Read Lashi ESAIA 18 Bible Online

ESAIA 18 - Lashi bible

ESAIA 18

¹Etiopi gyid gung: joem thu: tab moo jo da" mungdain: moo dung phab thui: shau" gyo: da:.

²Hau: mungdain: mo lagyoo: yigi gyidpheing" gam wigi koid to" da" poug khyo" Nila gyung: khyoo: gu: ju" gyoo" lo ago". Myab da" lagyoo: yi we" yhoem: khyoo: loo" ge'. Gyid gyung: joem wigi kho' to" da" nanu" mungdain: khyoo: yoem: bo lho: yoem: so' gyi: da" nanu" byumyu" yi jhang- mougmyid byu dangain" wigi coem' gyoug da" gung myhang: shoo" young" da" nanu" da" mung" byu yi jhang mungdang: doem voin tau" loo" ge'.

³Mougmyid tho' moo nyid da" yugkhang" moo" we" tam" gyoo: ge'. Boem gung joem adang moo to" to" da" asoo" dungkhoin: ri yu" we'. Laboo" moid thui: ri tam" gyoo: ge'.

⁴ASEING gi ngoo ri «Gug yhoem" yo, moo loem da" myen" ri nghain: khyo' yhang: ti" nyid" gung zoo" moo zho: lung byid: da" bid yo' dakhyo" ngoo gi mougkhung: mo yu" khyo' kaid wa.

⁵Zabyid shi" aphyo' yu shi" ri aboo" joem dangain" shu: gyo" lo" byug wigi zabyid shi" myeung nyid uri zabyid nei akung: joem ri sham: wigi zhaid phyid uri lei yhi' gyivoo yigi Etiopi byu yiri phyo' shoin' pyam wa.

⁶Nyangnu" da" gyizoo: yi manggung joem gi ngho' joem yo' siyoo gougnyhoug lam" joem shidkhoin" moo shid: leung jo, boem wa. Xung" gung ayo, moo ngho' joem zo: gyi: lho: ngam" yo, moo gougnyhoug joem zo: gyi: yu goo" wa» ga: tid.

⁷Gyid gyung: joem wigi kho' to" da" he: mungdain:- yoem: bo lho: yoem: so' gyi: da" byumyu" yi mougmyid byu dangain" wigi coem' gyoug da" gung myhang: shoo" young" da" mung" byu yi jang" mo he: xoin" joem ri myhang: thang ASEING shoug" kham yu wa da" ayo, ju" lo nyid da:. Nyangnu" gi myhang: thang da" ASEING ri coung: pid byid: da" joyoo Ziun boem khyoo: nyangnu" ju" lo boem goo" wa.