Read Lashi ESAIA 38 Bible Online

ESAIA 38 - Lashi bible

ESAIA 38

¹Hau: ayo, moo khokham Hezekia gi no re" lho: shid: lo" nyid da:. Amoz da" yuggi zoo: Lapi: Esaia gi nyang: ri yhe: yu" lho: «Ja: khang" moo" ri nyheing soin' too" wa shid re" ASEING nang ri amyeing" byid:. Ciwim gari nang noo agi wa. Shid: wa soin' we'» ga: nyang: ri tid da:.

²Hezekia gi nya: myonhoo: ri xiyam khyoo: lheing: wigi

³«ASEING we"- ngoo nang ri dang: zung" jhug zug tung" dei byid: wigi ngoo gi nang koid nhang: da" ja: ri khanham we' yoem: kaid koid lo ziri myid boin: byid: la o"» ga: akyu" mho' da:. Hau: thang: nyang: gi nheig khoo" sho' ngau lo da:.

⁴Hau: thang: ASEING gi Esaia ri

⁵Hezekia jhang David da" phoug" phyid" yi da" ASEING Mangsoo ngoo gi re" akyu" mho' dang: ri shau" gyo: wigi re" ngoug byid joem ri myang bye:. Nang ri ngoo daxe: wim: zain sheing: sho' nyid nhang: shi" wa.

⁶Ngoo gi nang yo' he: voomoo" Yerusalem ri Asuri khosen da" lo, mo khyoid yu wa. Ngoo gi xo' wigi hau: voomoo" ri goem loem byid: wa» ein: yhe: tid wa amyeing" byid: da:.

⁷Esaia gi «ASEING gi nya: dangsoo" ri bui" sho' koid wa ein: ziri sagse: ci: shug byid: da" avoid nyang: nang ri byid: wa.

⁸Khokham Ahaza wigi koid to" da" zoem" lhang: tho moo ASEING gi bidbang yoeb zoo" ri zoem" lhang: ki daxi: tau" loo" nhang: wa» ga: tid da:. Houg: yoomo zoem" lhang: daxi: ki doem tau" lo byug da:.

⁹Hezekia no ge lo" thang: ri nyang: gi he: coung" nghei jihkoin" ri lhid" da:.

¹⁰Hau: zigi Nga" apyaid kung" kung" moo nga" kangso khanham we' ayo" dei nyid loo wa. Moovo moug: yhe: loo" wa bye: ein: jho: pyam bye:.

¹¹He: kangso' dei nyid da" mougmyid dang moo ngoo khanham we' ASEING ri ashau" myang loo wa anghoid lang" dei nyid da" byu yiri ashau" myang loo wa ein: jho: pyam bye:.

¹²Nga" apyaid gi phyo' pyam da" zoem" yo' dakhyo"- yo, gain: mo phed: pyam da" pain" yo' dakhyo" phyid pyam zi shoug" lho: thang byug da:. Nga" apyaid ri Mangso wigi thang loo" nhang: nyid ein: ngoo jho: pyam bye:.

¹³Nga" shooyoug: joem ri khangkhyi wigi baid khyau" nyid yhang: ti" Myen goin" khe" no: wigi nyho: nyid da:. Nga" apyaid ri Mangso wigi thang loo" nhang: nyid ein: ngoo jho: pyam bye:.

¹⁴Nga" thui: gi noem: lo" wigi yoem neing: lo" byug da:. Ngoo gi pheing" kyoug" yo' dakhyo" nookyeing" khyeing" nyid. Nga" myojid" gi mougkhung: khyoo: yu" wigi myung: byug bye:. ASEING we"- he: yau: khe" kyi" khyeug dangain" mo ngoo ri khyoid yu la.

¹⁵Ngoo ciyo" tid wa". He: zi ASEING koid abye:. Nga" nheigloem: kho" jo, wigi ngoo ayo" yhoeb.

¹⁶ASEING we"- Ngoo gi re" shid mo za: nang dayug khyeing" shid mo za: kangso' dei wa. Ngoo ri gi nhang: wigi ngoo ri kangso' dei nhang: la.

¹⁷Nga" da" pyaid khoo" gi ngei pyo: yug yo zi bue" loo" wa. Nya" apyaid ri gyoug ca" ja: dangain" mo nang khyoid yu lho: Nga" yooboo joem dangain" ri nang khyoid byid: bye:.

¹⁸Moovo moug: mo hang" we nang ri ayo" coung" nghoid ago"- byushid: mang gi re" jhug zug ziri ayo" loem khoug: nghoid da:.

¹⁹Akhid" nang ri ngoo coung" byid: ziyo' dakhyo"- dei nyid da" bang: gi nang ri coung" byid: nyid ago". Nang khayhi' jhug zug da" khyoo: ri nya: myhi' phoo yigi nya: zoo: yiri tid kyo" ago".

²⁰ASEING we"- nang ngoo ri noo gi byid: abye:. Ngoonu" gi teing baid wigi nang ri coung" nghei jikhoin" khoin" wa. Ngoonu" dei nyid myhang re" Noku Yhoem: Moo" moo coung" nghei jikhoin" khoin" nyid wa ga zi nghoid.

²¹Esaia gi khokham phoo ri nya: da" byeing dam moo lafoem' shi" akyug tab nhang: wigi nyang: gi ge lo" byug wa ga: tid yu" bye:.

²²Hau: thang: khokham Hezekia gi «Ngoo Noku Yhoem: Moo" khyoo: yo" yhi: wa nghoid ziri ce: ja: avoid wigi sagse: yo" ci shug wa la"» ga: myid: yu" bye:.