Read Lashi ESAIA 27 Bible Online

ESAIA 27 - Lashi bible

ESAIA 27

¹Hau: bidnyid moo ASEING gi nya: yoem: so' gyi: lho: shid: se' da" shamcoin" ri ci: wigi ne shoem' so" lheing: yen" da" main jung: Leviathan ri yooboo dam byid: loo wa. Panglai: moo nyid da" main jung: ri said pyam wa.

²Hau: bidnyid moo ASEING gi nya: pyo: da" zabyid khyam: yo' sen: wigi

³«Ngoo gi hau: ziri zung" wigi byeing abyid loo: gyid shoin" da:. Hang" we' hau ziri dam ayo" tab wa shid re" ngoo gi myen" ri nyid" ri lhoug zung" nyid.

⁴Ngoo gi zabyid khyam: ri nheig ayoo: loo wa. Houg moo zukyen: yo' siyoo zukyen: bain: gam joem wigi thougtheung zain: lang" za: hau: joem ri ngoo bain sho' nghe pyam wa.

⁵Nghoid loug we nga" byumyu" yi da" gyivoo yigi nga" goem loem khyoo: ri vho: nghoid rigi ngoo yo' meing: dam khyoo: ri nyangnu" koid nhang: wa. Nghoid bye:. Nyangnu" ri ngoo yo' meing: dam khyoo: ri koid nhang: ge'» ga: tid da:.

⁶Ju" lo wa da" bidnyid joem moo Yaku da" amyed ashen yi nghoid da" Israela byu yigi seiggam yo' dayhang: ti" agyi: cen' loo goo" wa. Nyangnu" gi aboo" bo" lo wigi athung dab loo wa. Hau: joem gi ashi" zei: byid: wigi myidgung byeung" sho' boem jo, lo goo" wa.

⁷Nya: gyivoo yiri gye" xoo: sho' yooboo dam byid wigi byu myoo" sho' shid: doem: loo" yhang: ti" ASEING gi Israela byumyu" yiri yooboo dam ashau" nhang: wa.

⁸Nyangnu" ri pyoung" shu" loo" nhang: pyam da" khyo" ASEING gi nya: byumyu" yiri yooboo dam byid: da:. Nyang: gi nyangnu" ri bidthu shoid mo thain da" lid wigi shu" lo" pyam nhang: wa.

⁹Nghoid loug we' Israela da" yooboo joem rigi tarha" tungbau yi da" phoin: lug boem joem gi shoofuid" lug khi' yo' dayhang: ti" gyoeb pyam wigi shoem: nam pyo: xu: nghe' ngei" da" phoin: joem yo' yu phara" myhi' Ashera da" soolhoo: joem adeing jo, loo lang" za: yooboo khyoid byid: zi shoug" wa.

¹⁰Gyidab voomoo" gi byo, jo abye:. Hau: zigi dain" pyoid yoo yo' dakhyoo" jham" coug: youg bue" jo, abye:. Hau: zigi nu: joem mhain" zoo: jang: bue" lo lho: nyangnu" hau: joyoo moo: mhain" lham" zo: wigi dougno: nyid ago".

¹¹Seiggam joem mo seig kung: joem gi yhau" wigi kyug lo" byug ago". Myiyi: yigi hau: ziri thang" sho: yu ago". Ciwim gari byumyu" yigi ci: we' ase' gyoo: goo" nghoid da:. Nyangnu" ri phain" so: su: Mangsoo gi nyangnu" ri nheig akhyeug wa nheig khyeug shoomyen: myid aci: shug byid: wa.

¹²Hau: bidnyid moo ASEING gi Uphrad lang mo zi Egutu mougkyoo" ju" sho' moo nyid da" nya: byumyu" yiri sungsoo: soem: yo' mo ziri khyen: kho' yu ziyo' dakhyo" dayug thang: dayug zheing" yu loo wa.

¹³Hau: bidnyid ju" lang" Asuri yo' Egutu mung" moo yhe: pyoung" shu" nyhid: too" shau" da" Israela byu dangain" ri doem khe: tau" yu wa laboo" ri moid loo goo” wa. Nyangnu" gi ASEING da" gyeung" shang: bouggung tho' mo jo, da" Yerusalem mo ASEING ri lo noku byid: loo goo" wa.