Read Lashi ESAIA 33 Bible Online

ESAIA 33 - Lashi bible

ESAIA 33

¹Ngoonu" da" gyivoo yigi joem: abye: go". Nyangnu" gi lhoid zo: lho: gyivoo yi lo, khyoo: ab byid: lo da" bang: nghoid loug we' nyangnu" rigi hang" wigi we' alhoid zoo: hang" ri we' gyid voo lo, kyoo: a ab byid: nghoid ago". Nghoid loug we' nyangnu" da" lhoid zo: ziyo' ab byid: da" akhyeing: ayo, gi thang loo" wa. Nyangnu" nyang: nyang: lhoid zoo: shoug" bang:- phyo' zoo: shau" da" zoo: noem bui" goo" wa.

²ASEING we" ngoonu" ri nheig khyeug yu la o". Ngoonu" gi nang ri myid lang" nyid. Ngoonu" ri danyid" yo' danyid" goem loem byid: wigi yau: khi" shau" da" ayo, moo ngoonu" ri khyoid yu la o".

³Ngoonu" shid re" nang gyi khaid byid: lang" byumyu" yigi meing: zain: pa: mo lu: fu: jang" mo tang" phang: lo" ago".

⁴Nyangnu" seing: da" zi joem gi yhe: doin: zeig lhoid zi shau" wigi lanyhoeb khyo" lhoid yu pyam zi shoug" ago".

⁵ASEING gi gyi: sheung: yug nghoid o". Nyang: gi ja: khang" moo" ri vhoebkhang" nyid. Nyang: gi Yerusalem ri tarha" deingmain" ziyo' jhug zug khyoo: ri byeung" jo, nhang: loo wa.

⁶Houg: lho: byumyu" yiri nheigloem: geing: jo, nhang: wa. Nyang: gi nya: byumyu" yiri khanham we' goem loem byid: wigi nyangnu" ri phajhi" yo' lasi phajhi" ri byid: loo goo" wa. Nyangnu" da" phoug" dab thang da" jonu" gi ASEING ri gyoug phoug" zi nghoid loo wa.

⁷Sarhi' yigi pang" thoug yu wa shid re" mho' yoid nyid ago". Ngei pyo: yug yo khyoo: ri voin re" boem da" lagyoo: zeing yigi nheig khoo" tung" kyi: ngau nyid ago".

⁸Fu" moo" khyoo: joem gi gyung: soo" bang: hang" anyid yoomo gyoug dain pho" zi bue" jo, da:. Myid veing" mougsoug" gi byo, yoin" lo" lho: myid veing" khyoo: joem gi she pyam shau" abye: go. Hang" we hau ziri aphoug" loo nghoid ago".

⁹Mungdain: gi akyu" aboo jham" coug: youg bue" jo da:. Lebanon seig moo" yoo gi shoem: nyhau" lo" lho: myidxu: ge da" Sharon janggyoin: gi dain" pyoid yoo yo' dakhyo" bue" lo" wigi Bashan mung" yo' Khamela boem dang moo yug da" seiggam joem mo seig fu' joem shu: gyo" nyid ago".

¹⁰ASEING gi byumyu" yiri «Akhid" ngoo moo" zei: loo wa. Ngoo khayhi' yoem: boo su: nghoid ziri ci: shug byid: wa.

¹¹Nanu" gi ce: phoug" adab da moo" joem ri soin' to" lho: nanu" koid zi ja: khang" moo" gi amyed afoo" nghoid da:. Nga" Venyi gi nanu" ri phyo' shoin' pyam wa da" myi: yhang: ti" nghoid da:.

¹²Nanu" gi shafuid" lug joem yhang: ti" moin" byug boem wa. Myimoeb nge" joem: lo" da" zu: kyin: gam joem yhang: ti" nghoid goo" wa.

¹³Vi: moo jang" moo nyid da" yugkhang" moo" ri ngoo koid da" moo" ri shoug" gyoo: nhang: lho: nga" yoem: so' ri yhen: yu nhang: ge'» ga: tid da:.

¹⁴Ziun moo nyid boem da" yooboo yoo" bang: gi gyoug wigi ko' ko' nain" nyid ago". Nyangnu" gi «Mangso da" dang: phyed khyoo: gi apyaid atoo: moo nge" nyid da" myi: yo' du da:. Houg yhang: te" da" myi: mo ngoonu" hang" dayug yo" nyid deing wa la"» ga: tid ago".

¹⁵Nanu" jo da" dang: tid wigi jo da" moo" zei: boem nghoid rigi nanu" yo" nyid deing boem goo" wa. Sho" jhen: bang: ri fain" zoo: wa nanu" da" yoem so' ri aci: goo". Khougvhoid jhungshug ri ayu goo". Byu said wa yo' akhyeing" da" gootu: moo" joem ri koid wa soin to" da" bang: yo' azoem" goo".

¹⁶Houg: lang" nanu" goem loem shoug" wa. Nanu" gi teing da" gyidab moo nyid bang: yhang: ti" goem loem shoug" goo" wa. Nanu" gi zoo: noem yo' shug gyid yo" loo goo" wa.

¹⁷Shoid khang" moo" khyoo: ce" yhe: lo" da" mungdain: moo myonhoo: yoeb bang yo' vhoeb da khokham dayug ri nanu" dalheing: doem shau" myang loo goo" wa.

¹⁸Nanu" shid phyang" gyoug lo boem da" tungbau kheing" koid: bang: yo' jooyu" bang: dangain" gi laxoem" za: date: nghoid loo wa.

¹⁹Nanu" ase' gyo: da" myeing" ri kaid wigi khuang da" tungbau byu yi dayug ri we' nanu" ashau" myang loo goo" wa.

²⁰Ngoonu" da" noku thung" pui" joem koid da" joyoo nghoid da" Ziun voomoo" ri yu" ge'. Yerusalem ri yu" ge'. Hau: zigi khayhi' gau: da" joyoo nghoid wa la. Hau: zigi khanham we' ashu" da" zoem" yo' du loo wa. Hau: da" zeing thug joem gi khanham we' aboin" loo wa. Hau: da" tei" joem khanham we ayoem: abyed wa.

²¹ASEING gi nya: phung" yoeb ngoonu" ri ci: shug byid: wa. Ngoonu" gi dam da" gyid gyung: moo" yo' gyid zoo: gyung: ayam moo shoug" nyid loo wa. Nghoid loug we' gyi khaid da" lhid joem gi hau: adang moo agu: ri" goo” wa.

²²Hau: lhid joem mo tei" joem gi amyed afoo" nghoid da:. Lhid mo pain" ruang: ri ayo" pei: to' kaid nghoid da:. Ngoonu" gi gyivoo gyidab joem da" jonu" dangain" ziri yo" seing: yu goo" wa. Sung myo: yoomo khyid: gyoug: bang: lang" gamboem shoug" yu boem goo" wa. ASEING nyang: nyang: nanu" khokham nghoid loo wa. Nyang: gi ngoonu" ri vhoeb wigi goem loem byid: loo wa.

²⁴Ngoonu" mung" moo nyid boem da" bang: hang" dayug we' no wigi khanham we' adoem myeing" myoo: loo goo" wa. Yooboo dangain" gi khyoid pyam byid: shoug" wa.