Read Lashi ESAIA 49 Bible Online

ESAIA 49 - Lashi bible

ESAIA 49

¹Ve: da" joyoo moo nyid boem da" byumyu" yi moug: vi: bang: nanu" we"- ngoo tid dang: ri tam" gyoo: ge'. Ngoo akhu: shi" mo ASEING gi ngoo ri khyen: to" wigi nya: dei zoo khyo" ngoo ri yoovoin foin: to" da:.

²Nyang: gi nga" dang: thui: ri shamcoin" yhi' tho' nhang: da:. Nyang: nya: lo, wigi nyang: ngoo ri goem loem byid: da:. Nyang: gi ngoo ri myoo: ri yo' dakhyoo" ti" coin: wigi ci: wa jen" jen" koid da:.

³Nyang: gi ngoo ri «Israela we" nang gi nga" dei zoo: nghoid. Re" gang mo byumyu" yigi ngoo ri coung" nghei byid: loo goo" wa» ga: tid da:.

⁴Ngoo gi «Ngoo moo" zei: bye:- nghoid loug we' akoem: nghoid da:. Ngoo gi nga" yoem: so' ri ci: bye:- nghoid loug we' ci: abain koid» ein: tid bye:. Nghoid loug we' nga" khyoo: ri goem loem byid: wa shid re" ASEING ri ngoo yo" loem khau: da:. Nyang: gi ngoo koid da" moo" ri aphoug" jhungshug byid: loo wa.

⁵Ngoo akhu: shi" re ASEING gi ngoo ri yoovoin foin: to" da:. Nya: byu yiri doem shu" tau" loo wa shid re" we' byo, sain" nyid da" Israela byumyu" yiri doem shu" tau" yu wa shid re" ngoo ri nya: dei zoo: koid nhang: abye:. ASEING gi ngoo ri ngi: shab byid: bye: nyang: gi nga" yoem: ajhung: nghoid da:.

⁶ASEING gi ngoo ri «Nga" dei zoo: we"- re" shid re" je gyi: da moo" nga" jang" moo jo,. Nyid deing nyid da" Israela byumyu" yi gyi: sheung: wa shid re" nang ri nyhid: too" wa zi za: anghoid. Mougmyid dangain" khyoid yu zi shoug" wa shid re" ngoo gi nang ri byumyu" yi da" bidbang ri we' bui" nhang: wa» ga: tid da:.

⁷Israela da" gyeung" shang: Mangsoo yo' khyoid yu su: gi xoo: sho' aphoug" akhyoid koid zi shoug" su: byumyu" yi wigi ngheing" su: vhoebkhang" bang: da" dei zoo: ri «Nang loid nhang: kaid ziri khokham yi shau" myang lang" nyangnu" ri phau" myang: byid: wa shid re" to' yab loo wa. Khokham nu" yi we' hau: ziri myang wa lho: nyangnu" gi nang ri phau" myang: wigi goeb pid loo goo" wa» ga: tid. ASEING gi nya: dei zoo: ri khyen: too" bye: yoomo he: zigi bue" loo wa nghoid. Israela da" gyeung" shang: Mangsoo gi nya: dangsoo" joem ri zoem: su: nghoid da:.

⁸ASEING gi nya: byumyu" yiri «Nang ri khyoid yu wa ayo, ju" loo lang" ngoo gi nang ri myonhoo: byid: wigi pang" thoug wa shid re" nang mho' yoid ziri ngoo tam" gyoo: byid: wa. Ngoo gi nang ri lhoug zung" wigi goem loem byid: wa. Houg: lho: nang khyo" wigi byumyu" dangain" yo' dang: theing koid wa. Akhid" jham" coug: youg bue" jo, da" re" mougmyid moo ngoo nang ri dalheing: doem de: nyid nhang: wa.

⁹Ngoo gi thung: byu yiri ‹Loid byoin loo" ge'› ein: tid lho: moug: coid khoug: moo nyid bang: ri ‹Bid bang khyoo: thu ri" ge'› ein: tid wa. Nyangnu" gi bouggung moo mhain" lham" zo: nyid da" yang joem yhang: ti" nghoid loo wa.

¹⁰Nyangnu" gi khanham we' zooyoid wa gyidshed wa zi anghoid. Bid yo' dain" pyoid yoo loung zigi nyangnu" ri dam tab wa zi anghoid. Ciwim gari nyangnu" gi nyangnu" ri jheddab su: wigi shu" vhu" she: yhe: zi shoug" loo goo" wa. Nyang: gi nyangnu" ri gyid boug joem khyoo: shu" vhu" she: yhe: loo" wa.

¹¹«Ngoo gi boem joem ri lid: phyid lo" da" fu" moo" khyoo: phang wa. Nga" byumyu" yi soo" wa shid re" khyoo: nyheing byid: wa.

¹²Nga" byu yigi moug: vi: mo we' mougzhung: yo' bidvang shoid mo we' mougpyi: shoid mo Asvan mo we' re" lo boem goo" wa.

¹³Mougkhung: we"- jikhoin" we' myidjang we' gau wigi nyho: yoid ge'. Boem joem ri jikhoin" khoin" nhang: we'. ASEING gi nya: byu yiri nheig teing byid: loo wa. Nyang: gi ashoo" ajhen: kyi" khyeug kham zo: nyid da" nya: byumyu" yiri nheig khyeug byid: loo wa.

¹⁴Nghoid loug we' Yerusalem byu yi tid zigi «ASEING gi ngoonu" ri she: pyam pyam bye:. Nyang: gi ngoonu" ri to" myhed pyam abye:» ga:.

¹⁵Houg: yoomo ASEING gi «Myiyi: myhi' gi nya: zoonu" ri yo" to" myhid pyam la". Nyang: khu: to" zooshang: ri ajheddab yo" koid la". Myiyi: myhi' gi nya: zooshang: ri to" myhid pyam sho' nghoid loug we' Ngoo gi nang ri khanham we' ato" myhid pyam wa.

¹⁶Yerusalem we"- ngoo nang ri khanham we' ayo" tho' to" myhid. Nga" lo, voo: tho' moo re" myeing ri ngoo lhid" tab too" bye:.

¹⁷«Nang ri doem tam: too" wa bang: gi ju" re" nyid bye:. Houg: lho: nang ri phyo' shoin' pyam bang: gi to' phang: lo" byug goo" wa.

¹⁸Lheing khoem khyoo: lheing: yu" kaid we'. Houg: lang" bue" nyid ziri myang wa. Re" byu yigi zeing: foem: nyid boem ago". Nyangnu" yhoem: khyoo: lo nyid ago". Ngoo gi dei nyid da" Mangsoo nghoid ziyo' dakhyoo" ti" Myhi' seig gi nya: phoug" dab da" sheing: zi ri langi: koid yhang: ti" nang gi re" byu yi yoomo langi: koid loo wa.

¹⁹«Re" mungdain: gi byo, jo, wigi jham" coug: youg bue" jo, da:. Nghoid loug we' houg: moo lo nyid wa ju" lo nyid boem mo, shid re" akhid" hau: zigi soung nge loo wa. Nang ri byo, yoin" nhang: too" kho' boem da bang: gi nanu" mo ve da" joyoo khyoo: shu" pyam zi shoug" loo goo" wa.

²⁰Pyoung" she: nyhid to" da" joyoo moo khu: lo boem da" byu yigi danyid" nyid" moo nang ri «He: mungdain: gi sung nge da:. Ngoonu" nyid wa joyoo myoo: sho' ca" da» ga: tid loo goo" wa.

²¹Houg: lang" nang gi nanya: gung ri ‹Nga" shid re" he: zooshang: yiri hang" khu: kaid la". Nga" zooshang: yiri ngoo ci: phyug pyam wigi zooshang: ayoo" loo›. Ngoo gi pyoung" shu" loo" shau" wigi khaid thu pyam shoug" bye:. He: zooshang: yiri hang" wigi khu: gyi: kaid la". Ngoo gi dayug kyeing" nyhid: too" shau su: nghoid. Houg ri he: zooshang: yigi khamo ju" re" boem la» ga: tid wa.

²²Gyi: sheung: thang ASEING gi nya: byumyu" yiri «Ngoo gi byumyu" yiri avoid asoo" byid: kaid wigi nyangnu" gi re" zooshang: yiri yhoem: khyoo: shu" lo loogoo" wa.

²³Khokham yigi nanu" nya: phoo yi yo' dakhyo" Khokham myhi' yigi nanu" nya: myhi' yi yo' dakhyo" nghoid loogoo" wa. Nyangnu" gi re" shidkhoin" moo goeb pid wigi nang ri ngi: shab byid: loo go" wa. Nyangnu" gi nang ri phau" myang: byid: wigi khyo' nyoem: loogoo" wa. Houg: lang" ngoo ASEING nghoid da" khyoo: ri nanu" se' loo wa. Ngoo wigi pang" thoug byid: wa ziri alang" nyid su: hang" we nheigloem: gyoug: goo" wa» ga: tid da:.

²⁴Nang gi gyizoo: pho da" lo, mo lanyhoeb ri yo" lhoid yu wa la". Nang gi thain: da" khokham pho da" thung: byu yiri yo" khyoid yu wa la".

²⁵ASEING «Hau: zigi bui" loo wa khyoo: nghoid nyid. Gyizoo: pho da" thung: byu yigi shu" lo" byug zi shau" boem wa. Thain: da" khokham pho da" lanyhoeb gi lhoid yu pyam zi shau" loo wa. Nang ri khaid zain: su: hang" ri we' ngoo khaid zain: wa. Houg: lang" ngoo gi re" zooshang: yiri khyoid yu wa.

²⁶Ngoo gi nang ri zeig zoo: mo, ri nyang: cang" said goo" nhang: wa. Nyangnu" gi byu said ziyo' nheig joem: yo: ze wigi yed: jo, goo" wa. Houg: lang" byu dangain" bang: gi ngoo gi nanu" ri khyoid yu wigi loid byoin nhang: kaid wa. ASEING nghoid ziri se loo" goo" wa. Ngoo gi Israela da" yoem: so' bo da" Mangsoo nghoid ziri nyangnu" se' loo goo" wa» ga: phug tid da:.