Read Lashi ESAIA 52 Bible Online

ESAIA 52 - Lashi bible

ESAIA 52

¹Yerusalem we"- yoem: bo wigi doem gyi: sheung: loo we'. Mangso da" gyeung" shang: voomoo" we"- Reung: da" ziyo' nanya: gung ri byimi soin' void ci: we'. Tarha" tungbau yigi re" khoem" moo khanham we' ayo" doem vang goo" wa.

²Yerusalem we"- nanya: gung ri koo: we'. Pheilhoug: boem" mo to' lho: nanya: zhungtang moo zhoung: we' Ziun da" thung: byu yi we"- nanu" ri tei" to" da" jangcoo" joem ri khyoid we'.

³Gyi: sheung: thang ASEING gi nya: byu yiri «Nanu" join bue" lo" boem uri nanu" shid re" ngei abyid: nghoid ago". Houg: yo' dakhyoo" ti" nanu" ri lhoid pyoin' kaid wa shid re" we' abyid: ca" wa.

⁴Tungbau byu yi khyo" nanu" Egutu moo yhe: nyid boem uri nanu" nya: myid khyo" yhe: lo" ago". Nghoid loug we' Asuri gi nanu" ri agyoo: atho' nyangnu" ri shu" lo" byug wigi nanu" shid re" ci: abyid: nghoid ago".

⁵Akhid" Babelon moo we' dayhang: ti" za: bue" abye:. Nanu" gi thung: byu yi nghoid boem. Nanu" shid re" ciwe' abyid: nghoid ago". Nanu" ri vhoeb da" bang: gi phau: wigi byeing abyid ngoo ri aphoug" akhyoid koid ago".

⁶Ngoo gi Mangsoo nghoid lho: nanu" ri ngoo dang: tid bye: su: nghoid ziri yhen: yu goo" wa da" ayo, ju" loo wa» ga: tid da:..

⁷Lu dang: gi nghoid da" yug yoo myenjham" da" lu dang: voin wigi boem joem ri lid: phyid lho: re" nyid da" lagyoo: dayug ri Shau" myang zigi gye" mau" pho" zi nyang: nghoid. Nyang: gi oung: doid khyoo: ri tid fu" wigi Ziun ri «Re" Mangsoo gi khokham nghoid da o"» ga: tid.

⁸Voomoo" zung" bang: gi nyho: yoid nyid ago". Gau wigi dage" nyho: yoid nyid boem. Ziun khyoo: ASEING tau" lo" ziri Nyangnu" nya: myo, jhid" wigi nyang: myang boem bye:.

⁹Byo, yoin" jo, da" Yerusalem nang we" gau wigi nyho: kaid we'. ASEING gi nya: voomoo" ri khyoid yu wigi Nya: byu yiri nheig teing byid: loo wa.

¹⁰ASEING gi nya: gyeung" shang: yoem: so' ri ci: wa. Nyang: gi nya: byu yiri khyoid yu wigi Mougmyid byu xangsu: dangain" gi hau: ziri myang boem wa.

¹¹Noku Yhoem: Moo" jonu" ri dang da" nanu" dangain" we" Babelon mo gyeing" nyang: thu loo" ge'. Toem' to" da" ziyoo joem ri age tain" wa. Nanu" nya: gung ri gyeung" shang: sho' koid wigi thu loo" ge'.

¹²He: lheing: gi nanu" ahain: adoin thu loo" aca" goo" wa. Phang: loid wa asoin' ca" goo" wa. Nanu" ASEING Mangsoo gi nanu" ri shu" vhu" she: wigi shoid khang" moo" khyo" goem loem byid: loo wa.

¹³ASEING tid zigi «Nga" dei zoo: gi nya: moo" ri oung: myug sho' koid loo wa. Nyang: gi gye" myhang: sho' ngi: shab byid: zi shoug" wa.

¹⁴Nyang: ri shau" myang lang" byu myoo" sho' bang: gi dain mau" byug wa. Nyang: gi byu yo' adu loo sho' gung khyang: myonhoo: thid byug wa.

¹⁵Nghoid loug we' akhid" byumyu" myoo" sho' bang: we' yu" mau" loo goo" wa. Khokham yigi atho' tid loo sho' mau" byug wa. Nyangnu" gi nyangnu" khanham we' ase' da" ja: ri shau" myang wigi Se' gyo: yu loo goo" wa» ga: tid.