Read Lashi ESAIA 28 Bible Online

ESAIA 28 - Lashi bible

ESAIA 28

¹Israela mungdain: gi joem: abye:. Nya: da" yhid: yed: vhujhung: yi vhuloem moo zhung" ci: da" bidmug joem mo bain: boo" joem yo' dakhyo" nya: phung" yoeb gi yhau" lo" byug abye:. Nyangnu" nghoid boin: da" vhuloem joem gi shoem: nam pyo: ja: xu: joid to" ago". Nghoid loug we' nyangnu" ashid: asoo" yed leung jo, ago".

²ASEING gi nyangnu" ri gyi zain: wa shid re" jen" jen" nghoid da" yoem: bo wigi yoem: so' gyi: da" byu dayug yo" da:. Hau: yug gi leug voo yhang: ti"- moug: moo" yu: yhang: ti" gyid khyoid khyoid nhe' lo yhang: ti" ju" re" wigi mungdain: ri oung: nghoeb pyam wa.

³Hau: yhid: yed vhujhung: yi da" nghoid boin: zigi khyid: yang: moo nang: nhe" pyam zi shoug" goo" wa.

⁴Nghoid boin: da" vhujhung: yi da" phung" yoeb shoem: lo" zigi myheing yo' dage" phyo' zo: pyam da" lafoem' shi" amoin" yo' dakhyo" byug lo" byug wa.

⁵Myhang: thang da" ASEING gi nyid deing jo, boem da" nya: byumyu" yi shid re" phung" yoeb bo da" bidmug mo bain: boo" yo' dayhang: ti" nghoid wa da" bidnyid gi lo nyid da:.

⁶Nyang: gi tarha" agyi yi khyo" dei byid: da" bang: ri tarha" deingmain" ziri se' da" myid ri byid: lho: gyi zain: ziri voomoo" khoem" duang: joem moo goem loem byid: boem da" bang: ri yoem: byid: loo wa.

⁷Lapi: yi yo' khainjung yi lang" yhid: sung yed yoomo leung baid yeing" ago". Nyangnu" zabyid yhid: yo' yhid: jang" sung yed yoomo adu: adam: thung" leung ago". Lapi: yigi ASEING wigi byid: da" yoeb myang joem ri ase' gyoo: loo: sho' yhid: yed ago". Houg: lho: khainjung yigi nyangnu" jhang ci: re" da" moo" ri ayo" tid phoid: kyoo" loo: sho' yhid: yed ago".

⁸Nyangnu" zhung: da" zoobui" mo dug to" da" foo" boem za: byeung" sho' nghoid da:. Sain' zi dakhyi' we' adeing jo, loo nghoid da:.

⁹Nyangnu" gi nga" khyoo: ri myeing" myo: ago". Nyangnu" gi «Nyang: jhau" shid nyid zigi hang" bang: nghoid la". Nya: mungdang: ri hang" vho: nyid lha". Hau: zigi akhid" za: noug" kang" to" da" zoonu" yi shid re" za akyu" dabo da:.

¹⁰Nyang: gi lhid" cab dacab bain dacab- dajen bain dajen- akhyoo" daloem bain daloem ngoonu" ri jhau" byid: wa yoem: kaid nyid da» ga: tid ago".

¹¹Nanu" ngoo ri atam" gyoo: wa nghoid rigi Mangsoo gi nanu" ri jhau" wa shid re" agyo: yu" da" myeing" ri ci: da" tungbau byu yiri ci: loo wa.

¹²Nyang: gi nanu" dangain" bang: ri dougno: khyoo: yo' nheig teing khyoo: byid: da:. Nghoid loug we' nanu" nyang: ri atam" gyoo: loo: he: pyam ago".

¹³Houg: yoomo ASEING gi lhid" cab dacab bain dacab dajen bain dajen- akhyoo" daloem bain daloem: nanu" ri jhau" byid: loo wa. Hau: thang: nanu" gi khyid: byi ci" khang" moo" khyid: vhu" thoung" loo goo" wa. Nanu" gi dam dab goo" wa lhid' moo myi" goo" wa thung: tei" lhung zi shoug" kham zoo: goo" wa.

¹⁴Akhid" Yerusalem mo he: byumyu" yi adang mo vhoeb nyid da" khuang bang: we"- ASEING tid nyid ziri tam" gyoo: ge'.

¹⁵Shid: bang: yo' myid veing" khyoo: koid too" bye: Moovo moug: ju" sho' myid veing" khyoo: koid too" bye: ga: nanu" phau: ago". Yau: khi" kyi" khyeug ju" lo uri nanu" ri teing too" khoo' wa ga: gyeing" nyang: myid loem nyid ago". Ciwim gari nanu" ri goem loem byid: wa shid re" anghoid zi tid lho: mhoug fain" ziri nanu" khau: nghe: yoomo nghoid ago".

¹⁶Akhid" gyi: sheung: da" ASEING tid zigi «Ziun moo geing: teing yoem: gyi: da" apoem: ayang: daloem: tam to" da:. Houg moo ‹Geing teing da" loem khau: myid gi nheigloem: we' sheing: da› ga: lhid" tab to" da" ajhoin: lugzeing daloem: ri ngoo kaid to" da:.

¹⁷Tarha" nyeung veung" khyoo: gi apoem: ayang: shid re" laki yo' deingmain" zigi houg mo da" laki tei" nghoid wa» ga: tid da:. Leigvoo gi nanu" khau: nghe: da" mhoug khyoo: ri shoem" lo" byug wigi tigyid gi nanu" da" goem loem khyoo: ri phyo' shoin' pyam wa.

¹⁸Shid: bang: yo' nanu" koid to" da" myid veing" khyoo: gi yu pyam zi shau" wigi moovo moug: yo' koid to" da" nanu" da" myid veing" khyoo: gi toem pyam zi shoug" wa. Yau: khi" kyi" khyeug zi gyo" nhe" pyam lang" nanu" ri hau: ze wigi oung: pyam wa.

¹⁹Hau: zigi danab thang: danab xo' gi xo' gi nanu" ri baid lo wa. Nanu" gi myen" ri nyid" ri hau: ziri voin ca" goo" wa. ASEING mo ju" re" da" mungdang: aseig khoin" khang" moo" gi gyoug ci' ca" ja: aseig bui" nhang: loo wa.

²⁰Nanu" gi dang: zhoem' mo khyid: jhang" kaid wa sung leung" da" yhoeb cuang daloem: moo nya: gung ri phoem" wa sung nge da" mi yo' yhoeb wa soin' da" byu yo' du loo goo" wa.

²¹ASEING gi nyang: koid wa soin' to" da" moo" ri koid wa shid re" nyang: gi Perazim boem moo yo' Gibeon janggyoin: moo nyang: koid lo ziyo' dakhyo" khaid zain: loo wa. Nya: lo, moo" joem gi mau" pho" zi nghoid da:. Nyang: gi nya: da" mau" pho" moo" nghoid da" nya: moo" ri zei: pain' pyam loo wa.

²²Nanu" ri ngoo tid poin" byid: nyid ziri ayi juang" pyam goo". Nanu" hougsu" koid boem nghoid rigi nanu" phang: loid wa je wigi yau: loo wa. Myhang: thang ASEING gi mungdain: goin" ri phyo' shoin' pyam wa myid phyed da" khyoo: ri ngoo shau" gyo: too" bye:.

²³Ngoo tid nyid ziri tam" gyoo: we'. Ngoo nanu" ri tid nyid ziri nyeing" za: tam" gyoo: ge'.

²⁴Yoo koid zoo: su: hang" we' nya: yoothung" ri ajang" aphug. Shoo" wa hau: ziri ajang" asoin' too".

²⁵Nyangnu" nyang: gi myidgung ri phug ziyo' dage" pajhi" yo' sheingnham" yhang: te" nghang" pho myau: shi" joem ri nyang: lhung sain" da:. Nyang: gi sungsoo: yo' Yoono, ri ajen jen koid wigi sain" da:. Yoothung" gyoem: moo myau: shi" gootu: ri nyang: sain" da:.

²⁶Mangso wigi nyang: ri jhau" byid: too" bye: yoomo nya: moo" ri khasu" zei: wa nyang: se' da:.

²⁷Pajhi" shi" yo' sheingnham" shi" ri baid yu wa shid re" nyang: gi khanham we thung" keing: lid: zi aci: nghoid da:. Hau: gungthid nyang: gi du ge" da" voosi" soem" ziri ci: da:.

²⁸Nyang: gi hau ziri nang: wigi sungsoo: ri aze" shoin' pyam nghoid da:. Sungsoo: cab ri apyeig cab looza: rheing" koin" lid: wigi nang: wa ziri nyang: se' da:.

²⁹He: phajhi" dangain" gi myhang: thang ASEING mo ju" re zi nghoid da:. Mangso wigi soin' to" da" moo" gi phajhi" bo da:. Hau: zigi khanham we' oung: doid nyid ago".