Read Lashi ESAIA 23 Bible Online

ESAIA 23 - Lashi bible

ESAIA 23

¹He: zigi Turu yo' Sen: da" mungdain: nghoid. Nammugdara tunggung moo nyid boem da lhid ku" bang: nanu" we"- koug wigi kyi: ngoug ge'. Nanu" yhoem: moug: Turu gyid gukhuang" gi phyo' shoin' pyam shau" abye: go". Yhoem: joem yo' gukhuang" joem gi byo, yoin" jo, abye:. Nanu" gyid sangphoo phung: yi Kuru mo doem tau" lo nyid uri hau: lu dang: ri nanu" shoug" gyoo: goo" wa.

²Sidon phaga: phung: yi nanu" we"- koug ngoug we'.

³Nanu" gi Egutu mung" mo sho" da" shivoo: ri qei yu wa yo' oung: wa byu yiri panglai: khyoo: gu: nhang: kaid lho: byumyu" dangain" yo' phaga: ga: wa shid re" nhang: kaid ago".

⁴Sidon voomoo" we"- nang ngi: yoem" abye:. Panglai: yo' no, da" nammugdara moo" gi nang ri ngeug he: pyam wigi «Ngoo gi zooshang: dayug we' ayo" yu"- ngoo gi yuggi zoo: myiyi: zoo: joem ri khanham we akhu: gyi: yu"» ga: tid da:.

⁵Turu ri phyo' shoin' pyam bye: ga: ziri nyangnu" shau" gyo: uri Egutu byu yi lang" dain mo, lo" wigi gyoug loo goo” wa.

⁶Phonisha byumyu" yi we" koug wigi kyi: ngoug ge'. Spain khyoo: phang: loid wa soin' ge'.

⁷Goonham' mo de: to" da" he: Turu voomoo" gi ngei pyo: yug yoo za: yo" jo, wa la". Koloni mungdain: tam: wa shid re" voobyu yiri panglai: gu phyed yhi: nhang: da" voomoo" yo" bui" wa la".

⁸Mougmyid dang moo ngi: shab byid: shoug" thang da" phaga khokham nu" yi nyid da" khosen voomoo" Turu dang moo he: gu: dangain" ri bui" nhang: wa soin' byid: yug gi hang" nghoid la".

⁹Myhang: thang ASEING gi hau: ziri soin' byid: su: nghoid da:. Nyangnu" koid lo da" moo" yoomo nghoid boin: boem ziri thang loo” nhang: wa yo' nyangnu" ngi: shab da" byu yiri ngi yoem" nhang: wa shid re" nyang: hau: ziri soin' to" zi nghoid da:.

¹⁰Spain mo Koloni byu yi we"- mungdain: ri khyam: yhe: koid zoo: ge'. Nanu" ri goem loem byid: wa byu hang" anyid loo.

¹¹ASEING gi nya: lo, ri panglai: tho' khyoo: yhoin" kaid wigi mungdain: joem ri tu: phug pyam abye. Phonisha byu yi phaga: moo" koid da" joyoo ajhung: joem ri phyo' pyam wa nyang: amyeing" byid: abye:.

¹²Sidon voomoo" we"- re" ngei pyo: zigi thang byug abye:. Re" mung" byu yigi zeig zo: zi shau" abye:. Nyangnu" Kuru khyoo: phang: loid yhi: nghoid loug we' goem loem zi nyangnu" ayoo" shi" goo" wa.

¹³(Kyang: da" gougnyhoug lam" joem ri Turu khyo" tang" lid: loo" nhang: su: gi Asuri byu anghoid- Babelon byu yi danghoid ago". Babelon byu yigi gyi pyuzung joem ri tu: to' lho: Turu da" gyidab voomoo" joem ri phyo' khyo' pyam wigi voomoo" ri byo, jo, nhang: mo, nghoid ago".)

¹⁴Nammugdara moo nyid boem da" gyid sangphoo gu bang: nanu" we" koug wigi kyi: ngoug we'. Nanu" nghe: khau: nyid da" voomoo" gi phyo' pyam zi shau" abye:.

¹⁵Khokham da" pyaid nghoid da" nyhed xi: zain Turu ri to" myhed too" shau" da" ayo, ju" lo wa. Hau: zain nyid joem lid: byug lang" Turu gi jikhoin" moo bo da" shava myhi' yo' dayhang: ti" nghoid loo wa.

¹⁶Sube" wigi to" myhid pyam bye: da" shava myhi' nang we"- re" teing ri koid: ci: wigi voogung moo so" lam" yen" we' Yuggi yiri re" jhang doem ri" nhang: wa shid re" teing baid wigi re" jikhoin" joem ri doem khoin" we'.

¹⁷Nyhed xi: zain thang lo" byug lang" ASEING gi Turu ri akhang: mo phaga: moo" moo doem koid nhang: wa. Nyang: nya: gung ri mougmyid mo mungdain: joem dangain" khyoo: shava myhi khyo" phaga: ga: loo goo" wa.

¹⁸Nyang: phaga: ga: wigi yo" da" ngei dangain" ASEING ri shugbyid: wa. Hau: ziri nyang: ayoung: too" wa. Nghoid loug we' ASEING ri noku bang: gi nya: ngei ri zoo: noem yo' nyangnu" ca" da" byimi qei jang" moo yhung: pyam loo goo" wa.