Read Lashi ESAIA 32 Bible Online

ESAIA 32 - Lashi bible

ESAIA 32

¹Dayo, moo jhug zug da" khokham dayug yo' tarha" deing byeung" da" khyo" vhoeb da" byumyu" vhujhung: yi nyid loo goo” wa.

²Nyangnu" mo yugkhang" moo" gi lid mo khau: nghi: wa joyoo- Uglid mo phang: goug" wa joyoo yo' dayhang: ti" nghoid loo wa. Nyangnu" gi dain" pyoid yoo moo yau da" gyid zoo: gyung: yo' dakhyo"- moug: kyug myid kyug moo jo, da" lug moo" da" bid shoem: yoeb yo' dakhyoo" ti" nghoid nyid da:.

³Nyangnu" myojid" yo' nukhyab joem gi myung shoo" bang: shid re" phang too" byid: loo wa.

⁴Nyangnu" gi nheigloem: aleing" loo goo" wa. Nyangnu" gi se' gyo: ziyo' moo" zei: wigi nyangnu" tid nau da" dang: kang: ri tid loo goo" wa.

⁵Koo" su: ri ngi: shab byid: to" ga: dayug we' ajhoo: wa. Mhau fain" su: ri deingmain" su: ga: dayug we' atid goo" wa.

⁶Koo" su: gi akoo" adau: dang: tid lho: akhyeing" da" lo, moo" koid wa myid thu kaid da:. Nyang: koid ziyo' nyang: tid zigi ASEING ri rue" zi nghoid wigi nyang: gi zooyoid bang: ri khanham we' abyid: zhoo"- gyid shid bang: ri ci: we' abyid: jhug nghoid da:.

⁷Byu koo" gi akhyeing" su: nghoid lho: akhyeing" da" moo" joem ri koid da:. Nyang: gi myung: shoo" bang: ri byo, yoin" nhang: da" mhau' dang: khau" tid wigi nyangnu" yo" yu eung: da" akho: akhang" ri toem pyam byid: da:.

⁸Nghoid loug we' ngi: shab byid: shau" da" byu gi deing: deing: main: main: koid wigi jo khyoo: moo teing za: yab jo, da:.

⁹Myen myen za: kangso' dei nyid da" myiyi: nanu" we"- myid amyoo: goo"- ngoo tid da" dang: ri tam" gyoo: we'.

¹⁰Akhid" nanu" nheugdeug nyid ri nyid goo" we'. Nghoid loug we' sang: nheig he: yo, ri nanu" nheigloem: thang goo" wa. Ciwim gari nanu" phyo' zheing" yu wa zabyid shi" ajo, yoomo nghoid wa.

¹¹Nanu" gi myen myen za: kangso' dei lo ago". Myid amyoo: nghoid ago". Nghoid loug we' akhid" gyoug wigi nain" nyid ge'. Nanu" byimi joem ri khyoid pyam lho: nanu" phyid" doem moo mi joid wigi tei" ci: we'.

¹²Koug ziyo' nanu" yanggang moo thoin: ge'. Ciwim gari myidxu: ge da" yoothung" joem yo' zabyid khyam: joem gi phyo' shoin' pyam shau" abye: go".

¹³Zu: bang yo' zukyen: gam joem gi nga" byumyu" yi da" mougmyid moo yug jo, da:. Byu joem ngei pyo: nyid boem da" yhoem: joem dangain" shid re" yo' dei noem byeung" sho' nyid da" voomoo" shid re" ngoug byid gyoo" ge'.

¹⁴Khokham khoo" rilang" she pyam too" kho' zi shau" wigi voomoo" zeing gi bain sho' jham" coug: youg nghoid byug wa. Zung" nyid da" yhoem: joem yo' gyidab joem gi apyaid atoo: moo byo, yoin" jo, wa. Siyoo loo zei: joem gi houg moo so" yen" wigi yang joem gi houg moo coung" yoo shau" myang wa.

¹⁵Nghoid loug we' Mangsoo gi nya: Venyi: ri ngoonu" jhang dalheing: doem nhang: kaid byid: wa. Mougmyid gang: gi myidxu: ge re" wigi yoothung" joem gi gug zoo myoo sho' thu loo wa.

¹⁶Mungdain: khyi khang" moo" moo deingmain" ziyo tarha" deingmain" zi bue" jo, wa.

¹⁷Yugkhang" moo" gi jo ziri koid loo wa yoomo ngei pyo: yug yo ziyo' goem loem zigi apyaid atoo: bui" jo, wa.

¹⁸Mangso byu yigi myid myo: zi ajo, wa. Nyangnu" da" yhoem: ikoin deungkhu: joem gi ngei pyo: ziyo' goem loem jo, wa.

¹⁹(Nghoid loug we' leug voo gi seig moo" yoo moo gyo" lho: voomoo" ri phyo' khyo' pyam wa.)

²⁰Shivoo: joem shid re" gyid agoin agoo" yo" lho: loo zei: joem yo' nu: joem shid re" gau: da" coung" yoo khyi' khang" moo" moo yo" da" su: yugkhang" moo" gi gye" ngei pyo: nyid.