phyo' yo, ajo, wa.

¹⁰Akhid" myid xu: ge da yoothung" joem moo hang" abu: loo:. Zabyid khyam: joem moo hang" we' nyho: lho: jikhoin" we' akhoin" loo. Zabyid yhid: koid wa zabyid hang" anang: loo:. Ngei pyo: wigi nyho: da" thui: gi thang lo" byug bye:.

¹¹Ngoo gi Moba shid re" nheig koug ziyo Kira Heresa shid re" koug ngau ziyo noo kyeing" kyeing" da:.

¹²Moba byu yigi nyangnu" da" boem tho' mo phoin: yhoem: khyoo: yhe: wigi nyangnu" gung mo byimi ri khyoid lho: nyangnu" noku yhoem: khyoo: akyu" mho' wa shid re" yhe: nghoid loug we' nyangnu" shid re" ce: akyu" aboo wa.

¹³Hau: zigi Moba yo' sen: wigi ASEING wigi no, re byid: to" da" mungdang: nghoid da:.

¹⁴Akhid" ASEING gi «Soem" zain khoug: moo nyang: Moba da" gye" myo da" jonu" joem gi bei: byug wa. Hau: byu joem mo dajhi' kyeing" nyid deing wa. Nyangnu" gi yoem: neing: mo, nghoid loo goo" wa» ga: tid da:.