Read Lashi ESAIA 17 Bible Online

ESAIA 17 - Lashi bible

ESAIA 17

¹ASEING gi «Damasku gi voogung anghoid byug loo wa. Hau: zigi byo, gyoeb boem jo, wa.

²Suri voomoo" joem gi apyaid atoo: moo jham" coug: youg bue" jo, wa. Hau: joem gi yang yo' nu: joem shid re" coung" yoo bue" byug wa. Hau: joem ri hang" we' akhaid pyam goo” wa.

³Israela gi goem loem khyoo: ajo, wa. Damasku gi loid byoin khyoo: byug byug wa. Nyid deing da" Suri byu yigi Israela byu yi yo' dayhang: ti" ngi: yoem" loo wa. Ngoo myhang: thang ASEING tid bye:» ga: tid.

⁴ASEING gi «Israela da" gyi: sheung: zigi thang byoug lho: nya: jonu" ri myung sho" ziyo' thid pyam wa bidnyid ju" lo nyid bye:.

⁵Israela gi Rephim lang: khung" moo jo, da" yoothung" joem mo gug bain yham" wigi koid: zheing" pyam uri jham" coug: youg bue" jo, yhang: ti" gug bain yham" yu da" yoothung" yo' du loo wa.

⁶Byu dajhi' za: nyid deing goo" wa. Israela gi agam vhu" moo eig soem" cab- anghoid lang" vhoo: mo akung joem moo dajhi' za: dadeing loo sho' zhainloin: shi" dangain" ri phyo' pyam da" zhainloin: gam yo' du loo wa. Ngoo Israela ASEING Mangsoo tid too" bye:» ga: tid.

⁷Hau: bidnyid ju" loo lang" byu yigi Israela da" gyeung" shang: Mangsoo- nyangnu" da" phain" so: su: shoid khyoo: pang" thoug wa shid re" phug loo goo" wa.

⁸Nyangnu" nya: lo, wigi koid to" da" phoin: joem ri nyangnu" anghi: loo wa. Nyangnu" lo, wigi koid to" da" yu phara" myhi' Ashera da" soolhoo: joem yo' shoem nam pyo: ja: nghe' ngei" da" phoin: joem ri aloem akhoug: loo: nghoid ago".

⁹Hau: bidnyid ju" loo lang" nyeing" za: goem loem to" da" voomoo" joem gi jham" coug: youg bue" lo" byug wigi Israela byu yi mo nyangnu" phang: lo" boem uri Hivi byu yi yo' Amori byu yi wigi she: pyam too" kho' boem da" voomoo" joem yhang: ti" byo, yoin" jo, wa.

¹⁰Israela we"- nang ri khyoid yu su: yo' geing: teing da" lugboem moo" yo' dayhang: ti" nang ri goem loem byid: su: Mangsoo ri nang to" myhed pyam abye:. Hau: gungthid tungbau yu phara" joem ri no' wa shid re" gyeung" shang: da" bain: khyam: joem ri nang sho" da:.

¹¹Nang hau: joem ri sho" da" nab soin: ri nyang: hau: joem yug thu re" lho: aboo" bo" loo nghoid loug we' yham" yu zi ajo, wa. Hau: zigi yau: khi" yo' age byang" da" noo phyoo" za: bue" loo wa.

¹²Yoem: moo" bo da" byumyu" yigi panglai: gyid myeing thui: yo' dakhyoo" ti" myeing lho: panglai: being: lhung baid myheing thui yo' dakhyoo" ti" myeing nyid ago".

¹³Byumyu" yigi being: lhung" joem yo' dakhyo" jhen" yhe: lo" ago". Nghoid loug we' nyangnu" ri Mangso wigi nheig yo: kaid lho: boem khyid: mo pheilhoug: joem ri hau' tang" kaid ziyo' dakhyoo" ti" lid shoem' mo khoofoo: yo' dayhang: ti" nyangnu" doem tau" lo" ago".

¹⁴Myen" thang: zoo" moo nyangnu" wigi gyoug dain pho" zi bui" nhang: ago". Nghoid loug we' nab soin: lang" nyangnu" bei byug ago". Ngoonu" mungdain: ri phyo' zo: da" bang: yugkhang" moo" da" vhu" pi: lo, kyo' gi hougsu" nghoid da:.