Read Lashi ESAIA 29 Bible Online

ESAIA 29 - Lashi bible

ESAIA 29

¹Mangso da" phoin: nghoid da" Yerusalem gi joem: abye:. David da" dab voomoo" gi joem: abye:. Zooshug pui" yo' pui" joem koid wigi dazain thang: dazain lid: loo" nhang: we'.

²Houg: lho: «Mangso phoin:» ga: myheing da" voomoo" adang mo Mangsoo gi yau: khe" kyi" khyeug zi bui" nhang: da:. Houg mo koug ngau wigi ngougbyid ngougnhab gyo" boem goo" wa. Voomoo" goin" gi suid" za: nghoeb to" da phoin: yhang: ti" nghoid wa.

³Mangsoo gi voomoo" ri khaid zain: loo wa vang: to" wigi zung" nyid boem wa.

⁴Yerusalem gi soobyoo dadu: myid khau: mo dang: ji wa yoem: kaid nyid ziyo' dakhyo" pheilhoug: boem mo dang: so' so' nyid ziyo' dakhyoo" ti" nghoid loo wa.

⁵Yerusalem we"- Nang ri khaid zain: boem da" tungbau byu yi dangain" gi pheilhoug: yhang: ti" hau' tang" pyam lho: nyangnu" da" gyoug pho" da" gyizoo: yigi khoofoo: yo' dakhyoo" ti" dang: lo" byug goo" wa. Nyeigdain tung" ci: amyid to" uri

⁶Myhang: thang ASEING gi thain: da" mougkhung: lid yoem: yo' myid leig leig ziyo' nanu" ri khyoid yu goo" wa. Nyang: gi uglid yo' myi: ri khyo' kaid wa.

⁷Houg: lang" Mangso da" phoin: voomoo" ri khaid zain: nyid boem da" byumyu" yi da" gyizoo: yi dangain"- nyangnu" da" gyi jonu" dangain" yo' gyizi gyikhoo: ja: khang" moo" gi yhoebmo, yhang: ti" we' myen" ri shau" myid da" daja: ja: yhang: ti" we' bue" lo" byug wa.

⁸Yerusalem ri khaid zain: wa shid re" zeing: foem: nyid boem da" byu dayug zoo: noem zo: nyid da" yhoebmo, mo, wigi so" re" ri zooyoid da su: yhang: ti" we' gyid shed wigi shid: lo" nyid da" su: gyid shug nyid ga: yhoebmo, mo, wigi boin: so" lo ri khyung" kyug nyid su: yhang: ti" we' nghoid goo" wa.

⁹Xo' lho: ko" nyid ge'. Xo' lho: myo, jid nyid ge'. Zabyid yhid: aboo loug yed nyid ge'. Daja: we' ashug loug leung baid yeing" ge'.

¹⁰ASEING gi nanu" ri yhoeb noug noug nhang: wigi yhoeb moo" myid" nhang: wa jen" jen" koid to" abye:. Lapi: yigi byu yi da" myojid" joem nghoid ago". Nghoid loug we Mangsoo gi nyangnu" ri myo, thoeb too" byid: da:.

¹¹Lapi: dang: yo' sen: da" yoeb myang: khang" moo" da" dang: kang: gi nanu" ase' gyoo: sho' nyhoem" shoung: pyam wa. Hau: zigi dazid thung" to" da" mougsoug" deing: yo' du wa. Se' nghab da" byu dayug yug jhang hau: ziri nghab kyoo" wa yhe: mho' nghoid ri nyang: gi hau ziri dazid thung" too" yoomo nyang: ayo" nghab ga: tid loo wa.

¹²Ase' nghab da" byu dayug jhang hau: ziri ci: yhe: wigi nanu" ri nghab kyoo" wa yhe: mho' nghoid ri nyang: gi khasu" nghab wa nyang: asi' ga: tu" wa.

¹³ASEING tid zigi «He: byu yigi ngoo ri noku ga: tid ago". Nghoid loug we' nyangnu" da" dang: joem gi dang: kang: aboo nghoid ago". Nyangnu" nheigloem: gi gootu: moo nghoid nyid ago". Nyangnu" da" noku thung" gi akoem: nghoid da:. Nghoid loug we' nyangnu" yu" yu" za: myid boin: da" xangsu: byu tarha" yo' thung" ri: joem za: nghoid da:.

¹⁴Houg: lho: ngoo gi amyid to" da" ja: daloem: thang: daloem: wigi nyangnu" ri dain moug" nhang: wa. Phajhi" boo bang: ri koodoug: bui" loo" nhang: wa. Nyangnu" da" se' jhang: nheig bo: khyoo: dangain" gi ajain" bui" wa» ga: tid.

¹⁵Nyangnu" myid soin' da" khyoo: ri ASEING jang" mo nyhoem" shoung: too" bang: gi joem: lo" abye: go". Nyangnu" gi nyangnu" moo" zoo" ri khau" shoung: koid wigi nyangnu" ri hang" we' azang" myang nyangnu" koid nyid ziri hang" asi' wa ga: jho: ago".

¹⁶Nyangnu" gi ja: khang" moo" ri atoug" khyo" koid pyam ago". Oug" koid su: yo' myid zhoonhau: gi kha: loem: je yhouggyen: la". Byu gi «Ngoo ri phain" so: su: nang anghoid» ein: tid wa la". Anghoid lang" nyang: ri «Nyang: cikoid nyid ziri nang asi'» ein: yo" tid wa la".

¹⁷Dang khyang" moo seig moo" yoo gi atung" myang" ri tung: yoo bue" lo wigi tung: yoo gi seig moo" yoo bue" loo wa ga: tid ziyo' dakhyoo" ti" nghoid da:.

¹⁸Hau: bidnyid ju" loo lang" nu: jed bang: gi mougsoug" pug ri thui: gyi: yo' nghab ziri shoug" gyoo: wa. Moug: coid khoug: mo nyid nyid da" myo, jed gi nyangnu" myo, bang" lo wigi myang loo goo" wa.

¹⁹Myung bang: yo' nheigloem: nyhoem: khyo' bang: gi Israela da" gyeung" shang: da" ASEING Mangso wigi byid: da" ngei pyo: ziri doem shoug" yu loo wa.

²⁰Hau: zigi subi" gootu: ri zeig zoo: bang: yo' ASEING ri aphoug" akhyoid koid shug bang: da" lo" thang ayo, nghoid wa. Yooboo yoo" bang: yugkhang" moo" ri said toem" pyam wa.

²¹Mangsoo gi subi" gootu: ri shang tid pyang: bang:- yooboo koid bang: da" yooboo dam ri goem loem toem' pyam bang:- deingmain" bang: tarha" deingmain" zi ashau" yu sho' mhau' dang: tid bang: ri said toem" pyam loo wa.

²²Houg: yoomo akhid" yau: khi" mo, Abraham ri khyoid yu su: nghoid da" Israela da" ASEING Mangsoo gi «Nga" byumyu" yi we"- nanu gi ngi: yoem" zi shau" loo: goo" wa zi anghoid. Nanu" myonhoo: gi sho' phu" wigi shoem: loo wa zi anghoid.

²³Ngoo gi nanu" ri byid: wa da" zoonu" yiri nanu" shau" myang boem lang" ngoo gi Israela da" gyeung" shang: da" Mangsoo nghoid ziri nanu" yhen: yu loo goo" wa. Nanu" gi ngoo ri ngi: shab byid: wigi gyoug phoug" loo goo" wa.

²⁴Koo" bang: gi se' gyoo: wa shid re" zhang: yu loo goo" wa. Khanham we' myeing" myoo: bang: gi jhau" byid: ziri vho: ngei loo goo" wa.