Read Lashi ESAIA 42 Bible Online

ESAIA 42 - Lashi bible

ESAIA 42

¹ASEING gi «He: zigi nga" dei zoo: nghoid- ngoo yoem: byid: too" su: Ngoo khyen: too" su:- ngoo vho: ngei su: nghoid da:. Ngoo gi: nyang: ri nga" Venyi: yo' pyeing too" byid: bye:. Houg: lho: nyang: gi byumyu" khang" moo" ri tarha" deingbyeing" ziri ci: ri" byid: wa.

²Nyang: gi nyhoo: we' anyhoo:- thui: we' amyhang: wa. fu" moo" khyoo: joem moo thui: zeing yo' we' aji wa.

³Nyang: gi nghoug jo, da" gyidpheing" youg: ri akhyau" pyam wa. kyi: kyi: za: date: dab da myikug ri we' asaid pyam wa. Nyang: gi dangain" mo, ri abei: abyo, tarha" deing byeung" ziri ci ri" byid: wa.

⁴Nyang: gi myidbyu zi anghoid lang" yoem: byid: khyoo: athang byug wa. nyang: gi mougmyid tho' mo tarha" deing byeung" ziri zhug too" wa. moug: vi: mo mungdain: joem gi nya: jhoug" shid khyoo: ri gau gau yi yi lang" nyid boem wa» ga: tid da:.

⁵Mangsoo gi mougkhung: ri phain" so: wigi hau: ziri pei: pyo: to" da:. nyang: gi mougmyid yo' houg: moo: nyid gu: dangain" ri sid shoung: to" da:. Nyang: gi kangso byid: wigi hau byu yi dangain" ri so' shi: nhang: da:. Houg: lho: akhid" ASEING Mangsoo gi nya: dei zoo: ri

⁶«Ngoo ASEING gi mougmyid tho' moo tarha" deing byeung" zi koid too" bye: ziri yu" wa shid re" nyang: ri ngoo khe: yu wigi yoem: so' byid: too" bye:. Ngoo gi: nang khyo" wigi byu dangain" yo' dang: theing koid wa. Ngoo gi nang khyo" wigi byumyu" yi jang" moo bidbang ci: ri" byid: wa.

⁷Nang gi myo, jid, yug ri myo, myang nhang: wa. moug: coid thung: khoug: moo nyid bang: ri loid byoin nhang: kaid byid: wa.

⁸‹Ngoo dayug za: re" ASEING Mangsoo nghoid. Gootu: yu phara" ce: daja: we' nga" phung" yoeb ri ayo" gam yu nghoid da:. ngoo gi yu phara" soolhoo: joem ri nga" coung" nghei khyoo: ri ayo" gam byid: wa.

⁹Ngoo lapi: pe: to" da" moo" joem akhid" joeb byeung" lo abye:. Akhid" ngoo gi nyangnu" lang" abui" loo shi" da" khyoo: aseig joem da" khyoo: ri nanu" ri tid kyoo" wa› ga: tid da:.

¹⁰ASEING gi jilkhoin" seig yo' jikhoin" khoin" ge' mougmyid gyab goin" we' nyang: ri coung" nghei jikhoin" khoin" ge'. Panglai: ri gu: bang: nanu" we"- nyang: ri coung" ge'. Panglai: mo dei noem dangain" we"- nyang: ri coung" ge'. Ve: da" mungdain: joem yo houg moo nyid bang: dangain" we"- jikhoin" khoin" ge'.

¹¹Dain" pyoid yoo yo' hau: da" voogung joem gi Mangsoo ri coung" boem baja". Kedara byu yigi nyang: ri coung" boem baja". Sela voomoo" moo nyid bang: gi boem gung joem dang mo ngei pyo: wigi yoid nyho: goo" baja".

¹²Ve: da" mungdain: joem mo nyid bang: gi coung" nghei byid wigi ASEING ri phung" yoeb pang byid: boem baja".

¹³ASEING gi gyi khaid sarhi dayug yhang: ti" gyikhaid wa thu lo" da:. nyang: gi gyi khaid pui" shid re" jen" jen" nghoid wigi gau gau yi yi nghoid nyid da:. Nyang: gi meing: zain: wa mho' yoid- gyi khaid jang: moo nyho: nyid da:. Nyang: gi nya: gyivoo yiri nya: yoem so' ci: shug byid: da:.

¹⁴Mangsoo gi «Ngoo gi ayo, myang" sho' sam: zoo: nyid nyid bye:. ngoo gi nga" byumyu" yiri dang: phuid: aphuid: byid:. Nghoid loug we' akhid" gi moo" zei: wa ayo, ju" lo abye:. Ngoo gi zoonu" khu: da" myiyi: myhi' yhang: ti" yoid nyho: nyid da:.

¹⁵Ngoo gi bouggung joem yo' boem joem ri phyo' shoin' pyam lho: myo, gam yo' seiggam joem ri kyug loo" nhang: wa. Ngoo gi gyid gyung: lang khung" joem ri dain" pyoid yoo koid pyam wigi gyid thoem" mo gyid ri kyug hei' loo nhang: wa.

¹⁶«Ngoo gi nga" byumyu" myo, jed bang: ri nyangnu" khanham we' aso" yu" boem da" khyoo: joem khyoo: shu" loo" wa. Ngoo gi nyangnu" da" moug: coid ri bidbang bui" nhang: wigi akhyi" akhyoid da" kyoem: khoug: ri nyangnu" shidkhoin" mo khyoo: jhoid bui" nhang: wa. He: zigi nga" dang: soo" joem nghoid wigi ngoo gi hau: ziri ato" myid loosho' cang koid wa.

¹⁷Yu phara" soolhoo: joem ri loem khoug: bang: dangain" gungdu soolhoo: joem ri nyangnu" da" yu phara" joem ga: yoid bang: gi sho' phu" ziyo' ngi: yoem" zi shau" boem goo" wa» ga: tid da:.

¹⁸ASEING gi «Nujed bang: nanu" we"- tam" gyoo: we'. myo, jed bang: nanu" we" tab tab za: yu" ge'.

¹⁹Nga" dei zoo: tho' myo, je jed su: hang" nyid boem la". Ngoo nhang: kaid da" nga" lagyoo: tho' je nujed su: hang" nyid boem la".

²⁰Israela we"- nang gi gye" shau" myang abye:. Nghoid loug we' hau: zigi re" shid re" ce: dang: kang: bo la". Nang gi gyoo: wa nukhyab yo" da:. Nghoid loug we' nang ci shoug" gyoo bye: la"» ga: tid da:.

²¹ASEING gi khyoid yu wa gau yi da" Mangsoo nghoid. Houg: yoomo nya: tarha" joem yo' jhau" shid khyoo: joem ri nyang: ngi: shab wigi hau: joem ri nya: byumyu" yi wigi ngi: shab byid: nhang: nau da:.

²²Nghoid loug we' akhid" nya: byu yi phyo' zo: pyam shau" wigi nyangnu" gi myid thung: khoug: moo myhid" lhoung too" shoug" ago". thung: joem akhoug: moo shoung: to" zi shoug" ago". Nyangnu" gi lhoid zo: zi shau" wigi phyo' zo: pyam zi shoug" ago". nyangnu" ri re" khyoid yu wa hang" anyid nghoid ago".

²³Nanu" mo kha: yug he: ziri shoug" gyoo goo" wa la". Akhid" mo thei: gu: nanu" nyeing" za: tam" gyoo: goo" wa la".

²⁴Israela ri lhoid zoo: lhoid shug bang: lo, khoug: khyoo: hang" ab byid: pyam la" hau zigi nanu" nyang: thougtheung yooboo koid nyid su: ASEING nyang: nghoid da:. Nyang: ngoonu" ri kangso' dei nyid nhang: khyo" ngoonu kangso' adei anghoid lang" nyang: wigi ngoonu" ri byid: to" da" jhau" shid khyoo: joem ri we' acang nghoid da:.

²⁵Houg: yoomo nyang: gi ngoonu ri nya: nheig yo: da" yoem: so' ri kham zoo: nhang: wigi gyi khaid pui: da" pyijoem: sho: khaid said khyoo: moo kyi" khyeug shoug" nhang: da:. Nya: nheig joem yo: zigi myi: yhang: ti" Israela mung" goin" ri nge" lo byug da:. nghoid loug we' cibue" nyid ziri ngoonu khanham we' asi'.. Ngoonu" gi hau dangain" mo ciri we' ajhau" yu nghoid da:.