Read Lashi ESAIA 36 Bible Online

ESAIA 36 - Lashi bible

ESAIA 36

¹Yuda khokham Hezekia khokham koid zi daxe: myid: zain ein: zain moo Asuri Khosen Senakherib gi Yuda mung" mo gyidab voomoo" joem ri khaid zain: wigi hau: joem ri oung: yu pyam da:.

²Hau: thang: nyang: gi nya: gyizoug: moo" ri khokham Hezekia asoem" byid: lo, tu: wa sho' yhe: tid wa shid re" gyidab moo" yo' dage" Lakhisha mo zi Yerusalem khyoo: yhi: wa amyeing" khyo' kaid da:. Gyizoug: moo" gi atho' gyid thoem" mo gyid she: yu da" gyid khyoo" moo byimi cid" da" khyoomoo" ri vang: yu pyam da:.

³Yuda byu soem" yug nyang: ri shoug" wa shid re" thu re" ago". Houg bang: gi Hilkia da" yug gi zoo: khokham kho" ri yoovoin yu lhoug zung" da" Eliakim- Khokham kho" moo" seing: Shebna- Asab da" nya: yug gi zoo: lhid" xoem" ri yoovoin yu da" su: Yoa bang: nghoid ago".

⁴Asuri mo gyizoug: phoo gi nyangnu" ri khokham Hezekia gi houg yhi' ce: ziri myid loem nyid da" khyoo: ri khosen phoo si' nau da" khyoo: ri tid da:.

⁵Nyang: gi «Nhoid dang thui: joem gi gyi yo' sen: wigi jhang: ziyo yoem: so' joyoo moo yo" thid yu wa ein: nanu" jhoo: go" rhe". Asuri ri thougtheung gyi koid wa jang" moo nanu" ri hang" yo" pang" byid: loo wa la" ein: jhoo: go" rhe".

⁶Egutu wigi nanu" ri re" pang" yu wa ga: nanu" myid loem boem ago". Nghoid loug we' hau zigi gyidpheing" youg: ri lhamdung: koid ci: ziyo' dakhyoo" ti" nghoid wigi hau: zigi nanu" lo, khoug: mo gyau: lo wigi zang" thau" zu: yu ago". Hau: zi dayug yug wigi nyang: ri khau nghe: da" uri Egutu khokham gi houg yo' du wa» ga: tid da:.

⁷Asuri moo" voin ludaid phoo gi xo' lho: «Anghoid lang" nanu" da" ASEING Mangsoo ri nanu khau: nghe: nyid boem da" khyoo: ngoo ri tid goo" wa la". Yuda yo' Yerusalem byu yiri phoin: daloem moo za: noku coung" wa tid uri ASEING da" phoin: yhoem: yo' phoin: joem ri phyo' pyam su: gi Hezekia nyang: nghoid abye:.

⁸Ngoo gi khosen pho da" myeing moo nanu" yo' gu tid wa. Nanu" myang: yo" zhung: da" byu myoo" sho' nyid boem rigi ngoo nanu" ri myang: eig khyeing" byid: wa.

⁹Nanu" gi Asuri da" nyhoem: thang da" gyizoug: aya: yo" yug yo' lang" mi shi' wa amoin: da" bang: nghoid ago". Houg: nghoid loug we' Egutu byu yi wigi myang: rheing" yo' myang: ju: byu yi nanu" jhang nhang: kaid byid: wa ziri myid lang" ago".

¹⁰ASEING wigi pang" thoug zi aboo lo:- nanu" mungdain: ri gyi khaid zain: wigi phyo' shoin' pyam bye: ein: nanu" jhoo: go" rhe". Hau: ziri gyi khaid lho: phyo' shoin' pyam wa ngoo ri tid su: gi ASEING nyang: nghoid abye:» ga: tid da:.

¹¹Hau: thang: Eliakim- Shebna- Yoa bang: gi gyizoug: phoo ri «Ngoonu" ri Aramid myeing" khyo" tid ge'. Ngoonu" hau ziri se' gyo:. Hebre myeing" atid goo". Vang khyam: dang moo nyid boem da" voobyu yi tam" gyo: nyid ago"» ga: tid ago".

¹²Nyang: gi «Khosen phoo gi nanu" yo' khokham phoo ri kyeing" he: gu dangain" ziri tid kyoo" wa ngoo ri nhang: kaid zi nghoid ein: nanu" jhoo: go" rhe". Hougsu" anghoid- ngoo gi vang tho' moo zhung: jo, boem da" voobyu yiri we' tid wa zi nghoid. Houg: bang: gi nanu" yo' dakhyo" nyangnu" nya: khyid" ri zo:- nyangnu" nya: yhid" ri shug ca" goo" wa» ga: tid da:.

¹³Hau: thang: gyizoug: to' yab wigi Hebre myeing" khyo" «Asuri khosen nanu" ri tid nyid da" dang: ri tam" gyoo: we'.

¹⁴Hezekia wigi nanu" ri amhoid" jhoem" pyam nhang: wa shid re" nyang: nanu" ri tid poin" da:. Hezekia gi nanu" ri ayo" khyoid yu nghoid da:.

¹⁵Houg: lho: ASEING ri khau: nghi: wa shid re" nyang: wigi nanu" ri atid ngeig yu nhang:. ASEING gi nanu" ri khyoid yu lho: nanu" voomoo" ri ngoonu" Asuri gyidab wigi lhoid seing: yu jang" mo yo" toem pyam wa ein: ajho: nyid go".

¹⁶Hezekia dang: atam" gyoo: goo". Asuri khosen gi nanu" ri voomoo" mo thu re" lho: asoem" byid: lo, tu: goo" wa shid re" nanu" ri amyeing" byid: kaid da:. Nanu" dangain" gi nanu" nya: da" zabyid nei mo zabyid shi" ri we' nanu" nya: da" lafoem' gam mo lafoem' shi" ri zo: nhang: wa. Houg lho: nanu" nya: gyid thung" mo gyid ri we' shug nhang: wa.

¹⁷Hau: thang: Khosen phoo gi nanu" nya: mungdain: yo' gye" du da" mungdain: nanu" ri nyid nhang: wigi houg moo zabyid khyam: mo zabyid yhid: byid: wigi zooyho' koid wa shid re" shivoo: jo, da" gootu: mungdain: daloem ri byid: wa.

¹⁸ASEING wigi nanu" ri khyoid yu wa ga: myid jhoo sho' Hezekia wigi nanu" ri koo" moo" azei: nhang: goo". Gootu: mungdain: joem mo yu phara" joem wigi we' nyangnu" mungdain: joem ri Asuri khosen lo, mo khyoid yu yu" go" rhe".

¹⁹Hamad yo' Arapad da" phara joem gi akhid" khayoo: nghoid ago" la". Sepharvim yu phara" joem gi khayoo: nghoid ago" la". Samari ri hang" khyoid yu la".

²⁰He: mungdain: joem dangain" da" yu phara" joem mo ce: ja: yu phara" wigi ngoonu" da" khosen pho lo, mo nyangnu" mungdain" ri khanham khyoid yu yu" la". Houg ri Yerusalem ri ASEING wigi yo" khyoid yu da ein: nanu" ciwim myid jho: boem go" la"» ga: tid da:.

²¹Mung" byu yigi khokham Hezekia wigi nyangnu" ri tid to" ziyo dakhyo" sam: zoo: nyid nyid lho: ce: dakhoin" we atid boem nghoid da:.

²²Hau: thang: Eliakim- Shebna- Yoa bang gi koug wigi nyangnu" byimi joem ri lang: ceig pyam ago". Nyangnu" phang: lo" lo: Asuri gyizoug: phoo tid da" dang: khokham phoo ri lo" tid khyo" ago".