Read Lashi ESAIA 21 Bible Online

ESAIA 21 - Lashi bible

ESAIA 21

¹He: zigi Babelon byumyu" yi yo' sen: da" mungdang: nghoid. Dain" pyoid yoo mo moid lo da" lid shoem' yo' dakhyoo" yau: khi" gi gyoug pho" mungdain: mo ju" loo wa.

²Ngoo gi shen" yhen da" yoeb myang- gyivoo koid da" yoeb myang- byo, yoin" lo" da" yoeb myang joem ri shau" myang da:. Elam gyidab we"- khaid zain: we' Media gyidab we"- voomoo" joem ri vang: too" ge'. Babelon wigi bui" nhang: da" yau: khi" ri ASEING wigi thang loo" nyid wa.

³Ngoo shau" myang shoug" gyoo: da" yoeb myang gi ngoo ri gyoug nhang: wigi zoo khu: noo no da" myiyi yo' dayhang: ti" ngoo ri noo nhang: da:.

⁴Nga" vhuloem gi vhu" lheing: lheing: nyid wigi gyoug lho: ko' ko' nain" nyid. Ngoo gi myen" thang: ju" lo wa myid vho: nghoid loug we' ngoo ri gyoug zi za: bui" nhang: da:.

⁵Yoeb myang moo zoo: shug pui" gi jen" jen" nghoid jo, bye: da:. Being" voo yi zhung: wa soug" goug" joem ri pei: myu" to" ago". Nyangnu" zo: shug nyid ago". Nyeigdain thung" «Gyizoug: yi we"- nanu" da" goo joem ri soin ge» ga: amyeing" jhu: myeing thu re" da:.

⁶Houg: lang" ASEING gi ngoo ri «Yhe: wigi gyi zung" we'. Nyang: shau" myang ja: ri lu lo kyoo" wa nyang: ri tid we'.

⁷Nyang: gi eig yug yug jen wigi myang: dang moo re" nyid ziyo' loo zei: yo' Gola-ug dang mo byu yi zhung: wigi re" nyid zigi nyang: myang nghoid rigi nyang: gi houg bang: ri goo" lhoo' yu" ca" wa nghoid da» ga: tid da:.

⁸Gyi zung" su: gi «Nheigboo phoo we"- ngoo gi myen" ri nyid" ri yab jo, wigi zung" lo bye:» ga: tid.

⁹Nyeigdain tung"- houg bang: ju" re" ago". Eig yug yug jen wigi myang: dang moo zhung: re" ago" ga: lo tid kyo" da:. Gyi zung" su: gi «Babelon gyoeb byug abye:. Nyangnu" no' da" yu phara soolhoo: joem dangain" gi myidgung moo gyoeb moin" jo, abye:» ga: lu dang: lo tid kyo" da:.

¹⁰Nga" byumyu" Israela we"- nang gi sung: soo: ri yo' dakhyoo" nang: zi shoug" ago". Nghoid loug we' Israela da" Mangsoo- myhang: thang ASEING mo ngoo shau" gyo: yu da" lu dang: gi ri akhid" nanu" ri shoug" kyoo" byid: bye:.

¹¹He: zigi Edom yo' sen: da" mungdang: nghoid da:. Edom mo byu dayug gi «Gyi zung" su: we" myen" gi khayhi' myab wigi thang loo" wa la". Khayhi' myab wigi thang loo" wa khyoo: ngoo ri tid kyoo" la» ga: ngoo ri yoid tid da:.

¹²Ngoo gi «Nab soin: gi ju" re" nyid da:. Nghoid loug myen" we' doem ju" lo loo wa. Nang doem myid: noug wigi nghoid rigi tau" lo" wigi myid: we'» ein: phoug tid kaid da:.

¹³He: zigi Arabia yo' sen: da" mungdang: nghoid da:. Arabia mung" moug: gang: moo nyangnu" gyung: so" dab koid nyid boem da" Dedan byu yi we"-

¹⁴Nanu" jhang ju" re" da" gyid shed bang: ri gyid byid: jhug ge'. Tema mung" mo byumyu" yi nanu" we"- phang: khau: nyid bang: ri voem: byid: zhoo" ge'.

¹⁵Nyangnu" ri said pyam wa jen" jen" nghoid da" shamcoin" joem mo nyangnu" ri beig wa jen" jen" nghoid da" lid: joem mo meing: zain: pui" mo gyoug pho" ja: dangain" mo phang: loid wa shid re" mung" byu yi phang: yen" ago".

¹⁶Hau: thang: ASEING gi ngoo ri «Dazain toeb nghoid lang" Kedara byumyu" yi da gyi: sheung: zigi thang byug wa.

¹⁷Lid: beig bang: gi Kedara byu yi mo seing" yang" thang bang: nghoid ago". Nghoid loug we' houg bang: moo dayham" za: dadeing loo wa. Ngoo Israela ASEING Mangsoo tid too" bye:» ga: tid da:.