Read Lashi ESAIA 51 Bible Online

ESAIA 51 - Lashi bible

ESAIA 51

¹ASEING tid zigi «Khyoid yu shoug" noug bang: Pang" thug zi mho' wa ju" ri" bang: nanu" we" nga" dang: tam" gyoo: ge'. Nanu" re" lo da" lug pyo' Nanu" du: yu da" lug khyung: ri myid boin: ge'.

²Nanu" phoug" Phyid" Abraham yo' nanu" ri khu: myhu: kaid da" Sara ri myid boin: ge'. Abraham ri ngoo khe: uri nyang: gi zooshang: ayoo" shi" nghoid da:. Nghoid loug we' ngoo gi nyang: ri mainkaid byid: lho: nyang: ri zoo yi du yi byid: bye:. Ngoo gi nya: amyed ashen yiri gye" myoo: nhang: bye:.

³«Ngoo gi Yerusalem yo' nya: da" byo, yoin" jo, jang" moo nyid boem da" bang: dangain" ri nheig khyeug myid ci: shug byid: wa. Nya: mungdain: gi dain" pyoid yoo nghoid loug we' ngoo gi hau: ziri ngoo koid to" da Eden khyam: yhang: ti" da" khyam: ri koid pyam wa. Gau yi ngei pyo: zigi houg moo jo, loo wa. Jeju" coung" jikhoin" joem khoin" lho: ngoo ri jeju" boin: loo goo" wa.

⁴Nga" byu yi we"- nga" dang: ri tam" gyoo: ge'. Ngoo tid ziri tam" gyoo: we'. Ngoo gi byumyu" yiri nga" jhau" shid khyoo: byid: bye:. Nga" tarha" joem gi nyangnu" ri bidbang byid: loo wa.

⁵Ngoo gi myab ju" re" wigi nyangnu" ri khyoid yu wa. Nga" oung: doid zigi jhang re" abye:. Byumyu" yi adang moo ngoo wigi vhoeb wa. Ve: da" mungdain: joem gi ngoo ju" loo wa ziri lang" nyid ago". Nyangnu" gi nyangnu" khyoid yu wa myid byu ziyo' ngoo ri lang" nyid boem.

⁶Mougkhung: khyoo: nghang yu" kaid ge'. Mougmyid khyoo: goeb yu" kaid ge'. Mougkhung: gi myikhoug" yhang: ti" bei: byug wa. Mougmyid gi byimi xoug" yhang: ti" yoem: lo" byug wa. Nya: byu dangain" gi yangkhung" joem yo' dakhyoo" ti" shid: lo" byug wa. Nghoid loug we' ngoo ci: lo da" khyoid yu zigi apyaid atoo: moo deing jo, wa. Nga" oungdoid zigi lo" thang moo nghoid wa.

⁷Jo ziri se' da" bang: nga" jhau" shid khyoo: ri nanu" nheigloem: khoug: moo kaid too" bye: bang: nanu" we"- nga" dang: ri tam" gyoo: ge'. Byu yi nanu" ri juang" lho: rue" boem uri agyug goo".

⁸Nyangnu" gi nhoug: wigi zo: pyam da" byimi yhang: ti" moin" byug loo" goo" wa. Nghoid loug we' ngoo ci: re" da" khyoid yu zigi apyaid atoo: moo deing jo, wa. Nga" oung: doid zigi apyaid atoo: geing: teing jo, loo wa» ga: zi nghoid.

⁹ASEING we"- too' we' ngoonu" ri pang" thoug byid: we'. Re" yoem: so' ri ci: wigi ngoonu" ri khyoid yu la. Hau: ziri goonham' ci: lo yhang: ti" ci: we'. Panglai: main jung: Rahab ri adu du koid pyam su: gi nang nghoid da:.

¹⁰Panglai: ri kain" hei' loo" nhang: su: we' nang nghoid da:. Khyoid yu shoug" bang: yo" lid: phyid loo" goo" wa shid re" gyid khyo" khyoo: phang byid: su we' nang nghoid.

¹¹Nang wigi khyoid yu too" bang: gi Yerusalem khyoo: ngei: pyo: ziyo' jikhoin" khoin" ziyo' gau wigi nyho: zoo" ri ju" loo" goo" wa. Nyangnu" gi apyaid atoo: moo ngei pyo: loo goo" wa. Apyaid atoo: moo nheig koug ziyo' koug ngau zi loid byoin loo goo" wa.

¹²ASEING tid zigi «Nang ri yoem: boo nhang: su: gi ngoo nghoid. Myo, gam tho' mo jain" sho' ayo" zeing: kham da" Shid: se' da" byu ri ciwim gyoug la".

¹³Nang ri phain" so: too" su: mougkhung: ri pyo: nghoeb too" su: mougmyid da" apoem: ayang: ri zhug too" su: ASEING ri nang to" myhid pyam bye: la". Nang ri zeig zoo: bang: da" nheig joem: yo: zi nang ri phyo' shoin' pyam wa jen" jen" nghoid mo, ri byeing abyid nang ciwim gyoug nyid la". Nyangnu" da" nheig joem: yo: zigi nang ri ayo" tain" goo" wa.

¹⁴Thung: byu yigi amyang" ri nhang: kaid zi shau" boem wa. Nyangnu" kang: sheing: sho' dei nyid boem goo" wa. Houg: lho: nyangnu" moo ca" da" zoo: noem dangain" yo" loo goo" wa.

¹⁵Ngoo gi nanu" ASEING Mangsoo nghoid. Panglai: ri ngoo lhu: zhang" kaid wigi hau: da" being: lhoung" ri myeing nhang: da:. Nga" myeing gi myhang: thang ASEING ga: zi nghoid.

¹⁶Mougkhung: ri ngoo pyo: nghoeb wigi mougmyid da" apoem: ayang: ri zhug to" da:. Ngoo gi Yerusalem ri «Nang gi nga" byumyu" nghoid. Nga" jhau" shid khyoo: ngoo nang ri byid: too" bye:. Houg: lho: nga" lo, wigi ngoo nang ri goem loem byid: bye:» ein: zi nghoid.

¹⁷Yerusalem we"- boin: to' loo we'. Nanya: gung ri nhoug" lho: too' we'. Nang ri shug wa byid: da" ASEING nya: nheig yo: da" Yooboo dam byid: khu ri nang shug abye:. Nang hau ziri shug khyo' kaid lho: apyi: akam" so" leung yen" nhang: bye:.

¹⁸Nang ri shu" wa hang" anyid Re" byumyu" yi phung: moo nang ri lo wigi shu" shi: wa hang" anyid.

¹⁹Kyi" khyeug yau: khi" eig zhang re" adang moo gyo" zang" abye:. Re" mungdain: gi meing: zain: pui" wigi jham" coug: youg bui" byug bye:. Re" byumyu" yigi zooyoid abye:. Nang ri nheig khyeug myid ci: shug byid: wa hang" anyid.

²⁰Khyoo: khaid khang" moo" da" khyoo: jhoin: moo re" byu yi gi yoem: neing: wigi yhau" leung lo" ago". Nyangnu" gi shoo" sho: su: da" goin moo myi" da" shoocid: yhang: ti" nghoid ago". Nyangnu" gi Mangso nheig yo da" yoem: so' ri kham: zo: boem abye:.

²¹Yhid: yed bang: yo' dakhyoo" ti"- apyi: akam" so" baid leung yen" bang: Yau: khi" kyi" khyeug kham zo: nyid boem da" Yerusalem byu yi nanu" we"

²²Nanu" ASEING Mangsoo gi nanu" ri goem loem byid: wigi «Ngoo nheig yo: wigi nanu" ri byid: to" da" khu ri ngoo yu pyam nyid bye:. Nanu" ri apyi: akam" bui" nhang: da" zabyid yhid: ri nanu" ashug ca" loo: wa.

²³Ngoo gi hau: ziri nanu" ri doin: zeig zoo: bang: Fu" moo" khyoo: moo nanu" ri leung gyoo" loo" nhang: bang: nanu" ri pheilhoug: yhang: ti" nang: nhe" pyam bang: ri byid: wa» ga: zi nghoid.