Read Lashi ESAIA 26 Bible Online

ESAIA 26 - Lashi bible

ESAIA 26

¹Byumyu" yigi Yuda mung" moo he: jikhoin" ri khoin" wa da" bidnyid ju" re" loo wa. Hau: zigi Nyangnu" voomoo" gi geing: da:. Mangsoo nyang: nyang: hau: vang joem ri goem loem byid: da:.

²Voomoo" khyam: khoem" joem ri phang ge'. Houg: lho: jhug zug da" byumyu" ri vang nhang: ge'. Hau: byumyu" gi deingmain" da" moo" zei: da:.

³Nang ASEING gi nyangnu" da" myid too" jang: ri teing teing koid wigi nang ri khau: nghi: bang: ri joeb byeung" da" ngei pyo: yug yo khyoo: byid: da:.

⁴ASEING moo apyaid atoo: khau: nghe: nyid ge'. Nyang: gi ngoonu" ri khanham we' goem loem byid: loo wa.

⁵Nyang: gi nghoid boin: bang: ri khyo' nyhoem: pyam wa. Nyangnu" nyid da" yoem bo da" voomoo" ri phyo' shoin' pyam abye:. Houg: lho: hau: vang joem ri pheilhoug: boem" khyoo: gyoeb gyoo" loo" nhang: bye:.

⁶Doin: zeig zo: zi shoug" kham bang: gi akhid" houg mo so" yen" ago". Nyangnu" khyid: yang: moo hau: ziri nang: nhe" pyam da:.

⁷ASEING we"- byugi yi shid re" khyoo: ri jhoid jhoid young" young" zi koid bye: da:. Nyangnu" so" da" khyoo: ri dam dam koid byid: da:.

⁸Ngoonu" gi re" myid vho: ziri cang lho: nang moo ngoonu" myid byu nyid. Nang gi ngoonu" myid vho: khyoo: dangain" nghoid da:.

⁹Nga" oungkhoug: nheigloem: dangain" yo' myen" ri nang ri ngoo lang" nyid. Mougmyid yo' mougmyid byu xangsu: yiri nang dang: phyed lang" Tarha" deingmain" khyoo: ri nyangnu" dangain" bang: jhau" yu loo goo" wa.

¹⁰Akhyeing" da" byu yiri nang nheig khyeug sho' nghoid loug we' nyangnu" jo zi koid wa khanham we' ajhau" yu goo" wa. Deingmain" da" byumyu" yi nyid boem da" he: mungdain: moo lang" nyangnu" shoid khyoo: koid nyid ashi". Re" da" gyi: myhang: khyoo: ri xoem" byid: wa shid re" nyangnu" he: ngeug pyam ago".

¹¹Nang wigi nyangnu" ri yooboo dam byid: wa ziri re" gyivoo yi asi nghoid ago". ASEING we"- nyangnu" ri sho' phu" nhang: wigi kyi" khyeug kham zoo: nhang: we' nang soin' to" da" yooboo dam nyangnu" ri kyi" khyeug kham zoo: nhang: wa. Re" byumyu" yiri nang khayhi' jheddab ziri nyangnu" ri ci: shug byid: we'.

¹²ASEING we"- nang gi ngoonu" ri jonu" byid: loo wa. Ngoonu" shoug" yu ja: ja: khang" moo" gi nang koid da" moo" zoo" athang: nghoid da:.

¹³Ngoonu" ASEING Mangsoo we"- ngoonu" gi gootu: bang: wigi vhoebkhang" zi shoug" loo bye:. Nghoid loug we' nang dayug za: ngoonu" ASEING nghoid da:.

¹⁴Akhid" nyangnu" shid: byug wigi adoem dei loo loo: wa. Nyangnu" da" soobyoo joem gi adoem to' loo loo: wa. Ciwim gari nang gi nyangnu" ri yooboo dam byid: wigi said toem" pyam yoomo nghoid. Nyangnu" ri hang" wigi we' amyid boin: loogoo" wa.

¹⁵ASEING we"- nang gi ngoonu" byumyu" ri myo: loug loo nhang: abye:. Hau: mougmyid ri shoid khang" moo" khyoo: lam: je: loo nhang: abye:. Houg: lho: hau: zigi nang ri ngi shab byid: abye:.

¹⁶ASEING we"- nang gi re" byumyu" ri yooboo dam byid: wigi yau: khi" moo nyangnu" nang ri akyu" mho' ago".

¹⁷ASEING we" «Nang gi zookhu: noo no da" myiyi: myhi' kyi: ngau yhang: ti" nang ngoonu" ri kyi: ngau nhang: abye:.

¹⁸Ngoonu" gi no wigi kyi" khyeug nyid bye:. Nghoid loug we' ngoonu" ci: akhu: thu kaid. Ngoonu" mungdain: shid re" oung: doid khyoo: ci: ayoo". Ngoonu" ci: we akoid pain' too".

¹⁹Ngoonu" byumyu" mo shid: bye: mo, gi doem dei loo wa. Nyangnu" manggung joem gi kangso doem bo loo wa. Nyangnu" loeb boug joem moo yhoeb jo, bang: dangain" gi boin: gyeing: to' re" wigi gau yi jikhoin" khoin" loo goo" wa. Nghain: joem gi myidgung ri jhu' nhang: ziyo' dayhang: ti" ASEING gi goonham' mo shid: jo, bang: ri doem dei loo nhang: wa.

²⁰Nga" byumyu" yi we' nanu" yhoem: khyoo: loo" we'. Houg: lho: khoem" myhid" pyam ge'. Mangsoo nheig joem: yo: zi lid: lo" da" ayo, ju" sho' nanu" daso' zoo: gau" nyid we'.

²¹Nyangnu" yooboo yoomo myidgung byu yiri yooboo dam byid: wa shid re" ASEING gi nyang: nyid da" joyoo- mougkhung: mungdain: mo re" nyid abye:. Myid gung tho mo zau" wigi gau" koid da" byu said mo, ri toin" shid byid: loo wa. Myid gung gi said pyam shoug" bye: bang: ri ashung: too" loo wa.