Read Lashi ESAIA 3 Bible Online

ESAIA 3 - Lashi bible

ESAIA 3

¹Akhid" ASEING myhang: thang ASEING gi mung" byu yi khau: nghe: nyid boem da" ja: khang" moo" yo' yugkhang" moo ri Yerusalem yo' Yuda mung" mo yu pyam wa soin' abye:. Nyang: gi nyangnu" zoo: noem yo' shug gyid-

²nyangnu" da" myang: joem yo' nyangnu" da" gyizoo: yi nyangnu" da" tarha" agyi yi yo' nyangnu" da" lapi: yi nyangnu" da" boid phyed bang: yo' nyangnu" da" mung" byu yi

³nyangnu" da" gyiphung: yo' mung" vhoeb vhujhung: yi mungdain: akhyoo: koid bang: yo' akhyoo" ri khang" wa shid re" main tain: yu" bang: yugkhang" moo" ri yu pyam wa.

⁴ASEING gi nheig aboo shi" da" yuggi zoo: yi wigi mung byu yiri vhoeb khang” nhang: loo wa.

⁵Byu yugkhang" moo" gi gooji yugkhang" moo" tho' je doid lo goo" wa. Apyaid ngi bang: gi apyaid gyi: bang: ri aphoug" goo" wa. Byugang: yigi nyangnu" da" khyoo: shid vhu" shi: bang: ri aphoug" goo" wa.

⁶Byumyu" kung: da kung: moo bo boo mo, gi nyangnu" mo dayug ri khyen: yu lho: nyang: ri «Nang daja: khyalang" koid: void wigi he: yau: khi" joem shau" ayo, moo ngoonu" da" vhujhung: koid byid: la» ga: tid da" ayo, ju" loo wa.

⁷Nghoid loug we' nyang: gi «Ngoo ri akoid nhang: goo"- nanu" ri ngoo ayo" pang" byid:. Ngoo gi zoo: noem we' byimi we' ci: ayoo"- ngoo ri nanu" da" vhujhung: akoid nhang: goo"» ga: phug tid loo wa.

⁸Nghoid bye:- Yerusalem gi doem: abye:. Yuda gi leung gyoeb gyo" abye:. Nyangnu" tid ziyo' koid zi ja: khang" moo" gi ASEING ri thougtheung ago". Nyangnu" gi Mangsoo ri di: di: za: rue" pyam ago".

⁹Nyangnu" myonhoo: khyen: zigi nyangnu" ri thougtheung wa. Nyangnu" gi Sodom byu yi yhang: ti" di: di: nyang: yooboo koid boem ago". Nyangnu" gi doem: byug da:. Houg: lho: hau: ziri nyangnu" nya: adang moo kaid yu ago".

¹⁰Deingmain" bang: gi ngei pyo: loo goo” wa. Houg: lho: nyangnu" shid re" ja: khang" moo' ngei: lho' loo boem wa. Nyangnu" gi nyangnu" zei: da" moo" athang: pyoo: pyoo: shoug" kham zoo: wa.

¹¹Nghoid loug we' akhyeing" bang: gi doem byug ago". Nyangnu" wigi subi" ri koid lo yhang: ti" akhid" nyangnu" ri doem koid byid: zi shoug" loo goo" wa.

¹²Ngei jhid" zoo: bang: gi nga" byumyu" yiri doin: zeig zo: ago". Nyangnu" da" jhen: seing: yigi nyangnu" ri mhoug zo: ago". Nga" byumyu" yi we"- nanu" khakhyoo: ase' tau" loo" loo: sho' nanu" vhujhung: yigi nanu" ri khyoo: shu" vhang: ago".

¹³ASEING gi nya: moo" zoo” ri tid wa jen" abye:. Nyang: gi nya: byumyu" ri dang: phyed wa jen" abye:.

¹⁴ASEING gi nya: byumyu" yi da" ludaid yi yo' vhujhung: yiri dang: phyed wa shu" lo da:. Nyang: gi hidsu" ga: yooboo zhug abye:. «Nanu" gi zabyid khyam: joem ri lhoid yu ago". Nanu" yhoem: gi sho" jhen: bang: mo lhoid yu da" zi joem kaid pyeing to" ago".

¹⁵Nanu" gi nga" byu yiri doin: khyoeb pyam wa yo' sho" jhen: bang: ri jhoeb zoo: wa akhang" ayo" nghoid ago". Yoem: moo" bo myhang: thang ASEING ngoo tid too" bye:» ga: yooboo zhug da:.

¹⁶ASEING gi «Yu" ge'- Yerusalem myiyi: yigi gye" nghoid boin: ago". Nyangnu" gi myonhoo: nghang ci: lho: khyoo: so" ago". Nyangnu" gi khanham we' myo, nho: myoo: bang: nghoid. Nyangnu" gi langi: khyo" byi ce" lho: khamyhoo' mo akhuang joem gi sheing" sheing" ga: so" myheing ago".

¹⁷Nghoid loug we' ngoo gi nyangnu" ri yooboo dam byid: wa. Ngoo gi nyangnu" da" vhuloem ri ko' pyam wigi vhu" pyoid koid too" byid: wa» ga: tid da:.

¹⁸Nyangnu" gye" nghoid boin: da" zi ja: khang moo" nghoid da" nyangnu" khamyhoo' joem moo nyangnu" vhuloem joem moo nyangnu" leung zeung: joem moo nyangnu" lo youg: joem moo shoung: ci da" zi joem ri Yerusalem myiyi: yi mo ASEING wigi yu pyam byid: wa ayo, ju" re" nyid da:. Nyang: gi nyangnu" myonhoo: nghoeb yo'

²⁰Nyangnu" mug joem nyangnu" lo, moo yo' phyid" doem moo void ci: boem da" khain" pha' joem

²¹nyangnu" lo, nyhoug" joem moo pain" ci: da" lo, pain" joem yo' nyangnu" nhoo: moo xei" ci: boem da" nhoo: xei" joem

²²Nyangnu" da" ge da" byisheing: joem adang byi:- byi: loem joem yo' ngei thung joem

²³nyangnu" da" langi: byimi joem nyangnu" zin: yung" pain" phajoid nyangnu" vhuloem moo thoeb ci: boem da" vhu" thoeb joem yo myonhoo: nghoeb joem ri yu pyam byid: loo wa.

²⁴Shoem nam pyo: xu: da" gungthid boeb shoem:- phyid" cu" gungthid tei" shoem' phyid" cu" cu" loo goo" wa. Yung" da" xam: gungthid nyangnu" vhu" pyoid nghoid loo goo" wa. Reung: da" byimi gungthid nyangnu" byi: jeig mi jeig void loo goo" wa. Nyangnu" da" yung" zigi asho' ashid: bue" byug wa.

²⁵Nghoid bye: voomoo" mo yuggi yi yoem: bo thang da" yuggi yi lang" meing: zain: pui" moo said pyam zi shoug" loo goo" wa.

²⁶Voomoo" khoem" moo" joem gi koug wigi ngau lo goo" wa. Voomoo" nyang: nyang: we' myidgung moo gung cen: zhung jo, da" myiyi: dayug yhang: ti" bue" byug wa.