Read Lashi ESAIA 30 Bible Online

ESAIA 30 - Lashi bible

ESAIA 30

¹ASEING tid to" da:. «Yuda ri vhoeb da" bang: gi joem: abye: go". Ciwim gari nyangnu" ngoo ri gyi koid thougtheung ago". Ngo wigi asoin' to" da" moo" ri nyangnu" cang koid ago". Ngoo myid vho: ziri ngeug wigi myid veing" mougsoug" joem ri lo, xoem" lhid" ago". Yooboo daja: bain daja: daboem dazang koid to" ago".

²Nga" phajhi" byid: dang: ri amho' loo: pang" thoug byid: wa shid re" Egutu khyoo: nyangnu" yhe: ago". Nyangnu" gi Egutu byu yi wigi nyangnu" ri goem loem byid: wa zi vho: ago". Houg: yoomo nyangnu" gi Egutu khokham ri khau: nghe: ago".

³Nghoid loug we' khokham gi nyangnu" ri pang" thoug wa yoem: aboo wa. Egutu da" goem loem byid: zigi yau: khe" kyi" khyeug jang" mo thang loo wa.

⁴Nyangnu" da" lagyoo zeing joem gi Egutu voomoo" mo Zoan yo' Hane moo ju" jo, sho' nghoid loug we'

⁵Yuda byu yigi nyangnu" ri pang" thoug wa myid byu nyid uri du" pyam byid: da" byumyu"- loem age" da" byumyu" yiri nyangnu" khau: nghe: lo ziri nheig koug loo goo" wa» ga: ASEING tid.

⁶He: zigi mougpyi: shoid dain" pyoid yoo mo gougnyhoug joem yo' sen: da" Mangso da" mungdang: nghoid da:. Hau: zigi «Lagyoo: zeing yigi gyoug ci' ca" da" mungdain: ri jang: sho' so" yen" ago". Houg moo khang khyi joem dug thain: da" lhangmyu joem dang: yen" da" mainjung: joem nyid ago". Nyangnu" gi pang" thoug khyoo: ce: daja: we ayo" byid: da" byumyu" shid re" phoug" dab da" jhungshug joem ri loo zei: yo' gola-ug doo: moo nyangnu" soin' voin ago".

⁷Egutu byid: da" pang" thoug khyoo: gi ce: akyu" aboo nghoid da:. Houg: yoomo ngoo gi Egutu ri «Ce: dam adab da" mainjung:» ein: myeing zoo: myheing byid: bye: ga: zi nghoid.

⁸Nyangnu" gi khayhi' akhyeing" da" bang: nghoid boem khyoo: ri khanham we' lhid" xoem" bue" jo, wa shid re" nyangnu" cite" da" byumyu" yi nghoid boem da" khyoo: ri mougsoug" pug dapug moo lhid" too" wa shid re" Mangsoo gi ngoo ri tid da:.

⁹Nyangnu" gi khanham we' Mangsoo ri gyi koid thougtheung ago". Khanham we' mhau' ago". Khanham we' ASEING da" jhau" shed khyoo: ri tam" gyoo: wa he: ngeug pyam ago".

¹⁰Nyangnu" gi Lapi: yiri sam: zoo: nyid wa tid ago". Nyangnu" gi «Jo da" khyoo: ri ngoonu" ri atid goo". Ngoonu" gyoo: nau ja: ri tid kyoo" ge'. Ngoonu" myid jho: da" khyoo: joem moo xo' nyid nhang: we'.

¹¹Ngoonu" da" khyoo: ri shu' ge'. Ngoonu" da" khyoo: ri axau' too". Nanu" da" Israela da" gyeung" shang: Mangso da" khyoo: ri ngoonu" anau gyoo ga: tid ago".

¹²Nghoid loug we' he: zigi Israela da" gyeung" shang: Mangso tid da" dang: nghoid da:. Hau: zigi «Nanu" gi ngoo tid da" dang: ri ce: shu: anhang: lho: pyijoem: sho: wigi mhau fain" ziri khau: nghe: ago".

¹³Nanu" gi yooboo yo" ago". Nanu" gi myhang: lho: gyam: khoo: duang da" vang khyam: yo' du ago". Nanu" gi nyeigdain tung" gyau: lheung gyoeb loo goo” wa.

¹⁴Nanu" gi myigyu: jen" koid: yu wa yhi' da" oug" cu' aboo loo: sho' gyid thung" mo gyid yo" khu" pyam wa yhi' da" oug" cu' aboo loo: sho' dam xoo: sho' go, mhoin' byug da" zhoonhau: oug" yhang: ti" nghoid wa» ga: zi nghoid.

¹⁵Israela da" gyi: sheung: gyeung" shang: da" ASEING Mangsoo gi nya: byumyu" yiri «Tau" lo wigi sam: za: ngoo ri khau: nghe: goola. Houg: lang" nanu" gi yoem: bo wigi goem loem khyoo: yo" yu goo" wa» ga: tid da:. Nghoid loug we' hau: ziri koid wa nanu" ngeug he: pyam ago".

¹⁶Hau: gungthid myab da" myang: joem ri zhung: wigi nyangnu" da" gyivoo yi lo, mo phang: loid wa nanu" soin' boem ago". Nanu" jo ago". Phang: loid khyoo: gi nanu" koid ca" da" moo" nghoid boem wa. Nanu" da" myang: gi gye" myab ga: jho: ago". Nghoid loug we' nanu" ri cang khaid bang: gi je myab loo wa.

¹⁷Gyivo gyizoo: dayug ri nanu" shau" myang boem lang" nanu" dakhyeing" yug gi tang" phang: loo" goo” wa. Gyizoo wim: yug gi nanu" dangain" ri tang" phang: loo" sho' yo" koid boem wa. Boug gung tho' mo dungkhoin: zeing mo lid wigi nanu" gyidab moo ci adeing wa.

¹⁸Nghoid loug we' ASEING gi nanu" ri nheig khyeug yu wa shid re" lang" nyid wa. Nyang: gi khanham we' jo zi koid yoomo nanu" ri nheig khyeug yu wa jen" jen" nghoid da:. ASEING ri khau: nghe: bang: gi ngei pyo: ago".

¹⁹Yerusalem moo nyid boem da" byumyu" yi nanu" gi khanham we' akug ngau loo goo” wa. ASEING gi nheig khyeug myid boo su: nghoid yoomo pang" thoug yu wa nanu" mho' yoid lo uri nyang: nanu" ri tu" byid: wa.

²⁰Aseing gi nanu" ri yau: khi" da" ayo, joem khyo" so" lid: nhang: wa. Nghoid loug we' nyang: nyang: gi nanu" ri jhau" shid wa shid re" houg moo nyid nyid wa. Nanu" nyang: ri shoo: aca" loo wa.

²¹Nanu" lo, yoo lo, kung" shoid khyoo: khyoo: vhang: vhang: lo" boem ri nanu" nungthang mo «Khyoo: moo" hid khyoo: nghoid. He: khyoo: khyo" cang ge'» ga: tid da" nya: thui: ri nanu" shau" gyo: loo goo” wa.

²²Ngei yo' sheing: wigi thoeb to" da" nanu" da" yu phara" soolhoo: joem ri nanu" yu wigi «Tho"- ngoo amyang jang khyoo:» ga: nyho: wigi anyhoin: athung" ziri yhang: ti" she: lhei" pyam goo" wa.

²³Nanu" da" myoug: shi" joem ri sain" kaid khang" mo"- hau: joem ri yug nhang: wa shid re" Aseing gi moug: voo nhang: wigi myoo" sho' yhoem" yu nhang: wa. Nanu" da" gougnyhoug joem gi coung" yoo agoin agoo" yoo" wa.

²⁴Nanu" yoothung" ri phug da" nujung loo: yo' loo zei: joem gi ge thang da" mhain" shoug" zoo: wa.

²⁵Nanu" da" gyivoo yi da" gyidab joem seing: yu shau" wigi nyangnu" byu yiri said pyam shau" da" bidnyid moo boem khang" moo"- bouggung khang" moo" mo gyid gyung: zoo: joem yau: thu loo wa.

²⁶Lhammoo" gi bid yhi' bang loo wa. Bid gi nyhed nyid zho: zi danyid" za: zho: yhang: ti" goonham' zho: da" tho' nyhed zhang je zho: loo wa. Nya: byumyu" ri nyang: tab to" da" dam khoo: joem ri ASEING bacu' thoeb byid: wigi byang" byid: uri he: gu: dangain" bue" loo wa nghoid da:.

²⁷ASEING da" yoem: so' yo' phung" yoeb gi vi: mo yo" shau" myang da:. Myi: yo' myikhoug" gi nyang: nheig yo: ziri ci: shug byid: da:. Nyang: dang: tid wigi nyang: dang: khoin" gi myi: yhang: ti" nge" da:.

²⁸Ja: khang" moo" ri pyoung" she: lo" byug da" gyid khyoid yhang: ti" nyang: gi nya: shidkhoin" moo lid ri nhang: kaid da:. Hau: zigi byumyu" yiri byo, yoin" loo" nhang: lho: nyangnu" da" akhyeing" da" myid soin' khyoo: joem ri thang loo" nhang: da:.

²⁹Nghoid loug we' Mangso byu nanu" gi gyeung" shang: da" pui" myen" ri nanu" koid boem ziyo' dayhang: ti" ngei pyo: wigi jihkoin" khoin" loo wa. Nyangnu" gi Israela da" gyi zung" su: nghoid da" ASEING da" Noku Yhoem: Moo" khyoo: khoolhang thui: ri cang wigi so" yhe: loo" bang: yhi' pyo: da:.

³⁰ASEING gi yugkhang" moo" ri nya: phung" bo dang: ri shau" gyo: nhang: lho: nyang: nheig joem: yo: da" yoem: ri kham zoo: nhang: loo wa. Hau: zigi myiyham:- dalheing: dam vo da" moug:- leig voo khyo'- moug: moo" vo loo wa.

³¹Asuri byu yigi ASEING da" thui: ri shoug" gyo: wigi nyangnu" da" yooboo dam yoem: ri shoug" kham zo: boem lang" gyoug dain boem goo' wa.

³²ASEING wigi nyangnu" ri alheing: lheing: doem baid baid koid zigi nya: byumyu" yi zeing joem yo' teing joem ri baid myheing yhang: ti" nghoid loo goo" wa. Mangsoo nyang: wigi nyang: Asuri ri meing: zain: loo wa.

³³Goonham mo Asuri khosen ri nghi wa da" khyoem' moo" myi: dajo, yoo ri soin' to" da:. Hau: zigi no, wigi gyi: da:. Houg: lho: thang" myhang: sho' zuang to" da:. Hau: ziri nghe' pyam wa shid re" ASEING gi myiyham: ri moid thu kaid loo wa.